Претседателката на Инспекцискиот совет, Магдалена Филиповска-Грашкоска, денеска на редовна прес-конференција во Владата ги презентира наодите од спроведените инспекциски надзори во периодот од 6 до 8 април годинава.

Таа истакна дека за период од овие три дена, од страна на шест инспекторати се направени вкупно 1.346 надзори за почитување на мерките и препораките на Владата за заштита од ширење на коронавирусот.

„Од вкупно 547 контроли спроведени од Државниот пазарен инспекторат, дел се однесува на работењето на угостителските објекти, а преостанатиот на контроли на замрзнатите цени на одредени производи. Притоа затворени се вкупно 4 угостителски објекти во Битола, Гостивар и во Тетово, а од визуелната обиколка во повеќе градови констатирано е дека угостителите ги почитуваат забраните за работа. Државниот пазарен инспекторат изминатите три дена интензивно ги контролира и кафематите на бензинските пумпи и на други локации во градовите и притоа во периодот од 6 до 8 април забранети за употреба се 40 кафемати во Скопје, Охрид и во Гостивар“, рече Филиповска-Грашкоска.

Претседателката на Инспекцискиот совет истакна дека Државниот пазарен инспекторат ги контролира и замрзнатите цени на одредени производи.

„Во периодот од овие три дена направени се повеќе контроли на трговци во малопродажба и големопродажба, при што кај дел од нив е констатирано зголемување на цените по што им е наложено да ги вратат старите цени од 11 март“, посочи Филиповска-Грашкоска.

Државниот инспекторат за труд за периодот од овие три дена реализирал вкупно 422 контроли, при што донесени се едно решение и 11 укажувања за работодавците што не постапиле по препораките на Владата.

Повеќето од овие надзори биле поврзани со постапување по претставки за платено отсуство на родител на дете до 10 години, самохран родител, бремени жени и хронични болни, соопшти претседателката на Инспекцискиот совет на денешната прес-конференција.