Македонија
„За Филип, Александар, Дамјан, Александар и Филип, прерано го напуштивте овој свет“, напиша градоначалникот на Штип

Петмина штипјани загинаа, а четворица се борат за живот во болниците во земјава и странство по страшниот пожар во дискотеката во Кочани, информираше на градоначалникот на Штип, Иван Јорданов.
„За моите пријатели, соработници, познаници… За Филип, Александар, Дамјан, Александар и Филип. Прерано го напуштивте овој свет, во кој што творевте, создававте и летавте низ убавините на животот“, напиша градоначалникот на Штип, Иван Јорданов.
„Нашиот град ќе ве памети по индивидуалната харизма, а трагедијата поради која прерано не‘ напуштивте ќе ни остави траен белег за вашето постоење.
Моја должност и должност на сите нас ќе биде да се бориме против системот и против се‘ она кое го предизвика ова! Давам ветување за искрена борба против неправдата која ви беше нанесена. Моето срце засекогаш ќе ве памети!“, додаде тој.
Книга на жалост е поставена во холот на зградата на општина Штип, како и на градскиот плоштад „Слобода“, каде што од синоќа се палат свеќи пред сликите на починатите од Штип.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Да не се шират дезинформации во врска со бројот на загинатите, бидејќи дополнително се зголемува вознемиреноста во јавноста, порачуваат од Владата

Во врска со трагедијата во Кочани, Владата изразува најдлабоко сочувство до семејствата на загинатите и повредените.
„Ова се моменти на тага и солидарност, кога сите мора да покажеме одговорност и почит кон жртвите.
Во јавноста се пласираат шпекулации и дезинформации во врска со бројот на загинатите. Владата со целосна одговорност потврдува дека бројот на жртви е 59. Сите други тврдења за 100 или 120 загинати се неточни и неосновани. Ваквите лажни информации само ја зголемуваат вознемиреноста во јавноста и нанесуваат дополнителна болка на семејствата на жртвите.
Бројките ги утврдуваат официјалните медицински и истражни служби кои работат на терен. Владата инсистира на целосна транспарентност и јавноста ќе биде редовно информирана за сите нови детали поврзани со истрагата“.
Апелираат до медиумите и граѓаните да не наседнуваат на непроверени информации и да не шират шпекулации.
Ова, потенцираат од Владата не е време за манипулации, туку за заедништво, почит и одговорност.
Владата, напоменуваат од таму, останува посветена на расчистување на сите аспекти од оваа трагедија и преземање на сите неопходни мерки за да обезбеди правда и поддршка за семејствата на жртвите.
Македонија
Таравари: Сите хоспитализирани пациенти во Солун во моментот се во стабилна состојба

Министерот за здравство д-р Арбен Таравари, денеска во раните утрински часови заедно со министерот за надворешни работи, Тимчо Муцунски и д-р Илир Вела, пристигнаа во Солун со цел да ги посетат и да се информираат за здравствената состојба на хоспитализираните пациенти.
„Ги посетивме Општата болница Папаниколау и Воената болница во Солун и во овој момент можам да информирам дека сите пет пациенти примени во овие установи се во стабилна состојба. Изразувам искрена благодарност до нашите колеги во Солун, како и до грчкиот народ и владата, за нивната посветеност и поддршка, како и помошта која ни ја пружија во овие моменти“, изјави министерот Таравари.
Министерството за здравство останува во постојана комуникација со сите надлежни институции и меѓународни партнери за натамошна координација и поддршка.
Македонија
Изгласана недоверба на делегатите на УСС УКИМ, студентите не можат да имаат претставнички тела контролирани од властите, порачаа од Независното студентско собрание

Штотуку ФСС на Филозофскиот факултет при УКИМ изгласа недоверба на делегатите на УСС УКИМ. Овој модел на студентско претставување е истрошен, соопштија од Независното Студентско Собрание на УКИМ.
„Експериментот со УСС заврши, студентите на УКИМ ќе се самоорганизираат пленумски.
Тоа за кое пред деценија студентите се бореа, никогаш не го добија. Наместо автентично претставување на студентскиот интерес го добивме зависниот бирократски лавиринт наречен УСС на УКИМ“, потенцираат во соопштението.
Студентите, како што нагласуваат во напишаното, не можат да имаат претставнички тела контролирани од властите и партиите.
„Независното Студентско Собрание на УКИМ е хоризонтална самоорганизација на сите студенти на УКИМ. Ова се наши универзитет“, порачуваат.