Македонија
Здружението „Билка“ бара оставка од министерот за животна средина Садула Дураку

Здружението за канабис и зелени политики „Билка“ – Скопје како здружение на граѓани што се залага и бори за зачувување и унапредување на животната средина бара итна и неотповиклива оставка од министерот за животна средина и просторно планирање, Садула Дураку.
„Последната изјава на министерот Дураку дека тој не се занимава со граѓаните што решиле да тужат поради загадениот воздух е само последната капка што ја прелеа чашата. Ноторен факт е дека именуваниот министер е исклучително пасивен во својот ресор и граѓаните често погрешно мислат дека министер е Јани Макрадули, кој е заменик-министер, а не Садула Дураку. На граѓаните и нам како зелено здружение ни е потполно нејасно која е улогата на овој човек, освен бенефиции како министер, ниту можеме да го видиме неговиот особен придонес во заштита и унапредување на животната средина“, велат од Здружението.
Од таму посочуваат дека ова не е првпат Дураку да се однесува комплетно игноратнтно кон здруженијата на граѓани што се занимаваат со она што всушност самиот тој треба да се занимава.
„Поради тоа и поради фактот за речиси една и пол година како министер нема преземено никакви мерки во насока на заштита на животната средина во услови кога целата држава се задушува од загадениот воздух, а ресорниот министер не се занимава со граѓаните, бараме итна и неотповиклива оставка на министерот Садула Дураку. Доколку тој самиот не си даде оставка, инсистираме на тоа да биде разрешен. Сметаме дека нашата Република има видено и повеќе од доволно функционери што не се посветени на работата и не се достојни за функцијата на која се именувани“, велат од Здружението за канабис и зелени политики „Билка“ – Скопје.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Обилни дождови, студ и снег на планините – од среда промена на времето

Утре времето ќе биде променливо облачно со сончеви периоди. Ќе дува слаб до умерен северен ветер. Минималните температури ќе се движат од 5 до 14, а максималните од 17 до 24 степени.
Во Скопје ќе преовладува слично време – променливо облачно со сончеви периоди и слаб северен ветер. Утринската температура ќе се спушти до 12, а дневната ќе достигне до 22 степени.
Од среда попладне до петок се очекува нов влажен бран со врнежи од дожд, локално пообилни над 30 литри на метар квадратен. Во четврток и петок, со продор на постудена воздушна маса и засилен северен ветер, на повисоките планини ќе има услови за повремен снег. Температурите значително ќе опаднат.
За време на викендот се очекува стабилизирање на времето и постепен пораст на дневните температури.
Македонија
Судот оваа недела ја завршува оценката на обвинението за „Пулс“

Скопскиот Кривичен суд најави дека до петок ќе ја донесе одлуката дали обвинението за пожарот во кочанската дискотека ќе биде прифатено. Судиите треба да утврдат дали актот е јасен, правно издржан и поткрепен со доволно докази.
Постапката се одолговлекуваше поради тоа што дел од адвокатите на обвинетите не биле достапни за прием на документацијата, но сега, според судот, сите рокови истекуваат на 3 октомври.
Премиерот Христијан Мицкоски изрази незадоволство од начинот на кој обвинителството ја води постапката и порача дека сите поврзани со случајот мора да одговараат. Од опозициската СДСМ, пак, обвинија дека власта ги штити своите функционери кои биле чести гости во дискотеката.
Во пожарот загинаа 62 млади луѓе. Паралелно се води и истрага за 29 полициски службеници, за кои сè уште се анализираат доказите.
Македонија
Можност за воведување на нови авиолинии, тема на средбата меѓу вицепремиерот Николоски и шведскиот амбасадор Солстром

Заменик претседателот на Владата и министер за транспорт Александар Николоски денеска оствари работна средба со новоименуваниот амбасадорот на Шведска, Ола Солстром.
На средбата, вицепремиерот Николоски го запозна амбасадорот со владината програма во делот на капиталните проекти и вклученоста на Македонија во регионалните инфраструктурни проекти со што сe дава придонес во развој и промоција на регионалната соработка.
Се разговараше и за можностите и услови за инвестирање што ги нуди Македонија и јакнење на економската соработка.
Исто така, вицепремиерот Николоски ја отвори и темата за поквалитетна поврзаност меѓу двете земји и можностите за зголемување на авиолиниите меѓу Македонија и Шведска.
На средбата беа потврдени добрите билатерални односи меѓу Македонија и Шведска кои традиционалнo се пријателски. Двајцата соговорници ја нагласија потребата од интензивирање на соработката во дејностите од заеднички интерес за двете земји.