Македонија
Индивидуалните донатори овозможуваат секое дете да расте во семејство
„Живеењето и работењето во 2020 година, во услови на светска пандемија, нè засегна сите. И професионално и приватно, и допре во секоја сфера на нашето живеење. Најмногу во клетката на нашето живеење – нашите семејства, нашите блиски и нашите колеги за кои здравјето и сигурноста се прв приоритет. За СОС Детско село приоритет беа 590 деца, млади и семејства на кои им требаше нашата и вашата помош и поддршка“.
Ова се емотивни зборови кои допреа до срцето на многу индивидуални и корпоративни донатори, кои и годинава помогнаа децата и младинците да се соочат со предизвиците од ковид-пандемијата. Националниот директор на СОС Детско село, Јулијана Гапо, на овој начин се заблагодари на сите донатори на Светскиот ден на човечката солидарност, кога СОС Детско село го организираше традиционалниот настан „Едно семејство“.

Таа, во своето обраќање, додаде дека за остварување на целите на СОС Детско село од исклучителна важност е индивидуалната филантропија – можноста секој поединец да споделува вредности со некоја хуманитарна кауза и да овозможува остварување на нивните цели. „Претставува голема радост фактот дека секоја година СОС Детско село инспирира се поголем број граѓани кои се вклучуваат во остварување на нашите цели и ја поддржуваат нашата работа – обезбедување услови во кои децата можат непречено да се школуваат, да бидат згрижени и заштитени, што би било невозможно без хуманост и солидарност. Многу донатори прават разлика во животот на децата од ранливите групи, а секоја донација им возвраќа со радост и гордост и лична сатисфакција кога помагаме на тие околу нас. Пред нас е уште една неизвесна година и затоа ги повикуваме сите кои се во можност да ја посетат нашата страница https://sos.org.mk/sos-superheroi/ да се запознаат со нашите активности и со можностите како да помогнат“.
На листата на најголеми индивидуални донатори на СОС Детско село годинава се запишаа и имињата на д-р Лоди Гоговска, Варвара Стојановска-Чукиќ, Јулијана Пецовска, на членови на православната црква „Свети Климент“ од Диарборн – Мичиген, Кристијан Тимоние, Стефани Неделкова и Снежана Кимова.
Д-р Гоговска, цитирајќи го Алберт Ајнштајн, ќе рече дека „големината и вредноста на човекот лежи во она што го дава, а не во она што е способен да го прими“. Според неа, никој не ја живее сегашноста доколку не дал некому нешто без да го врати тоа. „Давањето нема да нè осиромаши. И не е важно колку даваме, битно е со колку љубов тоа го правиме (Мајка Тереза). Никој не е бескорисен на овој свет доколку и малку го олесни товарот на другиот“.
Клучната работа на СОС Детското село е грижа и овозможување поддршка на децата и младите без родители и родителска грижа и остварување на целите и мисијата „Ниту едно дете не семее да расте само”. Тоа е активност која се одвива во континуитет, без престан, секој ден, недела, месец… и така 19 години. Работа која не може да застане, да престане, да се откаже. Токму поради тоа, секој оној што ја препознава важноста на одржливоста на нашата работа станува посветен донатор. Донатор кој секој месец, во континуитет, непрекинато ги помага децата и претставува силен генератор на стабилноста на нашите програми и на нашиот успех.

Како најголеми посветени донатори на СОС Детско село се впишаа и имињата на Марија Челебиева, Марија Цветановска, Марио Ристовски, Анита Силановска и Мартин Гегоски.
Авторот на книгата „Тито – мојот последен херој“, Зоран Спасов-Sоф, одлучи приходот од продажбата на ова дело да биде дониран во СОС Детското село. За ваквата индивидуална филантропија, тој се прашува „Зошто да помогнеме некому?“ и одговара „Мислам дека е малку тешко човек да одговори на вакво прашање, посебно кога се работи за еден нормален и обичен човек. Во генот на секоја единка е да се биде хуман и доблесен и тоа не е воопшто тешко да се направи. Овој човечки гест, да го отстапам приходот од мојата книга во добротворни цели, нема никаква позадина. Мојата лична донација не ја сметам за голема, но голем е одговорот на јавноста, преку купување на овој роман, да помагаат на оние на кои им е најмногу потребна помош. Идејата е едноставна – читателот донира во СОС Детско село и добива бесплатна книга. Тоа нека биде перцепцијата. Колку мал гест за еден обичен човек, а колку голем и важен за најранливата категорија – децата“, вели Спасов.
СОС Детско село преку програмата за грижа, советување и менторство за млади, во рамки на настанот „Едно семејство” организираше и продажна изложба на делата на Мартин Буровски како можност за поддршка на младиот и надежен уметник во развој на неговата професионална кариера. На настанот беа изложени 12 продажни уметнички дела, кои беа купени од компании и индивидуалци. Упатуваме посебна благодарност до Пакомак, Винарија Тиквеш, Веро маркети, ЈП Водовод и канализација Македонија, Пиварница Скопје, до Симона Димитрова и Силвана Ивановска, кои со купување на дело несебично го поддржаа младиот уметник.
СОС Детско село се заблагодарува на сите индивидуални донатори за несебичната поддршка, кои претставуваат пример многумина наши сограѓани да запловат во филантропските води и да продолжат или да почнат со хуманост. Исто така, СОС Детско село ги мотивира сите луѓе да донираат и да ја поддржат Организацијата во остварување на својата мисија – Ниту едно дете да не расте само.

Секако, покрај индивидуалните донатори, СОС Детско село изразува благодарност до сите компании кои помогнаа во реализација на сонот на секое дете. Статуетка за Најголем корпоративен донатор добија Пиварница Скопје, Осигурување Македонија и Агенцијата за електронски комуникации. Плакета за поттикнување индивидуална филантропија добија ЈП Водовод и канализација Македонија и Веро маркети. Плакети за значаен придонес и поддршка добија компаниите Кап Карго, Пакомак, Хуссе-Кордеа, Гранит, Битолска млекарница, Алкалоид АД Скопје, Тулбе БВ, Форма, Фармахем, Унија финансиска, Екомозаик, Макпрогрес, АД Др Пановски. За поттикнување филантропија кај вработените плакета добија Шпаркасе Банка и Илинка Захарчева Буддс – Google. Благодарница за придонес и поддршка во 2020 година добија Везе шари, Комисија за хартии од вредност, Бест Веј, Аптив, Аптека Ани фарм, Мебел Ви, Шортлист ЛЛЦ, Тиан Де, Перутнина Птуј, Боград Струга, Бе-Да логистик, Тетекс Ад Тетово, Експекта медикал, Дабар Дооел, Пекабеско АД, Вато Доо, Цилиндо интернационал, Блиц инженеринг и Салекс ИНГ. Посебна благодарност СОС Детско село изразува до М6 Едукативниот центар кој даде несебична поддршка при реализација на овогодишниот настан „Едно семејство’.
(ПР текст)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
УХМР: Најголема опасност од излевања и заезерувања има во југозападните и западните делови на земјата
Од утринава зголемување на водостоите има во југозападниот дел на земјата, односно на река Коселска, река Сатеска, река Ресенска и на останатите помали реки и суводолици во регионот каде се можни локални излевања на реките и појави на заезерување на водата. Во Охридско-Преспанскиот регион се очекува реакција на помалите реки и суводолиците, а исто така и во Струшкиот регион каде се можни локални излевања и појави на заезерување во Струшкото Поле заради интеракција на подземните и површинските води, информираат од Управата за хидрометеоролошки работи.
„Исто така, утринава е висок водостојот на река Вардар во горниот дел од сливот и можни се локални излевања на реката во тој дел (во Гостиварскиот регион), а можни се појави на заезерување на водата во Полошката Котлина.
Значително е висок водостојот на река Црна во долниот дел од течението и можни се локални излевања на реката и појави на заезерување на водата во Пелагониската Котлина, а исто така и во делови од Битолско-Прилепскиот регион. Во горниот дел од сливот нема позначително зголемување на водостојот но можни се заезерувања во Демир Хисарскиот регион.
Останува висок водостојот на река Треска и таму се можни локални излевања и заезерувања во целиот слив на реката, вклучително и Кичевскиот регион.
Генерално, најголема опасност од излевања и заезерувања има во југозападните делови и западните делови на земјата каде и во текот на денот некаде до 18:00 часот врнежите ќе бидат од дожд и снег и на повисоките места, додека на пониските ќе бидат само од дожд. Во попладневните часови, некаде после 18:00 часот се очекува продор на северен ветер и северно струење на воздухот што ќе придонесе за заладување на времето и врнежите насекаде ќе преминуваат во вид на снег. До тој временски преод останува опасноста од локални излевања и заезерувања на водата пред се во југозападните, западните и северозападните делови на земјата.
Предупредуваме на вниателно движење покрај реките и суводолиците во текот на денешниот ден“, се наведува во соопштението на УХМР.
Македонија
Денеска гласаат болните и затворениците пред повторните избори за градоначалници во четири општини
Денес се спроведува гласањето на болните или немоќни лица и лицата кои се на издржување на казна затвор за повторните избори за градоначалници на општините Гостивар, Маврово и Ростуше, Врапчиште и Центар Жупа, информира Државната изборна комисија.
„Вкупно 249 болни или немоќни лица можат да го остварат своето право на глас на овие избори. Од нив, 146 лица се пријавени за гласање во Гостивар, 32 болни или немоќни лица имаат право да гласаат во Врапчиште, 69 лица може да гласаат за градоначалник на општина Маврово и Ростуше и 2 лица може да гласаат за градоначалник на општина Центар Жупа. Со почеток во 7:00 часот во 7 казнено поправни установи, своето право на глас можат да го остварат 94 лица кои се на издржување казна затвор или притвор“, велат од ДИК.
Оттаму додаваат дека гласањeто досега се одвива непречено и без проблеми.
Македонија
ЦУК: Поплавени дворови и земјоделски површини, одрони на повеќе патни правци
Центарот за управување со кризи (ЦУК) соопшти најнови информации за последиците од обилните врнежи на територијата на Македонија – состојба заклучно со 09:00 часот.
Кочани и Штип
Кај Оризарска река во село Грдовци има излевање. Водостопанство Брегалница интервенира со багер гасеничар. Механизацијата е сѐ уште на терен. Од понеделник ќе започне чистење на речното корито на Оризарска река од Грдовци кон Оризари со цел да се спречат идни несакани последици.
Сообраќајот на патниот правец Кочани Грдовци е нормализиран.
На повеќе патни правци во источниот дел се појавуваат одрони и Македонијапат интервенира за нивно расчистување.
Битола
Во населбата Стрчин КЈП Нискоградба интервенира со механизација за расчистување на нанос од чакал и земја.
Во селото Кравари има заезерени земјоделски површини без опасност по објектите.
Во селата Жабени и Породин има поплавени земјоделски површини и ЈП Водостопанство интервенира на Жабјанска река.
Елешка река е излеана и има поплавени земјоделски површини.
Нивото на водата во реките е во опаѓање.
Ресен
Поплавени се земјоделско земјиште, дворови, куќи, помошни објекти и магацини за складирање на јаболка.
Нивото на Голема река е намалено од 2,20 метри на 1,40 метри.
Ангажирани се екипи од ЕЛС Ресен, Македонијапат и ЈКП Пролетер Ресен кои вршат обиколка и проценка на состојбата на терен. Состојбата е нормализирана.
Крушево
Поради поројните врнежи водата за пиење е заматена и се препорачува да се преврива најмалку 10 минути.
Нивото на Црна река кај село Бучин е покачено но водата на местата каде што беше излеана е повлечена.
Екипи од ЈП Комуна, ТППЕ Крушево, ЕЛС Крушево и надлежни служби интервенираат на зајакнување на насипите кај критичните точки.
Демир Хисар
Локалниот пат кон село Мренога е затворен за сообраќај поради оштетување на мост на Боишка река. Надлежните служби ја обезбедуваат локацијата.
Прилеп
Во селото Лажани пријавена е штета кај еден жител поради поплавен двор и приземни простории и оштетување на тутунот.
Во селото Пешталево исто така имало поплавувања поради неисчистени канали.
Во двете села интервенираше градежна механизација за расчистување на каналите.
Тетово
Патот кон Бање Тетово е исчистен но СВР Тетово го има забрането сообраќајот од безбедносни причини.
Патот кон село Жерма и кон село Бродец е прооден.
Состојбата во село Стримница Општина Желино се следи континуирано од надлежните служби.

