Македонија
Инстант-лозот „7х7“ ги израдува такси-возачот Ѓоко и неговото петочлено семејство

„Не верував дека може да се добие на игра на среќа, додека и самиот не станав добитник “
Ѓоко Ѓоргиовски, татко на три деца, млад човек, скромен, насмеан и разговорлив такси-возач од скопската населба Ченто е среќен добитник на премија од инстант лозот „7 х 7“ и веќе го вози својот нов прекрасен ХЈУНДАИ ТУСОН „изгребан“ на инстант лотарија.
Клучевите од атрактивниот автомобил ги предадовме на семејството Ѓоргиовски пред продажното место „Илијана“ во скопската населба Ченто, од каде што е купен добитниот лоз, а тие среќни и возбудени ни ја раскажаа својата приказна.
Имено, Ѓоко и Христина неодамна го продале стариот автомобил со намера да купат нов, подобар и покомфорен за своето 5-члено семејство. Неодамна, на враќање кон дома, на минување крај продажното место „Илијана“, сопругата на Ѓоко, Христина, предложила да купат 4 инстант лоза „7х7“. По неколку заменети лозови со помали добивки, гребејќи ги полињата на последниот лоз окриле три исти симболи − ХЈУНДАИ ТУСОН, коишто означуваат само едно – дека е освоена една од 14-те премии, едно од 7-те СУВ-возила ХЈУНДАИ ТУСОН.
Среќниот добитник сподели со нас дека неговите родители редовно играле лото, но нему не му се верувало дека може да е се добие на игра на среќа, па со сопругата само повремено играле инстант лотарија заради забава. „Не верував дека може да се добие на игра на среќа, додека и самиот не станав добитник“, ни рече Ѓоко и додаде: „Сега верувам, вистина било, отсега ќе уплаќам и лото, моите родители играа лото и пропуштиле 7-ка, но можеби мене пак ќе ми се посреќи“.
Среќното семејство Ѓорѓиоски со своите три дечиња планирале да заминат на одмор во Охрид и се мислеле од кого да позајмат возило. Но, ете, една добра идеја да купат инстант лозови на враќање кон дома, им го решила проблемот. Буквално, спакувани го дочекаа доделувањето, па откако го преземаа автомобилот ги испративме на одмор во Охрид од каде што очекуваме импресии и фотографии.
Ова е уште еден доказ дека среќата не се знае кога ќе се насмее, само треба вистински да веруваме во неа и да ѝ дадеме шанса, со некоја добра идеја.
Инстант лозот „7 х 7“, пласиран на 6.6.2023 год., нуди вкупно 14 премии од коишто 7 возила ХЈУНДАИ ТУСОН и 7 возила ХЈУНДАИ БАЈОН. За нешто повеќе од два месеца доделивме 3 од нив. Ги очекуваме новите среќни приказни.
ПР текст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Засадиле 100 семки канабис на нива во Пчиња, ОЈО отвори истрага

Започнати се постапки против дилери на марихуана во Велес и во Скопје, информираат вечерва од Јавното обвинителство. Јавните обвинители до надлежните судови доставиле предлози за определување мерка – притвор за сите тројца осомничени.
– Основното јавно обвинителство – Велес донесе наредба за спроведување истражна постапка против две лица за кривично дело – неовластено производство и пуштање во промет наркотични дроги, психотропни супстанции и прекурсори од член 215 став 1 од Кривичниот законик. Двајцата осомничени – соизвршители, во периодот од март до септември годинава, во атарот на велешкото село Карабуниште, неовластено произведувале марихуана. Засадиле 100 семки канабис на нива во месноста викана Пчиња, од кои изникнале 80 растенија што ги одгледувале и ги наводнувале, појаснуваат од Обвинителството.
На 27 септември, осомничените биле затекнати од полициски службеници додека собирале цвет од канабис.
– На лице место биле пронајдени машини за одвојување на цветот од стеблото, три пластични кофи со вкупно над четири килограми марихуана и повеќе вреќи со стебла од канабис, додаваат од Обвинителството.
За истото кривично дело и Основното јавно обвинителство – Скопје отворило истрага против едно лице, за кое во соопштението се наведува дека неовластено произведувало и држело за продажба наркотична дрога – марихуана.
– Во дворот на осомничениот на улицата „Кадињача“ во Скопје, полицијата пронашла две растенија канабис што ги одгледувал, а од домот биле одземени и 38 паковки со вкупно околу 30 грама марихуана и една дигитална вага со траги од канабис и кокаин, истакнуваат од Обвинителството.
Македонија
Филипче: Гласот за СДСМ е одлука за решавање на маката на луѓето, СДСМ не лаже

Лидерот на СДСМ Венко Филипче во своето излагање на денешната Конвенција за промоција на кандидатите за градоначалници и советници истакна дека партијата е обединета околу воспоставување на вредносен систем во кој патриотизмот и достоинството не се злоупотребуваат за партиски рејтинг, туку значат обезбедување безбедни, чисти и здрави средини за македонските граѓани, како и секојдневна грижа за тоа како животот на сите ќе биде подобар.
-Денес стоиме со јасна порака, ова е момент на нов почеток, рече Филипче на Конвенцијата за промоција на кандидатите за градоначалници и советници за локалните избори 2025 година.
Како што посочи, Македонија не смее да биде дом на малкумина, туку дом на сите.
-Секој глас е важен. Нашиот избор е борба за нашиот дом. Ова е наш дом и ова е наша борба. Македонија не е и не смее да биде дом на малкумина, туку дом за сите. Македонија нема да биде дом каде ние, домаќините, ќе бидеме безгласни, без право на одлука, без право на достоинствен живот во домот. Нашиот дом е нашата Македонија, но и нашата партија, а нашите вредности се темелите на тој дом. И тие темели ќе ги чуваме и јакнеме, рече денеска Филипче.
Тој потенцирање дека борбата за тоа каков дом сакаме, почнува од сега. Притоа правејки паралела за развојот и напредокот со СДСМ и очигледниот застој со ВМРО-ДПМНЕ.
-Ако се откажеме сите, тогаш иднината ќе ја оставиме во раце на оние кои ја водат земјата назад, во темнината на корупцијата и стравот. Ако пак застанеме заедно, можеме повторно да ја изградиме Македонија како наш заеднички дом. Ние не сме совршени, но сме оние што ја носат државата и граѓаните кон јасна иднина и кои се грижат за реалните проблеми, рече Филипче на Конвенцијата.
Тој исто така порача дека постои нешто поголемо од партијата, а тоа е заедничкиот дом, државата во која сите живеат сите граѓаните. Затоа гласот за СДСМ е одлука за решавање на маката на луѓето, затоа рече Филипче, СДСМ е онаа која не се повлекува во криза, не лаже, туку се соочува со проблемите.
„Вашиот глас е штит за вашето семејство, за вашите права и за вашата иднина“, порача Филипче.
Македонија
Романец осомничен за тешка кражба во Скопје

Основното јавно обвинителство Скопје поведе постапка против романски државјанин, осомничен дека во Скопје извршил кривично дело – Тешка кражба според член 236 став 1 точка 3 од Кривичниот законик.
Осомничениот 41-годишник делото го извршил на 21 март, во Ѓорче Петров, кога на дрзок начин и со сила одзел златен ланец со крст од еден оштетен, тргајќи му го од вратот. Потоа почнал да претура по полицата од дневната соба, ја отворил фиоката и одзел 2.500 денари. Така осомничениот се стекнал со вкупна противправна имотна корист во износ од 11.500 денари, по што веднаш се дал во бегство.
Имајќи предвид дека станува збор за странски државјанин без регулиран престој во државава, јавниот обвинител оцени дека постои опасност од бегство и до Судот достави предлог за определување мерка притвор.