Претседателот на Собранието на Република Северна Македонија, Африм Гаши, денеска оствари средба со претседателот на Големото национално собрание на Туркије, Нуман Куртулмуш, кој претстојува во возвратна официјална посета на земјава со група пратеници. На средбата присуствуваа пратениците: Бејџан Иљас, претседател на Пратеничката група за соработка со Парламентот на Република Туркије, Никола Мицевски, Фатмир Битиќи, Мевмед Џафери и Мерита Колчи Коџаџику, членови на Групата и генералната секретарка, Марина Димовска.

Претседателот Африм Гаши изрази задоволство од реализирањето на возвратната посета на претседателот Нуман Куртулмуш, која се совпаѓа со одбележувањето на 21 Декември, Денот на наставата на турски јазик во земјава. Тој нагласи дека турската зедница е консткруктивен дел од општественото ткиво на Република Северна Македонија и клучен фактор за соживотот во земјата.

Претседателот на Собранието нагласи дека Република Северна Македонија и Република Туркије негуваат силно традиционално пријателство и партнерство, а меѓусебната соработка е динамична на сите нивоа и особено на парламентарно ниво. Тој изрази уверување дека средбите меѓу пратениците од двете собранија во голема мера може да придонесат за натамошно унапредување на одличните билатерални односи меѓу Република Северна Македонија и Република Туркије.

Гаши изрази благодарност за целокупната поддршка што Република Туркије ѝ ја пружа на Република Северна Македонија уште од независноста и нагласи дека Туркије меѓу првите држави ја призна нашата земја и прва отвори амбасада и назначи амбасадор во Скопје.

Претседателот на Собранието на Република Северна Македонија се осврна на и економската соработка меѓу двете земји, при што посочи дека Република Туркије е меѓу нашите најзначајни трговски партнери и континуирано инвестира во нашата економија.

Претседателот на Големото национално собрание на Туркије, Нуман Куртулмуш, изрази задоволство од развојот на билатералните односи меѓу Република Туркије и Република Северна Македонија и нагласи дека двете земји земји ги поврзува историско и длабоко вкоренето пријателство. Тој изрази задоволство што присуството на претседателите на Големото национално собрание на Туркије на одбележувањето на 21 Декември во земјава веќе прераснува во традиција.

Куртулмуш нагласи дека Република Туркије силно ја поддржува европската интеграција на Република Северна Македонија и изрази надеж дека двете земји заеднички ќе го заокружат овој процес.

Во врска со економската соработка меѓу двете земји, Куртулмуш изрази задоволство од зголемувањето на трговската размена и присуството на турските компании во земјата, особено во инфраструктурните проекти.

Гаши и Куртулмуш нагласија дека високо ја вреднуваат успешната соработка во рамките на НАТО и заедничкото учество во мировни операции, како и воената соработка меѓу двете земји, а пред сè во областа на воената обука и едукација и донациите на опрема за потребите на нашата Армија. Изразија задоволство и за активностите на Агенцијата за соработка и координација на Република Туркије – ТИКА, Фондацијата „Маариф“ и Инстититутот Јунус Емре во Република Северна Македонија.

Соговорниците се осврнаа на потребата за ревидирање и надградба на билатералниот „Договор за слободна трговија“ меѓу двете земји, во насока на поголема либерализација на трговските производи. Истовремено, нагласија дека постојат големи можности за натамошно унапредување на меѓусебната соработка во полето на културата, образованието, туризмот и други области од заеднички интерес.

Претседателите на две собранија разменија мислења и за актуелните случувања во регионот и во светот и ја нагласија потребата за мир, безбедност и стабилност.

На крајот од средбата, Гаши и Куртулмуш изразија уверување дека долгогодишното партнерство меѓу двете држави и позитивниот тренд во развојот на билатералните односи и соработката и натаму ќе се унапредуваат.

Пензионерите со пониски примања ќе добијат финансиска поддршка од општината. Ова беше побарано од нив, а усвоено од страна на градоначалникот Орце Ѓорѓиевски, на денес одржаниот втор Буџетски форум во насока на креирање на буџетот за 2025 година. На форумот, покрај пензионерите, присуствуваа претставници на граѓанските здруженија, млади и спортисти и тимот од раководители од општинската администрација. Беше договорено следната година да се реализира и проект за субвенционирање на возачките дозволи за матурантите, како и платена пракса за студентите, жители на оваа општина.

Во големата сала на Општина Кисела Вода, под слоганот „Мојот народ одлучува, буџет 2025“, се дадоа идеи од повеќе области, кои заеднички беа разгледувани од финансиски и технички аспект. Голем дел од нив беа прифатени, а сите присутни имаа можност да пополнат анкетни ливчиња за дополнителни предлози.

Претходниот ден беше одржан првиот форум, со претседатели на месните заедници, секретари и членови на одборите, со што беа опфатени различни целни групи за вклучување во процесот на буџетско планирање.

-Овие форуми се нашата можност, заедно и транспарентно, да ги поставиме приоритетите за развој на нашата општина. Слоганот на овие сесии е „Мојот народ одлучува, буџет 2025“. И тој не е само фраза, туку принцип на работа кој го следиме изминатите години. Секогаш сум нагласувал дека транспарентноста и директната комуникација со жителите се клучот за успехот. Затоа сум многу задоволен што досега реализиравме 95% од мојата четиригодишната програма, но исто така успешно завршивме и многу проекти кои не беа предвидени, но произлегоа токму од разговорите со вас. Сега е време повторно да го слушнеме вашиот глас и да ги вклучиме вашите предлози во новиот буџет. Оваа средба е шанса да создадеме план кој ќе ги одрази вашите потреби и желби. Од срце ви благодарам за вашата доверба, поддршка и активност. Продолжуваме заедно, со уште поголема посветеност, да ја правиме Кисела Вода уште подобро место за живеење-заклучи градоначалникот Ѓорѓиевски.

„СДС се виновни што Груби неказнето крадеше, сите знаеја дека краде, а никој не смееше да го санкционира“, рече денеска на прес конференција Бране Петрушевски, пратеник на ВМРО-ДПМНЕ.

„Жално е да се гледа како сега СДС од петни жили се обидуваат да смислуваат сценарија, кога тие додека делеа власт се плашеа да го спомнат Груби, а не пак да го повикаат на одговорност.

Иако сите знаеја за криминалот на Груби, иако и ВМРО-ДПМНЕ и медиумите ги прозиваа СДС како власт, тие не преземаа ништо, затоа што им беше единствено важно да останат на власт.

СДС свесно го оставија Груби да ја краде државата, за тие да продолжат да владеат ден повеќе.

СДС треба да излезат и да им се извинат на граѓаните, за тоа што молчеа додека Артан Груби правеше милионски криминал, а потоа не само што одмолчеа, туку и му се приклучија нивните функционери како Ковачевски.

СДС е до гуша во криминал, наместо евтини приказни, да почнат длабоко да се реформираат, зошто со криминалци во врвот на партијата тешко дека може нешто да очекуваат освен уште поголеми катастрофи“, истакна Петрушевски.

Утринава од опозициската СДСМ испратија соопштение во кое велат дека „власта го пушти Груби слободно да ја премине границата, за што постојат основани сомнежи дека станува збор за договор меѓу ДПМНЕ и ДУИ“.

„Бројните пропусти се само потврда за ова. Од дојавата дека е поднесена кривична пријава, преку поставување на мобилна патрола без никаква информација па се до поминувањето преку греничниот премин Блаце без проверка, дозволено од страна на лицето БЈ назначен од Тошковски.

Фатена во овој голем скандал власта прво се обиде кај батериите на камерите да ја префрли вината а сега лицитира каде се наоѓа Груби, дали е во Косово или Албанија.

Косовската граница е решето, отворена за бегање на криминалци.

Владините функционери наместо да лицитираат треба да понесат одговорност. За бегството на Груби, односно пуштањето надвор од границите на државата Тошковски веќе требаше да си поднесе оставка“, стои во соопштението на СДСМ.