Македонија
„Исклучувањето на Албанците продолжува со алармантно темпо, во Министерството за енергетика 18 Македонци, 0 Албанци“, велат од ДУИ

„Демократската унија за интеграција го изразува својот најдлабока загриженост за систематската дискриминација и исклучување на Албанците од државните и јавните институции во Република Северна Македонија. Последниот случај во Министерството за енергетика, каде од 18 нововработени нема ниту еден Албанец, е јасен доказ за постоење на однапред испланирана стратегија за поништување на државотворниот статус на Албанците во земјата“, велат од ДУИ.
„Ова не е изолиран случај. Станува збор за отворена и агресивна имплементација на план, усогласен меѓу двете македонски партии, посредуван од политичката олигархија уште од 2022 година. Целта е јасна: целосно маргинализирање на Албанците од државните и јавните институции, туркајќи ги на периферијата на политичкиот, административниот и економскиот систем.
Овој план се спроведува секојдневно, со забрзано темпо и синхронизирана динамика, исклучувајќи ги Албанците под изговор на „професионализам“ и „компетентност“, опасна наративa која се користи за враќање на едноетничка држава, спротивно на духот и буквата на Охридскиот договор.
Во овој проект за уривање на еднаквоста се вклучени и неколку албански вазали, кои во замена за привремени функции, легитимираат една од најслабите и етнички нелегитимни влади во 35-годишната историја на плурализам.
Денес, Албанците се непожелни во секоја институција, од енергетиката до правдата, од одбраната до јавната администрација.
ДУИ ја реафирмира својата непоколеблива заложба за заштита на колективните права на Албанците и на Охридскиот договор како темел на новиот општествен и институционален поредок во државата. Секој обид за уривање на тој поредок, преку судови, манипулирани конкурси или систематска дискриминација, ќе биде силно осуден и спротивставен политички, институционално и на меѓународен план“, соопштуваат ДУИ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Филипче: Немаме коалиција ниту со ДУИ, ниту со Левица

Не, ние немаме коалиција ниту со ДУИ, ниту со Левица. Но, се согласувам со премиерот кога вели дека граѓаните имаат две опции,“ истакна претседателот на Социјалдемократскиот сојуз на Македонија, Венко Филипче, во одговор на новинарско прашање.
„Едната е напредна, проевропска опција, која нуди чесни и добри кадри, луѓе кои покажаа како се работи за доброто на граѓаните, а тоа е СДСМ. Другата е ВМРО-ДПМНЕ, кои се служат со лажни кампањи, со лаги и клетви, и кои докажаа дека се неработници. Тие го блокираа и го запустија Скопје,“ нагласи Филипче.
Претседателот на СДСМ, Филипче, порача дека на следните избори граѓаните ќе одлучуваат помеѓу чесно и одговорно водење или враќање во времето на лаги, блокади и застој под раководство на ВМРО-ДПМНЕ.
Македонија
(Видео) Филипче: Правда за Кочани нема да има, власта ги штити своите функционери

Претседателот на Сoцијалдемократскиот сојуз на Македонија, Венко Филипче, денеска во одоговор на новинарско прашање поврзано со новите откритија на Истражувачката репортерска лабораторија (ИРЛ), за трагедијата во Кочани, изјави дека се потврди она што и СДСМ го зборувало во јавноста дека власта направила сѐ за да си ги заштити своите функционери.
„Ние изминатиот период видовме дека оваа власт направи сѐ да заштити свои функционери во истрагата за Кочани и еве сега гледаме дека практично тие биле многу чести гости и привилегирани гости на таа дискотека“, изјави Филипче.
Тој потенцираше дека токму поради јавните настапи и прес-конференции на СДСМ биле обелоденети значајни информации и факти, кои инаку не би биле дел од официјалната истрага.
„Да не беа нашите прес-конференции во коишто обелоденувавме многу работи и факти огромен дел и од тие што беа опфатени немаше да бидат опфатени со истрагата. Жалам што морам да констатирам дека вчера мислам дека го видовме најгрдото лице на оваа власт“, истакна Филипче.
Тој додаде дека СДСМ останува посветен на барањето за целосна, независна и неселективна истрага, со цел да се утврди вистинската одговорност и да се обезбеди правда за жртвите и граѓаните.
Македонија
Гаши на средба со в.д. амбасадорот на Катар

Претседателот на Собранието, Африм Гаши, денеска оствари средба со Рашид Бин Саид Ал-Хајарин, вршител на должност амбасадор на Државата Катар.
Претседателот Гаши потенцираше дека особено ја цени улогата на парламентарната дипломатија, клучен механизам за продлабочување на билатералните односи, и затоа ја реафирмираше потребата од поблиска соработка меѓу Собранието на Република Северна Македонија и Советот на Шурата на Државата Катар.
Во текот на разговорот, Гаши го осудил неодамнешниот напад на Доха и истакнал дека оваа недозволива акција е кршење на територијалниот интегритет и суверенитет на Катар.
„Ваквите милитантни дејствија треба да бидат осудени од целиот демократски свет затоа што ризикуваат да ја ескалираат ситуацијата во регионот и да ги поткопаат напорите за постигнување на прекин на огнот во Газа“, рече Гаши.
Рашид Бин Саид Ал-Хајарин истакна дека во иднина очекува акцентот на билатералните односи меѓу Република Северна Македонија и Државата Катар да биде ставен на унапредување на економската соработка, како и зајакнување на парламентарната допломатија.
Двајцата соговорници искажаа големо задоволство од средбата и истакнаа дека очекуваат пријателството и соработката што постојат меѓу двете земји во иднина уште повеќе да се зајакнуваат и унапредуваат.