Македонија
Историската комисија со Бугарија беше злоупотребена за партиски цели и интереси во двете земји, велат поранешните членови

Поранешни членови на македонскиот тим во комисијата за историски прашања помеѓу Македонија и Бугарија, до медиумите испратија став поради, како што велат, неоснованите изјави на премиерот и претставници на Владата поврзани со нивната работа. Ова се случува откако Владата го промени составот на македонскиот тим во Комисијата за историски и образовни прашања со Бугарија.
Ставот на поранешните членови го пренесуваме во целост:
„1. Работата во Комисијата, која е експертско, а не политичко тело, за нас беше можност да се помогне во надминување на проблемите кои постојат помеѓу двете држави. Но, поради документите усвоени од страна на Владата во Софија (рамковната позиција и објаснувачкиот меморандум), неодговорното однесување на политичарите во двете држави, како и поради неодговорните и политизирани изјави на некои од колегите во бугарскиот дел од Комисијата и политички мотивираното заминување на новиот копретседател од македонска страна, таа беше злоупотребена за политички и партиски цели и интереси во двете земји. Во јавноста се наметна уверувањето дека Комисијата треба да биде тело во одбрана на „националните интереси“, докажување на „историски вистини“ и решавање на историографски прашања. Идејата дека Комисијата преку позитивните примери на слични комисии во Европа треба да помогне да се дојде до ослободување на наставата по историја од идеолошки и националистички влијанија кои очигледно ги држат во заложништво граѓаните и граѓанките на двете држави, беше целосно игнорирана.
2. Дел од политичарите и од интелектуалците, а посебно историчарите, од лукративни и политички причини, но и од незнаење, ја прифатија реториката и пристапот на бугарската страна со што во јавноста, без никакви аргументи, беше наметнат впечаток дека Комисијата дискутира за идентитетот и дека прави ревизија на македонската историографија. На тој начин, нашето општество наивно влезе во стапицата на националистите во Бугарија и нивната намера да наметне дискусија за овие прашања низ призма на политички интереси. Со тоа, всушност, ја пропуштаме шансата да се отвори сериозна академска дебата во која ќе може отворено да дискутираме за минатото и надвор од влијанијата на политички групи кои изминатите децении профитираа од злоупотреба на историјата. Да се дебатира отворено е очигледно тешко за дел од македонската интелектуална јавност.
3. Во минатото Комисијата беше постојана мета на политички мотивирани напади од бројни медиуми и политички партии и нејзината работа беше искористена за остварување политички цели. Тие напади продолжија до денес, а минатите неколку недели бевме сведоци на неаргументирани, обвинувачки и навредливи изјави на премиерот за работата на поранешните членови на Комисијата со кои тој ги дели граѓаните на „заштитници“ и „незаштитници“ на националните интереси согласно со неговите лични погледи. Уште пострашно е што премиерот свесно испраќа авторитарна и заканувачка порака дека оној што нема да ги исполнува неговите очекувања и политички погледи ќе биде етикетиран дека не ги штити националните интереси. Тоа е неодговорно и несериозно и за еден премиер и за еден професор. Со иста порака е и коментарот на министерот за надворешни работи и надворешна трговија од 5.9.2024 г., со кој Комисијата ја прогласи за политичко тело кое треба да штити стратешки надворешно политички позиции. На тој начин министерот кажа дека историјата и науката ќе бидат во служба на политичките позиции на Владата, а не на научните и академски принципи. Тоа е позиција која ја посакува токму официјална Софија, односно за историјата да се дискутира низ призма на политиката, а притоа сета одговорност за таквиот пристап да е на македонска страна.
На иста линија со изјавите на премиерот и неговите министри, во јавноста се објавија текстови кои се „обидуваат“ да ја дообјаснат политичката одлука на Владата со манипулации и невистини дека Комисијата „произвела“ два протоколи кои, всушност, се усвоени од Владите на двете држави; дека членовите на Комисијата на 15. средба на која не е донесена никаква одлука, наводно, отстапиле од македонските црвени линии усвоени во Собранието во јули 2021 г., итн. Ваквата безобѕирна пропаганда која е далеку од професионалното и одговорно информирање, всушност, придонесува уште повеќе за поделба на македонското општество.
4. На крајот, имајќи ја предвид сегашната состојба, неопходна е промена на методологијата во работата на Комисијата и вклучување експерти од УНЕСКО, Советот на Европа или ОБСЕ, нешто што ние го баравме постојано од првата средба на Комисијата која се одржа на 2 и 3 јули 2018 г. На тој начин ќе се создадат услови негативните политички влијанија да се тргнат настрана од работата на Комисијата“, се вели во нивниот став.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Тренчевска побара оставка од Таравари: Знаете ли што се случува во здравството, или поважни ви беа калкулациите за локалните избори и прашањата за химната и грбот

Пратеничката на СДСМ Јована Тренчевска од собраниската говорница, во рамките на седницата за пратенички прашања упати прашање до министерот за здравство Арбен Таравари, во врска со бројните скандали во здравството и здравствениот систем кој, како што оцени е пример за хаос, неизвесност и страдање на пациентите.
„Наместо функционален и стабилен здравствен систем, столб на сигурност, нашиот здравствен систем е пример за хаос, неизвесност и страдање на пациентите.
За 10 месеци оваа Влада и министерот за здравство Таравари, го доведоа до степен на „тешко болен пациент, на кој му нема спас“. Секој сектор од здравството е метастазиран од неспособноста и негрижата на власта, а граѓаните со здравјето го плаќаат цехот“, вели Тренчевска.
Наместо систем кој треба да се грижи за здравјето на граѓаните и да лекува, имаме систем, додава Тренчевска, кој го става во ризик животот на луѓето, систем кој убива.
„Министре Таравари, поважни ви беа бизнис интересите отколку вистинските инвестиции во интерес на граѓаните. Единствениот проект што го најавивте е најкриминалниот и скандалозен тендер за паркингот на клинички со компанијата Ѓока. Наместо реформи и подобри здравствени услуги, сведоци сме на тотален хаос, хуманитарни катастрофи, кои за жал станаа секојдневие. Речиси и да нема клиника која не се соочува со некаков проблем, дали е тоа терапија, опрема, персонал. Нема пациент кој не минува низ голгота кога му е потребна здравствена помош“.
Го праша Таравари дали знае што се случува во здравството.
„Или периодов поважни ви беа калкулациите за локалните избори и решавањето на наводно отворените прашања за химната и грбот, а дури потоа фокусирање на проблемите како економијата, платите и здравството. Тоа е доказ за вашата, а и на целата Влада, незаинтересираност и рамнодушност кон сопствениот народ. За оваа хуманитарна катастрофа мора да има одговорност.
Моето прашање до вас министре Таравари е: Дали чувствувате одговорност за голготата што ја поминуваат пациентите заради нефункционалниот здравствен систем и дали ќе си поднесете оставка за сите скандали во здравството“, го праша Тренчевска Таравари.
Македонија
(Видео) Цветков до Дурмиши: Граѓаните живеат тешко, зошто не ја зголемите минималната плата на 30.000 денари

Пратеникот на СДСМ Борче Цветков на денешната собраниска седница посветена на пратенички прашања, упати прашање до министерот за економија и труд, Бесар Дурмиши, во врска со новата пресметка за трошоците за таканаречената просечна кошница и промашените мерки на владата за креирање економски политики, кои доведуваат до економска стагнација и влошување на животниот стандард на граѓаните.
„Заглавена економија, урнисан животен стандард – ова е денешната реалност по 10 месеци од оваа Влада. Македонската економија е далеку од брзо-растечка, а животот на граѓаните не е ни малку лагоден. 10 месеци сме сведоци на погрешни политики кои резултираа со економска стагнација и животен стандард кој од месец во месец се влошува. Како Влада, не исполнивте ниту едно ваше ветување. Демонстриравте тотална незаинтересираност, покажавте тотална неспособност за креирање на економски политики“, рече тој.
Мерките како што додаде не само што не дале конкретни позитивни ефекти, туку уште повеќе го влошиле животот на граѓаните.
„И сами го признавте дебаклот на вашата есенска, па потоа и новогодишна кошница. Застанавте на страната на елитата, наместо во заштита на граѓаните. И последната повторно задоцнета мерка за замзрнување на маржата на 10% не ги даде очекуваните резултати за намалување на цените.
Синдикалната кошница месецов достигна нов рекорд – на граѓаните им се потребни 836 денари повеќе од март за да можат да ги покријат основните потреби. Или, едно четиричлено семејство треба да има вкупен семеен буџет од 62.700 денари за да може да го преживее месецот“.
Според Цветков, семејниот буџет на граѓаните е на минимум, а притисокот од цените расте. Додава дека ниту три минимални плати не се доволни за покривање на основните животни потреби.
„И јасно е зошто сега планирате нова пресметка на трошоците за основните потреби и под ново име – „просечна кошница“. Нема веќе да е четричлено семејство туку ќе биде тричлено, кое ни оддалеку не се како во реалноста. Според вашите пресметки семејниот буџет може да се користи само за храна и сметки и сево ова е е резултат на вашата незаинтересираност на немањето визија за социјален и економски напредок на државата.
Дали ќе се откажете од новата пресметка за трошоците за таканаречената просечна кошница, а наместо тоа ќе ја зголемите минималната плата на 30.000 денари?“, го праша Цветков Дурмиши.
Македонија
Aнгелевска до Мицкоски: Кога може да очекуваме реформи во правосудството, иако изгласавме интерпелации за судии тие продолжија да си работат

„Првото прашање се однесува на минималната плата и она што некои од синдикатите го бараат, односно минимална плата од 500 евра и изјавуваат дека не се задоволни со сегашното покачување на минималната плата. За јавноста концептот на минимална плата е донесен во 2012 година, а во 2022 година е донесен посебен Закон за минимална плата, со кој што се утврдува еднаш во годината во месец март, да се пресметува минималната плата во висина од 50% од просечната исплатена плата и 50% од трошоците за живот од минатата година и според еден член од законот не смее да биде помала од 57% од просечната плата. Согласно последното законско усогласување во март, минималната нето плата во Република Македонија изнесува 24.379 денари, 36.037 денари бруто. Покачувањето е негде за 1.812 денари. Од една страна, некои од синдикатите го имаат тоа барање, од друга страна според Организацијата на работодавачи, минималната плата треба да се покачува со пораст на продуктивноста, потреба за поголем обем на рбаота, вложување во инвестиции, поголем извоз итн. Моето конкретно прашање на оваа тема ќе биде, кој е вашиот став во однос на барањето на синдикатот за зголемување на минималната плата“, истакна пратеничката од редовите на ВМРО-ДПМНЕ, Силвана Ангелевска на денешната собрнаиска седница за пратенички прашања.
Ангелевска постави дополнително уште две пратенички прашања кои се однесуваа до претседателот на Влада. Второто прашање се однесуваше на потрошувачката кошница, односно како економските мерки кои што ги спроведе Владата за замрзнување на цените, влијаеле на трошоците за храна. Трето прашање кое го постави Ангелевска е поврзано со правосудниот систем и како претседателот на Влада ја коментира работата на Судскиот совет.
„Третото прашање е од правосудниот систем. Тоа е казната која што беше изречена за младата Теодора и пресудата која што ја изрече Основиот суд во Тетово од две години затвор, вие премиере јавно реагиравте на таквата одлука на Основниот суд во Тетово. Фамозниот Судски совет излезе со изјава дека на некој начин ја оправдува таа пресуда од две години од Основниот суд. Моето прашање е во врска со Судскиот совет. Низа на скандали, доверба на народот од 2% во судско-обвинителскиот систем. Почнувајќи од една изјава на една членка, која што се уште е член на Судскиот совет, која изјави дека си дава оставка како претседателка на Судски совет, заради притисок од бизнис политички елити. Понатаму, имавме избор на претседателка која де факто е советник, нејзино разрешување, низа на скандали. Ова Собрание, телото кое предлага пет од членовите во Судскиот совет изгласа недоверба, имавме интерпелации поединечно за членовите на Судски совет, меѓутоа тие не сметаа дека е морално да си поднесат оставки, и еве до ден денес си седат и донесуваат одлуки, вакви какви што донесуваат. Вие споменавте во медиумите дека најитни реформи се реформите во судството, без тоа другите реформи се бесмислени. Моето конкретно прашање е како вие ја коментирате работата на Судскиот совет и дали малата казна за Теодора ја сметате како една од причините за итно раззрешување на членовите на Судски совет“, праша Ангелевска.