Македонија
Истрагата за пожарот во „Пулс“ проширена на уште 19 лица: министри, инспектори, директори меѓу новоосомничените

Основното јавно обвинителство Кочани денеска донесе Наредба со која ја прошири истрагата во врска со пожарот во кочанската дискотека „Пулс“ на нови 19 лица. Сите тие се осомничени за Тешки дела против општата сигурност од член 292 во врска со член 288 од Кривичниот законик.
Станува збор за службени лица, кои во периодот од 2012 година до 16.03.2025 година, заеднички но секој од аспект на своето својство, надлежности и одговорности, воопшто не постапиле според прописите за мерките за заштита и со тоа предизвикале опасност за животот и телото на луѓето и имот од големи размери. Меѓу новите осомничени се овластени градежни инспектори во Општина Кочани, директори и генерален инспектор од Дирекцијата за заштита и спасување, министри за економија, државни секретари и други службени лица од тоа министерство, како и инспектори од Државниот пазарен инспекторат.
Постојат сомненија дека нивните незаконити дејствија и пропусти во континуитет довеле до тоа кабаре КЛУБ ПУЛС во Кочани од самиот почеток во подолг временски период па се до настанување на пожарот да продолжи да врши угостителска дејност без воопшто да исполнува законски услови за тоа и со нарушување на сите безбедносни правила по животот на лицата кои го посетувале објектот. Како резултат на тоа, при користење на пиротехнички средства на 16.03.2025 година за време на настапот на музичката група ДНК, бил предизвикан пожар во кој настапила смрт на 61 лице меѓу кои 6 деца, а биле повредени уште 197 лица од кои 25 деца.
До крајот на денов, Основното јавно обвинителство Кочани до Основниот суд во Кочани ќе достави предлози за определување соодветни мерки за обезбедување на присуството на секој од новоосомничените.
Со ова, до овој момент, кочанското обвинителство во врска со пожарот поведе истрага против вкупно 45 физички и три правни лица. Еден од нив, по отворањето на истрагата почина како последица на повредите здобиени во пожарот и од тие причини, по целосно прибавување на медицинската документација, постапката за него ќе биде запрена.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Мицкоски од Штип: Продолжуваме да испорачуваме проекти за граѓаните за подобар живот

Премиерот Христијан Мицкоски денеска им честита на градоначалниците за работата и за резултатите кои, како што рече, ги испорачуваат на граѓаните во општините во кои што се градоначалници и Штип и Карбинци.
„Истовремено, им честитам и на советите и на администрацијата што ја следат работата на градоначалниците и убеден сум дека во годините кои што следат ќе испорачаме уште многу резултати насекаде низ целата територија на Македонија, во сите општини, затоа што наш приоритет претставува квалитетот на живот на нашите граѓани. И без разлика дали се тоа општини каде што има градоначалник од редовите на владејачкото мнозинство или пак од опозицијата или пак некој независен градоначалник, оваа Влада е посветена целосно на овие речиси 26.000 квадратни километри на секое парче да инвестира“, рече Мицкоски.
Премиерот се заблагодари и на колегите од Владата за „неуморната работа, за енергијата, за ентузијазмот, за инспирацијата која што ја имаат и проектите што ги реализираат. Не само на централно ниво, туку и, помагајќи ги општините, на локално ниво“.
„Знам дека уште многу убави работи во периодот што следи ќе објавивме заедно за граѓаните, а посебно за Штип и општините околу Штип. Така што со несмалена динамика продолжуваме да испорачуваме.
Голема благодарност и до пратениците во македонското Собрание кои што навистина со својата работа исто така инспирираат, работат, се борат за своите општини, за проект повеќе. И убеден сум дека една ваква хармонија на локално, на централно ниво и во рамките на Парламентот со огромното мнозинство коешто го има оваа влада, ќе продолжи и во иднина и ќе испорачаме за доброто на сите граѓани, за подобар живот. Впрочем, тоа беше и нашата цел, еве речиси една година од изборите, да биде Македонија повторно на граѓаните. И мислам дека до сега успеваме да ја вратиме“, изјави Мицкоски.
Македонија
(Видео) ВМРО-ДПМНЕ не го спроведува Законот за македонски јазик, велат од СДСМ

„Денеска одбележуваме 80 години од историскиот момент на кодификацијата на македонскиот јазик – темелна вредност на нашиот идентитет, култура и државност. Тоа е делото на Блаже Конески, но и многу други значајни великани. Им оддаваме почит и го пренесуваме амананетот за негова заштита, промоција и унапредување од генерација на генерација“, рече Маја Серафимовска Борозан од СДСМ.
„За жал, токму денес, сведоци сме на игнорантски однос од актуелната власт предводена од ВМРО-ДПМНЕ која веќе 9 месеци не спроведува ниту една одредба од Законот за употреба на македонскиот јазик.
Инспекторатот за употреба на македонскиот јазик не може да функционира затоа што се уште не е усогласен со законот за инспекциски надзор. Нема вработени инспектори, само партиска директорка од редовите на ВМРО-ДПМНЕ и толку.
Нема нови вработувања ниту на лектори, нема ниту стипендии за ученици и студенти.
Прекинат е дури и конкурост „цртај на македонски јазик“ што успешно се реализираше 3 години.
СДСМ во изминатите години презеде конкретни чекори за заштита и унапредување на македонскиот јазик.
Македонскиот јазик стана официјално признат во светот, но и рамки на ЕУ преку Договорот со ФРОНТЕКС. Обезбедивме буџетски средства за дигитализација на картотеките во Институтот за македонски јазик – 5 милиони записи се трајно заштитени. Го дигитализиравме Толковниот речник и Правописот, правејќи ги достапни за сите граѓани.
За првпат по 24 години, вработивме научници во Институтот за македонски јазик. Донесовме Закон што предвидува вработување лектори во сите институции и задолжително лекторирање на официјалните документи. Тоа се конкретни дела за македонскиот јазик.
Министерот Љутков покажува ограмна неспособност.
На овој значаен ден, СДСМ ја повикува Владата веднаш да ги спроведе сите законски обврски од Законот за употреба на македонскиот јазик. Отворањето на Инспекторатот, вработувањето на лектори и обезбедувањето стипендии не се прашања на партија, туку прашања на национална должност.
Македонскиот јазик заслужува државна грижа, а не партиски заборав“, изјави проф Маја Серафимовска Борозан од СДСМ.
Македонија
Мицкоски му даде две опции за избор на Таравари, да остане во Влада или да оди со ДУИ: Во политиката образот или го имаш или го немаш

Премиерот Христијан Мицкоски денес во Штип потврди дека попладнево ќе се сретне со лидерот на едно крило од Алијанса за Албанците и актуелен министер за здравство Арбен Таравари. На средбата премиерот очекува Таравари да каже дали ќе остане во Владата или ќе оди со ДУИ, оти според него, трета опција нема.
„По мене, има две опции за избор. Едната опција е оваа која што ја нуди оваа Влада на реформи, на промени, на испорака за граѓаните и втората опција е онаа опција која што години наназад, би рекол повеќе од две децении, ја криминализираше државата, ги уништуваше институциите и практично ја клекна државата и граѓаните. Тоа е изборот, нема трета опција. Би сакал да слушнам од господинот Таравари која опција е за него, бидејќи јас не гледам трета опција. Што се однесува до моите лични односи со господинот Таравари, ние во политиката комуницираме долго време. Како за човек имам позитивно мислење за господинот Таравари, но во политиката образот е нешто што го имаш или го немаш, тука нема флуидни варијанти. Или имаш или немаш или држиш до зборот или не држиш до зборот“, рече премиерот Мицкоски.
Неколкупати досега Мицкоски рече дека лично покажал дека држи до зборот што го дава оти го поддржал Таравари дури и во моменти кога во партиското раководство имало дилема.
„Заткулисни игри се провидни игри, лесно се идентификуваат и препознаваат и најчесто ваквите заткулисни игри им се удираат од глава на оние кои ги прават. Никого во животот не сум го молел, ниту пак имам намера некого да молам. Со или без господинот Таравари, Владата е стабилна, цврста и со големо мнозинство. Останува на него и на неговите сопартијци да одлучат дали ќе одиме заедно по патот на реформи, владеење на право, борба за праведно општество, институции кои ќе функционираат или ќе се придружат и ќе коалицираат со оние политички сили кои со години, би рекол неколку децении ја криминализираа и ја уништија државата. Изборот е нивен“, рече премиерот Мицкоски.
Средбата ќе биде денес во 17 часот во Владата. Откога не прифати и неговата партија да остане во Вреди која прерасна во еден политички субјект, коалиционите партнери кои го донесоа на власт Таравари почнаа да го обвинуваат дека преговара со ДУИ за претстојните локални избори. Таравари, пак, кажа дека на изборите оди со сопствени листи за советници, а најверојатно ќе оди и со сопствени кандидати за градоначалници.