Македонија
Кадрите на Села и Ахмети печалеле од бизниси со коцкарници, обвини „Вреди“ и најави дека ќе обелодени повеќе случаи на корупција

Коалицијата „Вреди“ соопшти дека стартува со серија прес-конференции со кои на јавноста ќе и предочат информации за политичка корупција, во режија на истакнати кадри на Европскиот Фронт на чело со Али Ахмети и Зијадин Села.
Од коалицијата посочија дека станува збор за сериозни скандали, кои меѓу другото ќе покажат со кои методи за остварување политичко влијание се служеле ДУИ и Артан Груби како непосреден извршител на сите сценарија за политичка корупција.
„На оваа прес конференција ќе објавиме информации за тендерите кои ги добила фамилијарно поврзаната фирма со пратеникот на Европскиот Фронт, Елми Азири, кој беше еден од најгласните поддржувачи на коалицијата на Зијадин Села со Али Ахмети. Артан Ајрули фигурира како сопственик на фирмата РИТРОН КОПИ ДООЕЛ, увоз-извоз Куманово, кој е внук на сопругата на Елми Азири. Оваа фирма во текот на 2022 година, во само три месеци има добиено две јавни набавки во Државна Лотарија каде директор беше Прпарим Бајрами, десна рака на Артан Груби. Набавките се однесуваат на набавки на компјутерска опрема, графички и ТВ станици за извлекување лотарија и телевизори за инсталација на електронски игри. Вкупната вредност само на овие две набавки преку Државна Лотарија, заедно со анексите, изнесуваат околу 3 милиони денари“, соопшти „Вреди“.
Напоменуваат дека ова се информации само од една институција.
Овие скандалозни информации, велат од „Вреди“, се директна потврда дека ДУИ владеел како криминална организација во чија мрежа се фаќале оние кои политиката ја доживуваат како можност за лично и богатење на нивните фамилии.
„Забележете ја иронијата! Кадрите на Зијадин Села и Али Ахмети кои преку ден лажно ги бранат граѓаните од коцката, печалеле токму од бизниси со коцкарници. Претседателот на огранокот во Боговиње, Сафет Мифтари е уапсен за организирање криминално коцкање преку интернет, фамилијарно поврзаната фирма на пратеникот Елми Азири, добивала тендери од Државна Лотарија. Едвај чекаме Европскиот Фронт конечно да излезе на мегдан со своето членство“, додаваат од „Вреди“.
Коалицијата заклучува дека ДУИ оставиле илјадници луѓе без решен професионален статус, за предизборно да ги уценуваат за гласови, додека функционерите грабале се што ќе им дошло до рака.
Партијата најавува одговорност.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Филипче: ВМРО-ДПМНЕ ја носи државата во економска и општествена бездна! СДСМ ќе се бори за враќање на довербата

Претседателот на СДСМ, Венко Филипче, во гостувањето во „Тема на денот“ на Сител Телевизија порача дека судот за тоа дали тој ќе успее да ја направи СДСМ повторно победничка партија ќе го дадат граѓаните. Тој нагласи дека неговата задача е да ја консолидира партијата и да продолжи по започнатиот пат на обнова.
„Сè уште има многу простор за работа, а ние сме решени да продолжиме, не само во пресрет на локалните избори, туку и во следните години“, истакна Филипче.
Тој потенцира дека СДСМ никогаш не се борела за власт по секоја цена, туку за доверба што ќе им овозможи да работат во интерес на граѓаните.
Филипче упати сериозни критики кон актуелната власт предводена од ВМРО-ДПМНЕ, укажувајќи на неконтролираниот раст на цените, стагнацијата на платите, намалениот животен стандард и доцнењата во исплатата на плати и ДДВ за компаниите.
„Живееме во време на тешка економска и општествена криза. Владата е неспособна да ги реши проблемите што граѓаните секојдневно ги чувствуваат. Платите не се зголемуваат, а во многу институции дури и не се исплаќаат навреме“, рече Филипче.
Дополнително, тој ја обвини власта за груба партизација на институциите, каде, како што тврди, неподобните кадри се казнуваат со прераспоредување на работни места далеку од своите домови.
„Ако не сте член на ВМРО-ДПМНЕ или партија од владејачката коалиција, бидете сигурни дека ќе ве преместат да работите 100 километри подалеку“, предупреди лидерот на СДСМ.
Според него, владата ја прикрива тешката состојба преку силна пропаганда, но реалноста на граѓаните е сурова.
„Од плата до плата се живее максимум до 10–15-ти во месецот, потоа почнува вистинската борба за опстанок“, подвлече Филипче.
Тој порача дека токму поради оваа состојба, СДСМ има уште поголема обврска да работи, да ја зацврсти својата структура и да ја врати довербата на граѓаните.
Како што истакна Филипче во интервјуто, општините под раководство на СДСМ се запоседнати од инспекции.
„Ние имаме 17 градоначалници и сите можни инспекции се во општините во пресрет на локалните избори. Од Управата за јавни приходи, организиран криминал, различни други институции коишто се под Министерството за внатрешни работи”, потенцира Филипче.
Како што додаде тој, тоа се случува исклучиво во општините кои се раководени од луѓе од СДСМ, а не и во другите општини каде што има градоначалници на ВМРО-ДПМНЕ.
Македонија
УХМР предупредува на пороен дожд, грмежи и можна појава на град

Попладневниот развој на нестабилна облачност донесе пороен дожд, грмежи и засилен ветер во западните планински предели, Охридско-Преспанскиот регион и Пелагонија. Локално имаше и услови за појава на град, информираат од Управата за хидрометеоролошки работи (УХМР).
До крајот на денот, нестабилното време ќе продолжи со променлива облачност, пороен дожд и грмежи на повеќе места низ државата, а ќе дува и засилен ветер.
Според прогнозите на УХМР, и утре времето ќе биде слично – променливо облачно со повремени врнежи од дожд и грмежи. На одредени места се очекуваат и поинтензивни процеси во форма на невреме, со обилен дожд, силен ветер и можност за изолирана појава на град. Минималните утрински температури ќе се движат меѓу 4 и 10 степени, а максималните дневни ќе достигнат од 15 до 23 степени.
Во Скопје, попладнето ќе донесе нестабилност со локални поројни врнежи и грмежи, проследени со засилен ветер и услови за појава на град. Температурите во главниот град ќе се движат од 9 до 23 степени.
Од УХМР најавуваат дека променливото и посвежо време ќе продолжи и во следните денови, со повремен локален дожд. Сепак, од вторник се очекува стабилизирање на временските услови, претежно сончево време со пониски утрински температури, а дневните ќе бидат во постепен пораст.
Македонија
(Видео) Родителите на настраданите во „Пулс“: Сакаме правда, нема да молчиме пред криминалот

Со силни емоции и гнев, родителите на младите кои го загубија животот во пожарот во дискотеката „Пулс“ одржаа уште еден протестен марш под мотото „Задоцнета реакција“ во Кочани. На четвртиот собир по трагедијата, тие порачаа дека ќе ја продолжат битката за правда и нема да дозволат виновниците да останат неказнети.
Од Паркот на Револуцијата, низ улиците на градот, учесниците носеа пораки против корупцијата и ја повикаа државата конечно да го пресече синџирот на криминал и да застане на страната на правдата.
„И врапчињата знаат за криминалот што се шири кај нас. Ние нема да застанеме додека не излезе вистината на виделина“, изјавија родителите.
На протестот, пред зградата на Општина Кочани, каде се сместени повеќе инспекциски служби, родителите и граѓаните поставија директни прашања:
„Дали ви треба дополнителна обука за да знаете што е ваша работа? Децата ни загинаа затоа што институциите заспаа!“, порачаа гневно.
Пред Полициската станица во Кочани, присутните упатија остри критики кон Министерството за внатрешни работи, обвинувајќи ги дека не презеле ништо за да спречат криминални активности во дискотеката „Пулс“.
„После трагедијата дознавме дека таму се продавала дрога. Дали свесно гледавте настрана? Дали нечии профити беа поважни од животите на нашите деца?“, прашаа родителите.
Маршот продолжи кон Основниот суд и Обвинителството, каде родителите побараа брза и вистинска правда.
„Дали животите на нашите деца вредеа толку малку што дозволувате виновните да шетаат слободни? Дали нивната слобода се купува со пари?“, прашаа емотивно родителите.
Протестниот марш заврши таму каде што и почна – во Паркот на Револуцијата. Родителите порачаа дека нема да престанат со борбата за своите деца:
„Ова е само почеток. Ќе не гледате повторно, посилни, погласни и побројни. За нашите деца, за нивната украдена младост, за нивните соништа!“, порачаа организаторите.