Македонија
МРТ лани потрошила 6 милиони евра, извештајот поднесен до пратениците

Македонската радио-телевизија во изминатата година потрошила над 6 милиони евра, ова е наведено во извештајот на МРТ, кој се најде пред пратениците за годишната работа, во кој се истакнува дека за оваа сума успешно е спроведена програмата до гледачите.
МРТ без сериозна анализа, со голи бројки и набројувања во годишниот извештај за 2017 година, се пофали дека е јавен радиодифузен сервис кој успешно ја реализирал задачата. Извештајот за тоа колку е потрошено, што и како се работело, е испратен до Собранието, каде што пратениците треба да го усвојат.
Освен набројување, во извештајот нема ниту збор за тоа колку МРТ навистина ги исполнува задачите на јавен сервис, чија задача е да образува, информира и забавува, како и тоа дека е јавен сервис за сите граѓани, без разлика на политичката припадност.
Бројот на вработени луѓе во јавниот сервис изнесува 845 лица, од кои сè уште повеќето се со средна стручна спрема. За тоа колку надворешни соработници има во МРТ кои реализираат копродукциски емисии, во извештајот нема информација.
Според оценките на експертите, МРТ особено во посочениот период не беше на висината на задачата. Во извештајот раководството заборавило да го спомене навивачкото известување во периодот до формирањето на новата Влада, пристрасното известување за значајните настани, а особено за 27 април кога толпа граѓани насилно влегоа во Собранието на РМ кога за време на немилиот настан МРТ емитуваше ракометен натпревар, а вклучувањето, по завршувањето на натпреварот, беше со зборовите: „Народот влезе за да си го врати законодавниот дом“, без ниту еден збор за тоа што доживуваа пратениците, медиумите и собраниските служби.
Освен бројки, во извештајот нема ниту оценка колку професионално МРТ ги покриваше локалните избори. За да се прифати годишен извештај за работата на една институција, таа треба да си ја извршила задачата за што е формирана и за што се финансирана од парите на граѓаните.
Според јавноста, ваквиот извештај потпишан од директорот на МРТ, Марјан Цветковски, и предлог-одлука извештајот да добие зелено светло од пратениците потпишана од претседателот на Програмскиот совет, Смиљка Јанеска-Саркањац, не заслужува поддршка од законодавниот дом бидејќи реформите во МРТ се неопходни.
Доколку извештајот не биде потпишан, нема реперкусии, но тоа би требало да значи дека е неопходна промена на Управниот одбор на МРТ. Пленарната седница, на која ќе се најде извештајот од јавниот дифузен сервис, е закажана за 17 јули.
Виктор Јованов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Делови од Гази Баба и Карпош денеска без струја

Од ЕВН Македонија АД известуваат дека денеска без електрична енергија ќе останат:
– во периодот од 08.00 до 15.00 часот, објектот на винарија Брзанов, објектите лоцирани околу винаријата, корисниците лоцирани на влезот во село Трубарево и сточниот пазар во Трубарево. (општина Гази Баба)
– во периодот од 09.00 до 15.00 часот, корисниците од улицата Партизанска – крак 10. (општина Карпош)
Македонија
Утрото ведро и посвежо, преку денот сончево со температура до 32 степена

Утрото ведро и посвежо, преку денот сончево и топло. Ќе дува слаб до умерен ветер од јужен правец. Минималната температура ќе биде во интервал од 5 до 14, а максималната ќе достигне од 27 до 32 степена.
Во Скопје, наутро посвежо, преку денот сончево и топло. Ќе дува слаб до умерен ветер од јужен правец. Минималната температура ќе се спушти до 11, а максималната ќе достигне до 32 степена.
Времето во наредните денови
Во вторник и среда ќе се задржи претежно сончево и топло време за овој период од годината. Од четврток ќе преовладува променливо облачно време со повремени локални врнежи од дожд. Дневната температура ќе биде во опаѓање.
Македонија
ЦУК: Спасувачка акција на повредено лице при превртување на теренско возило на планинскиот пат над село Јеловце

Центарот за управување со кризи денеска попладне добил пријава за едно повредено лице при превртување на теренско возило на планинскиот пат над село Јеловце, општина Врапчиште.
Веднаш за настанот биле известени полициските станици Гостивар и Галате.
„Пријавата е добиена преку Едиствениот број за итни повици. Бидејќи теренот е тешко пристапен за возило на Итна медицинска помош, по барање на директорот на ЦУК, Мухамед Али, ДОЦ достави барање до Министерството за внатрешни работи за ангажирање на хеликоптер и специјални единици (алпинисти) за спасување на повреденото лице“, информираат од ЦУК.
Оттаму додаваат дека лицето ќе биде транспортирaно до Клинички центар за укажување на понатамошна медицинска помош.