Македонија
Калевска -Ванчева: СДСМ останува против отворање рудници

Интересите на граѓаните, остануваат врвен приоритет за парламентарното мнозинство и Владата предводена од СДСМ, изјави пратеничката Снежана Калевска -Ванчева по владината одлука за укинување на спојувањето на концесиите за рудникот Иловица.
Пратеничката рече дека СДСМ и денес, но и од првиот ден е против отворање рудници во еден од најплодните делови на нашата држава.
За опозициската ВМРО-ДПМНЕ, Ванчева вели дека денес лицемерно глумат загриженост, се всушности тие се оние кои ја дадоа концесијата за рудникот Иловица, но и други 85 концесии за рудници.
„Одлуката за доделување концесија за рудник за бакар и злато во Иловица е донесена на 16 јуни 2012 година и на таа одлука потпишан е Зоран Ставревски тогашен Заменик претседател на Владата и десна рака на Никола Груевски. Пред доделувањето на концесијата претходеле позитивни мислења од неколку државни органи, каде свој потпис ставиле Миле Јанакиески, тогашен министер за транспорт и врски, Љупчо Димовски, тогашен министер за земјоделство. Бидејќи се работи за постапка во три чекори позитивно мислење е дадено и од Владо Мисајловски, кој денеска е потпретседател на ДПМНЕ и близок соработник на Христијан Мицкоски. Затоа пред да глуми загриженост, Мицкоски нека го праша својот потпретседател за рудникот во Иловица“, рече Калевска-Ванчева.
Зазклучи дека за разлика од таквиот однос на ДПМНЕ, Владата предводена од СДСМ постојано презема чекори во насока на заштита на интересите и барањата на граѓаните и само поради тоа рудниците не се отворени до ден денеска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Студентите може да добијат повеќе пари за субвенциониран оброк, но следната година, тоа зависи од буџетот на државата, вели Јаневска

Зголемување на сумата од 140 денари која сега ја добиваат студентите за оброк може да има, но не оваа туку следната година. Министерката за образование Весна Јаневска денес кажа дека барањето за зголемување на сумата за субвенциониран оброк од Универзитетското студентско собрание стигнало до неа.
„Јас со задоволство можам да кажам дека, ми се чини за првпат, студентите имаат партнер во Министерството и не се чувствуваме како опозитни страни, напротив, се чувствуваме како пријателски страни. Се што побарале досега беше остварено и исполнето. Ова прашање стигна до мене. Мислам дека во иднина би можеле да се договориме, но во овој момент не можам да гарантирам затоа што буџетот на Министерството за образование зависи од буџетот на државата. Секако дека ќе се залагам доколку е можно и ова во идната година да биде остварено затоа што јас искрено мислам дека тие треба да имаат услови за да можат да учат и искрено мислам дека тие се тие кои ќе придонесат за развој на државата“, рече министерката денес одговарајќи на новинарски прашања по уводот во градежните работи за основното училиште „Блаже Конески“ во скопски Аеродром.
Студентите почнаа да добиваат пари за оброк во 2020 година, а во 2023 година Собранието изгласа измени на Законот за студентски оброк со кои предвиде износот да се зголемува со зголемување на инфлацијата па почетниот износ од 120 денари дневно беше покачен на 140 денари. Законот предвидува еднаш годишно да се прави усогласување, по завршување на фискалната година, а пред донесување на државниот буџет за следната година.
Македонија
Ексдиректорот на АНБ тврди: Мицкоски не бил прислушкуван

Христијан Мицкоски во периодот од 2019 до 2024 година, како лидер на тогашна опозициона партија, не бил предмет на посебен оперативен интерес на Агенцијата за национална безбедност, вели поранешниот директор на АНБ, Виктор Димовски, по вчерашните изјави на премиерот и актуелниот директор на Агенцијата за национална безбедност кои изнесоа сериозни обвинувања за наводна злоупотреба на државни ресурси за прислушкување на Мицкоски, бизнисмени и новинари.
„Со оглед на тоа што во претходен брифинг за медиуми во АНБ бил споменат периодот од 2019 до 2024 година во дел од кој и јас ја извршував должноста директор на АНБ, одговорно тврдам дека тој како лидер на тогашна опозициона партија во периодот од 2019 -2022 година не бил предмет на посебен оперативен интерес на Агенцијата, не бил предмет на организирана оперативна работа, а со тоа ниту таргет кон кого биле применувани било какви оперативно-технички мерки“, вели Димовски.
Тој вели дека точно е дека во наведениот период согласно законските надлежности во Агенцијата имало постапка за преиспитување на проверките за безбедносни сертификати, вклучително и за еден тогашен и сегашен пратеник поради оддавање на класифицирана информација, а за што била поднесена соодветна кривична пријава до надлежното обвинителство.
„Во врска со тоа, на мое барање на дневен ред на надлежната собраниска Комисија за надзор на работата на АР и АНБ беше ставена точката за информирање за случајот и изнесените наводи во електронските медиуми од негова страна“, вели Димовски.
Со оглед на сериозноста на изнесените наводи на синоќешниот прес и на претходниот брифинг во АНБ, додава тој, го повикувам директорот на Агенцијата веднаш и неодложно да ги декласифицира документите за наводни злоупотреби, а особено тие кои се однесуваат на прислушкување на тогашниот лидер на опозицијата.
„Македонската јавност има право да знае кој тоа предлагал, барал, одобрувал и кој ги извршувал наводните прислушкувања. Очекувам дека овојпат нема да има криење со изговори од типот “класифицирани информации со степен на државна тајна”, посебно после последните неколку објави во некои “информирани медиуми” кои лифериваат конкретни имиња на лица кои наводно биле таргет на Агенцијата, вклучително и податоци за идентитетот на вработени и тајни соработници“,вели Димовски.
Македонија
ДУИ: „Вреди“ вети Европа, донесе српски свет

„Вреди“ дојде на власт со големи ветувања и со строги рокови за уставните измени. Прво ветија дека тоа ќе се случи пред формирање на Владата. Потоа рекоа во првите 100 дена. Потоа во три месеци. На крај, во шест месеци. Денес, по една година, Албанците слушаат само оправдувања од Изет Меџити и неговите соработници дека „времето не било доволно“, велат од ДУИ.
Вистината како што додаваат од оваа партија е едноставна: немаат ниту визија, ниту храброст, ниту политичка волја. Наместо уставни измени и европска интеграција, „Вреди“ ја отвори вратата за опасни влијанија од Белград и Москва, ја поткопа Охридската рамковна спогодба, ја ослаби позицијата на Албанците и ја блокира европската иднина на државата.
„Оваа власт стана симбол на неуспеси и секојдневни скандали. Изборните измами станаа нивната единствена владејачка практика:
• Ветија 2.500 работни места – граѓаните добија разочарување.
• Ветија финансиска поддршка за младите – граѓаните добија нула.
• Ветија национални проекти – го донесоа Иван Стоилковиќ како вицепремиер за имплементација на Охридскиот мировен договор.
• Ветија уставни измени и интеграција во ЕУ – донесоа партнерства со политичари што го пропагираат „Српскиот свет“.
Како што нагласи поранешниот министер за надворешни работи Бујар Османи, избегнувањето на дебатата за ЕУ и одбивањето на мониторинг-механизмите не се случајни – тоа е стратегија за прикривање на корупцијата и неуспесите на оваа влада и за спречување на еднаквоста на Албанците“.
„Вреди“ оценуваат во ДУИ, се покажа како голема политичка измама и национален срам кој ја изолира државата и ги исклучува Албанците од одлучувачките процеси.
Октомври, според нив, ќе биде моментот кога граѓаните ќе кажат „доста“ на измамите, неуспесите и слепата послушност кон антизападните интереси.
„Граѓаните заслужуваат достоинствено претставување и јасна европска визија, а не празни ветувања и смешни оправдувања. Во октомври, тие ќе ја манифестираат својата волја на народниот референдум. Никој нема да може да избегне од политичката и правната одговорност“.