Македонија
„Канцер-мафијата, за да може да ја злоупотребува скапата терапија, немала евиденција, ниту систем за контрола на апликацијата на лекови“, велат ВМРО-ДПМНЕ
„Извештаите за работењето на клиниката за Онкологија покажуваат катастрофална состојба и хаос и сето тоа било толерирано од страна на министерството за здравство. Причината е логична, во хаосот лесно се манипулира и злоупотребува особено ако се работи за екстремно скапа терапија каде што една ампула чини стотици и илјадници евра. Извештајот од финансиската контрола на Онкологија покажува дека системот на водење на контролата на лекови бил свесно поттурнуван и занемаруван и тоа не било возможно без знаење на врхушката на власта, бидејќи за состојбите на онкологија се зборуваше со месеци и години наназад и никој ништо не преземал“, велат од ВМРО-ДПМНЕ.
„Според податоците од извештајот, во поголем дел од историите недостига апликационата листа или таа не нецелосно пополнета. Исто така забележани се случаи каде што на пациенти им биле давани лекови на рака да ги аплицираат во други здравствени установи, а биле книжени како аплицирани на клиниката на Онкологија.
На одделенијата за лежечки пациенти во амбулантските дневници персоналот запишувал дека постоел остаток од некои вијали, но нема интерна книга, писмен траг или софтверски систем за тоа дали истите остатоци се фрлени или дадени и кому се давани.
Канцер-мафијата ловела во матно. Создала хаос, создала башибозук на клиниката за Онкологија, каде што имало скапа терапија, и тоа го искористила.
Пациентите според сведоштвата наместо соодветна услуга добивале физиолошки раствор или одложување на терапијата, а притоа без никој да води сметка скапата терапија била изнесувана од клиниката, а дел завршила на црниот пазар во земјава или странство. Овој скандал „Диво месо“ отвора сомнеж за дупла добивка за канцер мафијата, ем можност за неконтролирано изнесување на терапија, ем постојан недостаток на скапата терапија кој се набавувал ексклузивно од омилената веледрогерија.
Случајот „Диво месо“ покажува каков грозоморен грабеж бил правен на грбот на најтешко болните пациенти и на сметка на даночните обврзници. Канцер-мафијата мора да одговара“, соопшти ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Уапсен врховен судија поради сомненија за примање поткуп
Врховниот судија Наке Георгиев е уапсен поради сомнеж за примање поткуп.
„Денеска 20 мај, лишен од слобода е судија од Врховниот суд поради сомневања за сторено кривично дело Примање награда за противзаконито влијание. Судијата е лишен од слобода на лице место при извршување на кривичното дело. Се чекаат натамошни насоки од надлежен јавен обвинител“, велат од МВР.
Засега не е позната локацијата каде што е приведен судијата, ниту пак, за колкава сума станува збор.
Македонија
Сиљановска доби честитка од кралот Чарлс
Претседателката Гордана Сиљановска Давкова денеска го прими амбасадорот на Обединетото Кралство на Велика Британија и Северна Ирска, Метју Лосон.
На средбата беа разменети мислења за севкупните билатерални односи меѓу двете држави, при што претседателката Сиљановска Давкова истакна дека нашата држава придава особено значење на развојот на пријателските односи и соработката со Обединетото Кралство, вклучувајќи го сојузништвото во НАТО алијансата. Претседателката Сиљановска Давкова посочи на нејзината подготвеност за натамошно унапредување на билатералната соработка со Обединетото Кралство во сите сфери од заемен интерес.
Претседателката Сиљановска Давкова истакна дека како држава особено ја цениме британската поддршка во исполнувањето на стратешката цел – членство во Европската Унија, која продолжи и по Брегзит.
Амбасадорот Лосон на претседателката Сиљановска Давкова и предаде честитка од Кралот Чарлс Трети по повод нејзиното стапување на функцијата, во која упатува најискрени честитки за нејзиниот избор.
„Уверен сум дека ќе го вложите целиот Ваш капацитет за време на Вашиот мандат како Претседател за справување со големите предизвици на нашето време, почнувајќи од справувањето со климатските промени до продлабочувањето на евроатлантската интеграција на Северна Македонија. Многу сум задоволен што нашите две земји имаат воспоставено цврсти трговски и безбедносни односи. Оттука, се надевам дека за време на Вашиот мандат како Претседател односите, кои се веќе толку блиски, уште повеќе ќе се продлабочат“, се вели во честитката од Кралот Чарлс Трети.
Македонија
Сиљановска Давкова се сретна со украинската амбасадорка Дир
Претседателката Гордана Сиљановска Давкова денеска ја прими амбасадорката на Украина, Лариса Дир.
На средбата, беше изразено задоволство од традиционалните пријателски односи, засновани на заемна почит и меѓусебно разбирање. Претседателката Сиљановска Давкова ја нагласи нејзината заложба за продлабочување на соработката во сите области од заеднички интерес, реафирмирајќи ја поддршката за Украина против руската агресија, со која се поткопува европската глобална безбедност и стабилност.
Двете соговорнички разменија мислења и за стратешките определби и перспективите на двете земји, истакнувајќи ја потребата од натамошна заемна помош, споделување искуства и експертиза. Претседателката Сиљановска Давкова ја нагласи македонската поддршка за Украина на нејзиниот пат кон Европската Унија и НАТО.
Амбасадорката Дир, упатувајќи честитки за изборот на претседателката Сиљановска Давкова ѝ посака успешно извршување на функцијата.