Македонија
Карта на најважните луѓе во светот: Од Македонија се Мајка Тереза, Јустинијан, Тоше, Глигоров

Истражувачот и географ на Mapbox Топи Тјуканов направи мапа во која се вклучени сите најважни личности и местата каде што е родени. Така најпознато име во Србија е Новак Ѓоковиќ, а во Хрватска со оглед дека е роден во Лика, Никола Тесла.
Во Македонија во првите најпознати личности се набројани Мајка Тереза, Јустинијан Први, Тоше Проевски, Калиопи, Киро Глигоров, Горан Пандев. Потоа следуваат Али Ахмети, Љубе Бошкоски, Агим Нухиу, Благица Павловска, Даме Груев и уште многу други.
Во Србија се појавуваат Слободан Милошевиќ, Константин Велики, Моника Селеш, Милева Мариќ и многу други.
Црна Гора, пак, ги има Радован Караџиќ, Петар II Петровиќ Његош, Веселин Шљиванчанин и Вељко Ражнатовиќ.
Босна и Херцеговина, сепак, е со најпознатите Гаврило Принцип, Иво Андриќ, Емир Кустурица, Бранко Ќопиќ и Милорад Додик. Додека Хрватска е со Никола Тесла, Тито, Марио Манџукиќ, Раде Шербеџија, Лука Модриќ и Горан Вишњиќ.
Кога станува збор за Лондон, излегува дека Чарли Чаплин е најважната личност во британската престолнина, иако се очекуваше тоа да биде некој од кралското семејство.
Што се однесува до САД, на топ-листата во Тексас се Селена Гомез, Томи Ли Џонс и Бијонсе, на Флорида водат Ариана Гранде, Џим Морисон и Томас Пети, а во Калифорнија Мерилин Монро, Камерон Дијаз и Шер.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Милевски: Виница 4 години назадува, катастрофално владеење на Петков и ВМРО-ДПМНЕ

Така наречениот отчет на градоначалникот Миле Петков и ДПМНЕ е најдобар доказ за четири години катастрофално и досега невидено лошо владеење на една локална власт во Виница, изјави кандидатот на СДСМ за градоначалник на Виница, Гоце Милевски.
Наместо вистински отчет, додаде тој, видовме обид за замачкување на очите на јавноста и бегање од одговорност за неисполнетите ветувања.
„Затоа таканаречениот отчет беше во скап хотел а не на улиците, во градот и селата во Виница. Затоа што реалноста е разочарувачка. Ниту еден од капиталните проекти од програмата на Петков и ДПМНЕ за Виница не се реализирани“, рече Милевски.
Според Милевски, Петков се фалел со наследени проекти од претходната власт на СДСМ и неколку асфалтирани улици.
„Но фактите говорат: сегашната власт нема реализирано ниту 20 километри улици, наспроти 45 километри изградени во времето на СДСМ. Виница денес изгледа како мала депонија од не собереното ѓубре и смет, собирен центар за кучиња скитници, со небезбедни кратери од вода и хаос од неправилно паркираните возила, со запуштени зелени површини и ниту едно ново засадено дрво. Тоа сликата за Виница после 4 години неспособна локална власт на ВМРО-ДПМНЕ. Да не дозволиме оваа казна да продолжи уште четири години! Локалните избори се шанса за промени во Виница“, рече Милевски.
Македонија
Голема акција на Финансиската полиција: уапсени седум лица за даночни измами и перење пари, го оштетиле буџетот за 430 милиони денари

По двегодишна опсежна предистражна постапка, во текот на денешниот ден Управата за финансиска полиција спроведе акција во која беа извршени претреси на повеќе локации на подрачјето на општина Липково, Куманово и Желино.
Се работи за сложена предистрага, која опфаќа повеќе правни и физички лица, а целта е целосно разоткривање на криминална група, која дејстувала подолг временски период и имала цел вршење на кривичните дела злосторничко здружување, даночно затајување, даночна измама и перење пари и други приноси од казниво дело, со намера организаторите и припадниците на групата да стекнат противправна имотна корист во висина од над четиристотини триесет милиони денари, со што е предизвикана огромна штета на буџетот на Република Македонија.
По налог на јавен обвинител од Основно јавно обвинителство за гонење организиран криминал и корупција, во акцијата со асистенција на САЕ „Тигар“ од слобода се лишени седум лица и тие се изведени пред судија на претходна постапка при Основниот кривичен суд, а едно лице не е достапно на органите на прогонот.
Македонија
Утре сончево време, со температура до 34 степени

Времето утре ќе биде сончево со мала до умерена облачност. Попладне во источните делови ќе има услови за локален краткотраен дожд. Ќе дува слаб до умерен ветер претежно од јужен правец, информира УХМР.
Минималната температура ќе биде во интервал од 9 до 18, а максималната ќе достигне од 27 до 34 степени.
Во Скопје сончево со мала до умерена облачност. Ќе дува слаб до умерен ветер од југозападен правец. Минималната температура ќе се спушти до 14, а максималната ќе достигне до 32 степена.
До петок времето ќе се задржи претежно сончево и топло со постепен пораст на дневните температури. Ќе дува слаб до умерен ветер од јужен правец.
За време на викендот времето ќе биде променливо облачно и нестабилно со локален пороен дожд и грмежи. В сабота ќе дува умерен до засилен југозападен, а в недела ветерот ќе го смени правецот во северен.