„Неснаоѓање на новото наметнато партиско раководство, водењето недоследна партиска политика, страв од понатамошно обезличување на партијата, таа да стане вистинска и реална, а не фиктивна или договорна опозиција, која ќе има свои конкретни и долгорочни, а не дневнополитички ставови, принципи, идеологија и политика. Ова се само некои од 13-те причини што ги објави професорот Јове Кекеновски поради кои, според него, е формирана фракција во најголемата опозициска партија ВМРО-ДПМНЕ.

Според него, целта е за најкратко можно време со ново и демократско избрано раководство од членовите на партијата да се врати како победник на политичката сцена, партиската енергија и сила да ја насочиме во одбрана на интереси на граѓаните, а не таа да се губи во пазарања со политичкиот ривал за ослободување или амнестија на оние што сториле криминал и зло, партијата да се врати на членството и расчистување со авторитаризмот.

Како причини се наведуваат и – проветрување на партијата од соработници на службите, криминалните и аморалните структури, од одработувачите за туѓи интереси и недостоинствените, од прелетачите (ловци на функции), да се промени наследената фамилијарна состојба во која се наоѓа матичната партија, да се врати препознатливоста на ВМРО-ДПМНЕ како партија на македонското национално и граѓанско единство, а не како партија што дели и разделува и да се покаже дека е партија со европски и цивилизациски вредности, а не заробеници на личните фрустации на партиските раководства.

„Фракцијата е формирана против меѓупартиски нелогични јавни и тајни сојузништва и партиски договори и преговори спротивни на иделошките определби на партијата, не сакаме и нема да дозволиме и понатаму ДУИ и СДСМ да ги девалвираат највисокиот законодавен дом и институциите на државата и со сите сили и демократски средства да го спречиме секој обид за обезличување на државата и ставање на државните и националните интереси на пиедестал“, наведува Кекеновски.