Македонија
Клиниката за хематологија со совети и препораки за пациентите во услови на Ковид-19
Универзитетска клиника за хематологија – Скопје во периодот на вонредна состојба предизвикана од ширењето на Ковид-19 работи со полн капацитет во согласност со препораките за работа на Министерство за здравство.
„Секојдневно се спроведуваат мерки, кои имаат цел заштита и максимална безбедност на пациентите и медицинскиот персонал, истовремено обезбедувајќи им на пациентите 24-часовен континуиран специфичен третман“, велат од Клиниката.
Од таму објаснуваат дека најважна улога во превенцијата на Ковид-19 кај хематолошките болни има контролата на основната хематолошка болест и даваат поспецифични препораки за најчестите хематолошки заболувања.
– агресивни лимфоми – не се препорачува промена или одложување на иницијалната терапија.
– индолентни лимфоми – се препорачува почнувањето на терапијата да се одложи колку што е можно подолго, односно пристап watch and wait. Кај пациентите што треба да продолжат со терапија на одржување со Rituximab, се препорачува таа да се одложи, а доколку веќе се на терапија на одржување, да се прошират временските интервали на апликација помеѓу циклусите.
– Hodgkin Lymhoma – доколку е возможно, радиотерапијата треба да се избегнува бидејќи се спроведува во повеќекратни сесии, кои бараат чести болнички посети.
– акутна лимфобластна леукемија – кај акутните леукемии ставовите се поинакви. Задолжително е тестирање за SARS-CoV-2 со PCR-метода пред да се почне со лекување и веднаш да се почне лекување со стандардна терапија кајнегативните пациенти на Ковид-19.
– миелодиспластичен синдром – кај миелодиспластичните синдроми со низок ризик се дава предност на еритропоетин-стимулирачките агенси пред трансфузија со еритроцити, која се ограничува само во ситуации кога е стриктно индицирана.
– миелопролиферативни неоплазми ( Ph+ и Ph-) – кај новодијагностицираните пациенти со миелопролиферативни неоплазми, вклучувајќи ја и хроничната миелоична луекемија, сите лекови може да бидат безбедно почнати, освен што постои резерва за почнување со терапија сo JAK2-инхибитори – Ruxolitinib. Kaj веќе дијагостицираните пациенти, кои се на терапија со тирозин киназни инхибитори (ТКИ), хидроксиуреа-терапијата редовно продолжува, со тоа што болничките посети треба да се заменат со комуникација преку дигиталните апликации („Вибер“, имајл и телефонски број).
– мултипен миелом – иницијалната терапија, како за пациентите кандидати за трансплантација така и за пациентите што се непогодни за трансплантација, не треба да се менува. Истото важи и за терапијата на одржување.
Од Клиниката советуваат и како да се превенира развој на Ковид-19 кај пациентите со малигни хематолошки заболувања и пациентите кај кои е спроведена трансплантација на коскена срцевина.
• Kако и кај општата популација, важат мерките за избегнување контакт и социјално дистанцирање. Закажувањето на пациентите во болички термини точно временски се планира, со цел да се одржува соодветно растојание од 1 до 2 метра помеѓу пациентите во чекалниците.
• Редовна хигиена на рацете со сапун и вода, со средства за дезинфекција на рацете.
• Употребата на заштитни маски е задолжителна во услови кога е невозможна контактна изолација. Во однос на заштитните маски, тие, генерално, се делат во две групи:
1) хируршки маски;
2) високопротективни респиратори
Треба да се внимава која маска кој и кога треба да ја употребува.
Хируршките маски штитат од трансмисија на вирусот од инфицирани лица со/без симптоми. За разлика од нив, маските FFP2/3 штитат од добивање вирусна инфекција само кај оној што ја носи, а не ги заштитува од трансмисија на вирусот другите лица во собата.
• Неопходно е да се почитуваат мерките за самоизолација, а во одредени случаи и карантин за време и пред почнување на хемотерапијата. Пациентите треба внимателно да се едуцираат за овие мерки и да добијат и пишани инструкции.
• Во однос на профилаксата со интравенски имуноглобулини, треба да се потенцира дека овие имуноглобулини не се специфични за вирусот и затоа не обезбедуваат специфична вирусна заштита. Интравенските имуноглобулини треба да се аплицираат во согласност со ЕМА -препораките, односно кај пациентите со тешка хипогамаглобулинемија, кои имаат чести инфекции.
• Бактериските суперинфкеции може да бидат дополнителен проблем, меѓутоа антимикробна профилакса со употреба на G-CSF и антибиотици надвор од вообичаените препораки не се препорачува! Досегашните податоци од студии кај трансплантирани пациенти во ран посттрансплантациски период (до 90 дена) со респираторна вирусна инфекција покажуваат дека профилактичката употреба на антибиотици претставува независен ризик-фактор за исходот од инфекцијата.
• Се препорачува вакцинација за сезонски грип и пневмококна вакцина.
• Од досегашните податоци може да се заклучи дека, сепак, најважна улога во превенцијата на Ковид-19 кај хематолошките болни, како и на другите респираторни вируси, претставува контролата на основната хематолошка болест.
Хематолошките пациенти што се сомневаат дека се заразени од коронавирус потребно е:
– телефонски да се обратат кај својот матичен лекар,
– да ја наведат хематолошката дијагноза,
– да ги наведат сите лекови што ги користат за да се овозможи подобра процена од матичниот лекар за натамошно постапување,
– препораката од матичниот лекар задолжително да ја почитуваат во целост.
За сите потребни информации, пациентите може да се консултираат со доктор од Клиниката на следните телефонски броеви:
– 075 477 240,
– 075 477 241,
– 075 477 242,
– 075 477 243,
– 075 477 244,
– 075 477 245.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Меџити: Коцкањето во последните години стана рак на општеството
Вицепремиерот на Владата Изет Меџити на прес-конференција за првите 100 од новата Влада се фокусираше на борбата против коцкатањето како една од главните точки што ја ветија како предизборно ветување.
Според него, коцкањето во последните години стана рак на општеството каде илјадници наши сограѓани претрпеле финансиски, семејни, морални и економски штети.
„Илјадници наши луѓе заминаа и побегнаа во странство. Претходната власт го донесе коцкањето на секоја улица, секое маало, пред секое училиште и пред секое игралиште. На крајот, тие сакаа да го донесат на телефоните и компјутерите на нашите деца. Го прекинавме ова. Им ги укинавме незаконските лиценци на три интернет коцкарски компании. Ги отстранивме од веб-страниците кои легално или незаконски организираа коцкање. Исполнивме ветување кое никој не мислеше дека ќе го исполниме“, рече Меџити.
Македонија
Таравари потврди дека била одбиена хоспитализација на починатото бебе
Министерот за здравство Арбен Таравари денеска потврди дека била одбиена хоспитализација на бебето кое вчера почина на Детската клиника. Тој е запознаен со случајот, но детални информации очекува од Комисијата за стручен надзор која утре ќе ги истражува двете клиники каде што било лекувано бебето. Како што напомена Таравари, кој и да е виновен, ќе мора да сноси одговорност.
„Вратено било, за жал. Дали поради лекарска грешка или незнаење треба да се констатира. Дефинитивно треба да има одговорност. Меѓутоа не очекувајте од мене уште денес да судам како било. Дозволете компетентните органи да испитаат се во детали. На крајот некој мора да сноси одговорност кога има вакви трагични случаи. Дојдени биле двајца анестезиолози вечерта кога починало детето, имало обид да се интубира, но со ниска сатурација и аритмија било проблем“, изјави министерот пред почетокот на 2. конференција на Женското собрание на Алијансата за Албанците.
Таравари тврди дека сите што биле на смена кога починало бебето се стручни лица. Истакна и дека наследиле здравствен систем во кој се случуваат вакви работи, како и дека не можат преку ноќ да го средат тоа.
На Клиниката за детски болести вчера почина 14-месечно бебе. Министерството за здравство соопшти дека ќе иницира комисија за стручен надзор на Универзитетската клиника за респираторни заболувања кај децата во Козле и на Клиниката за детски болести за да се утврдат причините за смртта.
Македонија
Тошковски: Лага е дека сум расчистил само еден случај како министер и сум разочаран од некрофилските обиди на СДСМ
„Разочаран сум од некрофилските обиди на СДСМ за манипулација на народот со обвинување за наводната неспособност на МВР во овие 100 дена и сметам дека се само очаен обид да го свртат вниманието од седумгодишниот хаос и уништувањето на безбедносниот систем што тие го оставија зад себе. Тврдењето дека за време на моето раководење со МВР е расчистен само еден случај е целосно лажно и манипулативно, со цел да се дезинформираат граѓаните. Според официјалните бројки на МВР, во 2023 година имало 23 убиства од кои 2 нерасветлени, додека во 2024 година до месец октомври има 16 убиства, од кои исто така само два се нерасветлени“, наведува министерот за внатрешни работи Панче Тошковски на својот фејсбук профил.
Според Тошковски, овие податоци покажуваат дека ситуацијата не само што не е влошена, туку е и подобрена од аспект на намалување на бројот на убиства
-Но, сите знаеме каков хаос се случуваше во изминатите 7 години каде скандалите се редеа еден по друг. Нивните владеачки структури дозволија криминалците да владеат на улиците, да пукаат во трговски центри, да тероризираат граѓани и да ја претворат полицијата во извршител на нивните интереси. Пукањата во “Ист Гејт”, каде криминалци пукаа сред бел ден, мафијашките убиства во “Шиша Бар” и Бутел, двојното убиства во Топанско Поле, бегствата на затвореници – сето тоа не се случи во овие 100 дена. Овие настани чии извршители ден денес се непознати, се резултат на долгогодишното уништување на системот, кој тие го претворија во механизам што им овозможуваше на криминалните структури да дејствуваат слободно. За време на нивната власт, која сега се осмелува да зборува за неспособност, пасоши се делеа на меѓународни криминалци – 215 нарко босови и лица со меѓународни потерници добија македонски документи и се движеа слободно низ Европа, истакнува министерот.
Граѓаните, додава, многу добро знаат кој дозволи бандити да се пресметуваат по улиците на Скопје и кој стоеше зад најголемите скандали со кражба на оружје од полициските депоа и организирани напади врз полициски службеници во станиците.
-Наместо да се справат со организираниот криминал, тие соработуваа со него, оставајќи ги институциите немоќни да ги заштитат граѓаните. Да не заборавиме и дека токму во нивно време се случија корупциските афери како “Рекет”, каде највисоките државни функционери беа замешани во изнуда и злоупотреба на моќ. Пукањата и убиствата што денес ги гледаме се наследство од нивното владеење, кое дозволи полицијата да биде контролирана од криминалци, додека народот беше оставен незаштитен. Ние најавивме бескомпромисна борба со овие криминални структури, почнавме да го обновуваме системот и да ја враќаме контролата врз безбедноста и правдата, но не може веднаш да се реши она што беше систематски уништувано седум години. Воведовме засилени мерки и акциски контроли, но за целосна победа над криминалот е потребна стратешка и долгорочна акција. Ова е процес што нема да се случи преку ноќ, но ние сме решени да ги вратиме безбедноста, правдата и редот во земјата, за разлика од нив, кои дозволија криминалците да го контролираат секој аспект од нашето општество, пишува Тошковски.