Македонија
Клисаровска: Одговорно тврдам дека од ноември 2022 година секој пациент ја добива терапијата без манипулации

Одговорно им тврдам на пациентите, откако сум јас, значи зборувам за периодот од ноември 2022 година, секој пациент, ја добива препишаната терапија, согласно индикацијата, дозата, типот на лекот, според тоа што неговиот соодветен ординирачки лекар тоа ќе го постави, без никаква манипулација со лековите. Ова го истакна д-р Виолета Клисаровска, медицински директор на Универзитетска клиника за радиотерапија и онкологија.
Обраќајќи се кон пациентите, Клисарова вели дека колегиумот на клиниката за онкологија во најголем дел работи професионално.
„Одговорно ви тврдам и ве уверувам во истиот период од ноември 2022 година, кога сум на оваа позиција дека стручниот колегиум, на клиниката во најголем дел работи високо професионално, правиме се за нашите пациенти. Заживеани се утринските состаноци, тоа е од првата недела, да не речам првиот ден на мојата позиција. Формиран е онколошки конзилиум во кој што учествуваат најголем дел од стручниот колегиум, од колегите како најискусни одговорни раководители на соодветните оддели. Од секоја од тие седници постојат и уредно заведени записници кои што како документ може да ви станат и достапни, доколку е потребно. На тој онколошки конзилиум се реферира буквално пред сите нас, секој пациент кој треба да започне терапија со било кој лек од таканаречениот условен буџет, тука припаѓаат лековите кои што не се ставени на позитивна листа“, вели Клисаровска.
Додава и дека се ажурирани клиничките протоколи, стручниот тим работи по ажурирани, обновени, работни верзии и упатства, за дијагноза, третман и секако следење на нашите пациенти, со верифицирана малигдна болест.
Воведени се повеќе безбедносни мерки за следење на лекот од влез во Клинката до аплицирање кај пацинет. Една од безбедносните мерки е ограничен број на сестри, точно по распоред секој ден се знае која сестра доаѓа во допир со нерастворен лек, тој влез е строго ограничен и не е отворен за сите сестри од дневната болница, додава таа.
„Сето ова што го кажувам го тврдам одговорно и замолувам пациентите да ни дадат можност да ја вратиме довербата“, порача Клисаровска.
Нагласи дека клиниката е целосно достапна на надлежните и истражните органи со цел, брзо откривање на виновниците. Замоли час поскоро надлежните органи, да донесат одлука, ако има виновници, да ги именуваат. Остро го осуди секое несовесно и нестручно работење, со молба и апел, кон сите надлежни и медиумите да не се генерализира проблемот врз целиот медицински тим.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сомненија за криумчарење златен накит вреден половина милион евра на скопскиот аеродром

Oбвинителството донесе наредба за спроведување истражна постапка против две лица, белгиски државјани, кои се осомничени дека како соизвршители сториле кривично дело – криумчарење.
Осомничените, маж и жена од Антверпен, на 6 април пристигнале во земјава со лет од Виена, па избегнувајќи ја царинската контрола на аеродромот, пренеле непријавени стоки – вкупно 209 парчиња златен накит со тежина од 1.711,1 грама и во вкупна вредност од 479.555 евра.
Откако ја поминале пасошката контрола на Аеродромот во Скопје, осомничените поминале на зелениот канал, каде што поминуваат патници кои немаат стока за пријавување, а второосомничениот при селекција од страна на царинскиот службеник бил упатен на преглед на личниот багаж на скенер, каде било забележано дека двата куфери се наполнети со празни кутии за накит и други непријавени предмети. Тој појаснил дека патува со неговата сопруга која е првоосомничена и дека таа ја поминала пасошката контрола. Нешто подоцна осомничената се вратила и при дополнителен царински преглед, во личниот багаж – ранецот кој го носела била пронајдена непријавената стока – златен накит, која и била одземена.
Јавниот обвинител до судијата на претходна постапка достави предлог за определување мерка притвор за двајцата странски државјани осомничени за криумчарење на стока која е во вредност од големи размери.
Македонија
29-годишниот Aлександар е 61. жртва на пожарот: имал 35 отсто изгореници од трет степен

Александар Гавриловски, роден на 7 март 1996 година, е 61. жртва на пожарот во кочанската дискотека „Пулс“.
Тој почина денес во 11 часот како еден од покритичните пациенти што се лекувале во Литванија.
Министерот Арбен Таравари изјави дека од 4 април му била влошена состојбата, а од вчера бил ставен на хемодијализа. На телото имал 35 отсто изгореници од трет степен, како и изгореници на дишните патишта.
Во моментот меѓу повредените што се лекувата има уште двајца критични пациенти, а нивната состојба е стабилна.
Александар е вториот пациент што почина во Литванија од 193-те повредени лица во пожарот.
Министерот Таравари изрази сочувство до семејството.
Во петокот минатата недела во Литванија почина и управителот на дискотеката „Пулс“, Александар Карадакоски. Министерот Таравари рече дека неговата состојба цело време била критична, на 1 април му откажале бубрезите, 36 отсто од телото му било со изгореници, а од вдишаниот пламен, дури 90 отсто од дишните патишта му биле изгорени.
Македонија
Фетаи: Земјата ги има решено речиси сите случаи на лица без државјанство, кои произлегуваат од распадот на поранешна Југославија

Заменик-претседателот на Владата на Република Северна Македонија, задолжен за политики на добро владеење, Арбен Фетаи, денеска оствари работна средба со г. Габриел Гуалано де Годој, претставник на Агенцијата на Обединетите нации за бегалци (УНХЦР) во Скопје, со кого разговараше за извонредниот напредок што го постигна Северна Македонија во елиминацијата на појавата на лица без државјанство.
За време на средбата беше истакнато дека Северна Македонија е веќе позитивен пример во рамките на глобалната алијанса за решавање на лица без државјанството позиционирајќи се како регионален и глобален лидер во оваа област. Земјата ги има решено речиси сите случаи на лица без државјанство, кои произлегуваат од распадот на поранешна Југославија, при што остануваат само уште два нерешени случаја, кои се однесуваат на граѓани од други поранешни републики што живееле на територијата на нашата земја пред распадот.
Дополнително, евидентирани се и 153 други случаи на лица без државјанство, кои главно се резултат на нерегистрирање деца по раѓањето. Од овие случаи, 90 проценти се од ромската заедница, 7 проценти се Албанци, 1 процент Македонци и 2 процента се од други етнички групи.
„Решавањето на проблемот со лицата без државјанство е многу повеќе од статистички предизвик – тоа е хуман и трансформативен чин, што директно го менува животот на луѓето“, беше потенцирано на средбата.
„Измените на Законот за државјанството имаа длабоко влијание врз животот на многу граѓани враќајќи им го човековото достоинство, кое им било скратено повеќе од три децении“, истакна Фетаи.
Заменик-претседателот на Владата ја повтори заложбата на Владата да продолжи со изградба на инклузивно општество, каде што секој граѓанин има право да постои со достоинство и да придонесува кон заедничката иднина на државата.
„Нашата заложба за измена на Законот за државјанството ги трансформира животите на овие луѓе и семејства враќајќи им го човековото достоинство, кое им беше скратено три децении по ред. Оваа заложба не запира тука. Ќе продолжиме да градиме инклузивно општество, во кое секој граѓанин има право да постои со достоинство и да придонесува кон заедничката иднина“, констатира Фетаи.