Македонија
Коалицијата пред тест по измените на кривичниот законик: за ДОМ услов е борбата против корупцијата, а измените не одат во таа насока

Партиските тела на ДОМ ќе дискутираат за борбата против корупцијата – како нивен услов да бидат дел од владината коалиција, по изгласувањето на измените од Кривичниот законик со кои не се согласуваат и не ги поддржуваат.
„Има бурни реакции во јавноста. Ние и претходно зборувавме и како услов за останување на ДОМ во владината коалиција е борбата против корупцијата. Ќе го дискитираме ова прашање во рамки на партиските тела“, изјави пратеничката Маја Морачанин од ДОМ.
Таа кажа дека гласала „против“ предложениот Закон бидејќи смета дека овие измени кои што вчера се усвоија не одат во прилог на ефикасна борба против корупцијата и организираниот криминал.
Нагласи дека за ДОМ е исклучително важно владеењето на правото.
„Мислам дека овие законски измени со намалување на казните за злоупотреба на службена должност, злосторничко здружување не одат во прилог на ефикасната борба против криминалот и не се прифатливи и затоа гласав ‘против’“, рече Moачанин.
Прашана дали постоел договор помеѓу власта и опозицијата за измените, таа одговори дека нема такви информации.
Морачанин смета дека за вакви законски решенија е потребна поширока јавна дебата со вклученост на експерти.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Тетово повика на јавна дебата за промена на имињата на улиците

Општина Тетово в петок, со почеток во 15:00 часот, организира јавна дебата за предлози за имиња на улиците.
„Ги повикуваме сите граѓани, здруженија, невладини организации и граѓанскиот сектор да учествуваат на оваа јавна дебата за именување на улиците“, велат од општината преку допис.
Додаваат дека секој предлог од граѓаните е важен и помага овој процес да биде инклузивен и успешен за граѓаните и градот Тетово.
Македонија
Тошковски: Припадниците на МВР денеска примија плата зголемена за 10 отсто

Припадниците на МВР денеска примија плата зголемена за 10 отсто, информира министерот за внатрешни работи, Панче Тошковски.
„Изминативе години сосема оправдано имаше критики дека платите во МВР се ниски, а очекувањата и одговорностите големи. Често се укажуваше на разлики во однос на некои сродни служби, а чувството на потценетост беше реално и оправдано. Ова зголемување не е доволно, но е еден од многуте чекори што ќе следат во насока на враќање на достоинството и угледот на полицаецот. Целта е јасна – да изградиме модерна, професионална и силна полиција која ќе биде вистински сервис на граѓаните. Продолжуваме понатаму кон обезбедување на подобри услови, поголема поддршка и вистинско вреднување на трудот што секојдневно се вложува“, напиша Тошковски во објавата на социјалните мрежи.
Македонија
Оставката на Папазов помина на владина седница

Владата ја прифати оставката на градоначалникот на Кочани, Љупчо Папазов.
Советот на општината ќе треба да назначи в.д. градоначалник на Кочани, откога одлуката ќе биде објавена во „Службен весник“.
Инаку, Папазов ја поднесе оставката по пожарот во дискотеката „Пулс“ каде животот го загубија 59 лица, а околу 200 беа повредени и префрлени низ клиниките во земјава и странство.
Папазов по оставката беше приведен и одреден му беше притвор. Во куќен притвор се и неговите двајца претходници од градоначалничката фотелја.
Според истрагата, тројцата осомничени градоначалници на Кочани во периодот од 2012 година до 16 март кога се запали дискотеката, не ги извршиле своите правни обврски во согласност со Законот за заштитата и спасувањето, со што овозможиле кабарето „Пулс“ незаконито да продолжи со вршење угостителска дејност. За целиот овој период, како што беше истакнато, Општината примала уплати по основ на надоместок за угостителски објект.