Македонија
Ковачевски: Ако граѓаните се против, рудници не може да има

Премиерот Димитар Ковачевски денеска изјави дека сите информации во врска со рудникот „Иловица“, најпрвин ќе бидат доставени до Владата, а потоа министерот за економија ќе ги сподели со сите медиуми.
„Вчера, вицепремиерот Битиќи на прес-конференција одговори за одлуката што ја донесе Владата дека Министерството за економија е задолжено на наредната седница да достави детаљна информација за сите одлуки, судски и управни постапки што се водени од 2012 година до денес“, рече премиерот.
Според Ковачевски, врз основа на таа информација потоа ќе се донесат соодветни одлуки за иднината на рудникот.
Притоа, вели тој, ќе мора да се внимава на интересот на граѓаните.
„Јасно сум го кажал, и како претседател на Владата и од политичката партија од која доаѓам, од првиот ден, дека рудници може да има само со согласност на граѓаните што живеат во тој регион. Ако се тие против, рудници не може да има“, изјави Ковачевски.
Тој вели дека тоа не било случај со претходната влада предводена од ВМРО-ДПМНЕ.
„Тие имаа издадено 86 дозволи за концесии и општините, предводени исто така од ВМРО-ДПМНЕ, веќе ги имаа донесено одлуките за почеток на работите за отворање на рудниците. Сега тоа не е случај“, рече тој.
Ковачевски повтори дека откога ќе бидат доставени информациите до Владата, министерот Крешник Бектеши потоа ќе ги сподели со сите медиуми.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Непречен сообраќај по влажни коловози низ државата

Сообраќајот на државните патишта се одвивa непречено, по влажни коловози, извести АМСМ.
Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Без струја дел од Гази Баба

Од ЕВН Македонија АД известуваат дека денеска без електрична енергија ќе останат:
– во периодот од 09.00 до 12.00 часот, корисниците од улица Трубарево – крак 2, општина Гази Баба.
Македонија
Променливо облачно со повремени врнежи од дожд

Времето денеска променливо облачно со повремени врнежи од дожд, пообилни во источните делови (над 15 l/m2). Ќе дува слаб до умерен ветер од северен правец.
Минималната температура ќе биде во интервал од 4 до 10, а максималната ќе достигне од 12 до 17 степени.
Во Скопје, променливо облачно со повремени врнежи од дожд. Ќе дува слаб до умерен ветер од северен правец. Минималната температура ќе се спушти до 9, а максималната ќе достигне до 16 степени.
Во сабота времето ќе биде променливо облачно со сончеви периоди и со услови за локална појава на нестабилност со пороен дожд, грмежи и засилен ветер.
Во недела ќе има брз продор на студена воздушна маса од север и врнежи од дожд, на планините и на повисоките места од снег.
Ќе дува засилен северен ветер, температурите значително ќе опаднат и врнежи од снег се очекуваат и во некои од пониските места.
Во понеделник наместа ќе провејува слаб снег, а утринските температури на повеќе места ќе бидат негативни.