Македонија
Ковачевски во Пробиштип: Во услови на најголема светска криза обезбедуваме социјални станови за најранливите граѓани

„Денес, 20 фамилии во Пробиштип добиваат нов дом. Споделената радост се зголемува и затоа сме денес тука заедно со Соња, Ласто, Марина, Фросина, Никола, Јован, Симона и со семејствата на сите други што денес ги добија клучевите од својот нов дом. Тука сме за да им посакаме среќа, на денешниот голем празник за оние што го празнуваат Свети Никола, да почнат посветло секојдневие исполнето со љубов и разбирање“, рече премиерот Димитар Ковачевски на денешното доделување на клучевите на новите домови на семејствата од социјално ранливите категории.
Ковачевски истакна дека голем број наши сограѓани со Програмата за ранливите категории на граѓани ќе живеат во современи услови, кои досега, за жал, ги немале.
„Тоа се наши граѓани, наши соседи, кои заслужуваат да имаат топол дом. Имав можност да поразговарам со семејствата и горд сум кога имаме ваков придонес, кога имаме опиплив резултат од посветената работа на институциите во служба на граѓаните. На овој начин се демонстрира грижа и поддршка за сите оние на кои им е потребна. Ова се важни капитални проекти бидејќи со нив го враќаме достоинството на социјално ранливите граѓани, овозможуваме да имаат пристоен живот и стабилно домување. Владата заедно со Министерството за транспорт и врски и сите надлежни институции особено значење даде на социјално-станбената политика. Во изминатите 4 години изградени се и во фаза на изградба вкупно 864 станбени единици, односно социјални станови, и тоа е навистина за пофалба. За споредба, од 2011 до 2017 година биле изградени 678 стана. Овие социјални станови се дом на оние на кои најмногу им треба помош: на деца без родители, лица со попреченост, граѓани што користат гарантирана минимална помош, самохрани родители припадници на сите заедници, припадници и на македонската заедница и на ромската заедница и на сите заедници бидејќи социјалната загрозеност не бира, меѓутоа и ние кои сме задолжени да помагаме не смееме да избираме, не избираме и нема да избираме кому ќе му помагаме. Ќе помагаме како што денес им помагаме на сите, без исклучок. За следната година во буџетот предвидени се 2,2 милиона евра за изградба на социјалните станови. Покрај тука во Пробиштип, само оваа година завршени со градба и распределени се становите во Гостивар, Виница, Струмица, а до крајот на годината ќе заврши распределбата и во Свети Николе, а в година ќе бидат во Бутел, Велес, Пехчево, Сарај и во Кочани. Внимаваме становите да се во целата држава за да обезбедиме порамномерен регионален развој и во извесна мера изедначување на станбениот стандард“, рече Ковачевски и посочи дека Банката за развој при Советот на Европа е подготвена за потпишување нов проект за изградба на нови дополнителни згради.
Министерот за труд и социјална политика, Благој Бочварски, истакна дека обезбедувањето достоинствени услови за живеење се прашања за кои нема дебата.
„Секој граѓанин заслужува дом, покрив над главата и подобри услови за живеење, особено сега во овие тешки времиња. Ова е наша задача и еве денеска во Пробиштип тоа го потврдуваме. Драго ми е кога ќе видиме вака задоволни граѓани на кои сме им го решиле станбеното прашање. Семејствата од социјален ризик што се најдоа на конечната ранг-листа исполнувајќи ги сите услови предвидени во јавниот повик за распределба на ова социјална зграда, денеска ги добија клучевите од својот нов дом. Посебно е чувството кога некому му подаваш рака, помагаш кога тоа е најпотребно, а ние се обидуваме токму тоа и да го правиме, да помогнеме на сите граѓани, да им дадеме поддршка, полесно да ги надминат предизвиците пред кои се исправени“, изјави Бочварски.
Директорот на Акционерското друштво за изградба и стопанисување со станбен простор и со деловен простор од значење за Републиката – Скопје, Зоран Ѓоргијев, рече дека колективната станбена зграда наменета за лица од социјален ризик и други социјално ранливи категории во Пробиштип е со вкупна површина од 2.700 м2, П+4 со 2 влеза, располага со 48 еднособни станбени единици, со површина од 35 до 45 м2, од кои 2 се приспособени за лица со телесен инвалидитет, 48 подруми и 12 паркинг-места.
„Вкупната инвестиција на објектот е приближно 70.000.000,00 денари. Предадена е од страна на изведувачот во декември 2021 година. Акционерското друштво за изградба и стопанисување со станбен простор и деловен – Бутел, Велес, Дебар, Кочани (ламела 3), а во текот на следниот месец очекуваме и комплетирање на документацијата на изградените објекти и во Демир Капија и Неготино“, изјави Ѓоргијев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Предложен притвор за таткото што тепаше играчи на фудбалскиот натпревар во Штип

Основното јавно обвинителство Штип денеска поведе итна постапка против едно лице за кривично дело – Насилство.
Осомничениот извршил грубо насилство на 24 август на стадионот „Бело Брдо“ во Штип, за време на фудбалски натпревар меѓу младинските екипи на фудбалските клубови „Брегалница“ и „Шкупи“.
Со дејствијата тој ја загрозил сигурноста на две деца родени 2010 година, играчи за тимот на „Беласица“, нанесувајќи им телесни повреди. Освен тоа, кај оштетените, останатата присутна публика и во јавноста предизвикал чувство на несигурност, загрозување и страв.
Настанот се случил во 89-тата минута од натпреварот, која судијата поради прекршок (фаул) доделил втор жолт картон со што го исклучил од игра синот на осомничениот, кој играл за „Шкупи“.
Незадоволен од одлуката, најпрво синот се однесувал неспортски и со тупаници и со удар со нога се обидел да се пресмета со еден од фудбалерите на „Брегалница“. Тогаш на теренот влегол таткото и со тупаници и клоци започнал да ги удира двете деца, нанесувајќи им телесни повреди – повеќе набиеници и скршеница на нос без дислокација. На игралиштето влегле и други лица од публиката, кои спречиле натамошна ескалација на настанот.
Јавниот обвинител до судијата на претходна постапка од Основниот суд во Штип поднесе предлог за определување мерка притвор за осомничениот, имајќи го предвид видот и сериозноста на кривичното дело против јавниот ред, опасноста од бегство на осомничениот и можноста за повторување на делото.
Македонија
Седум пожари денеска во Македонија, три изгаснати

На територијата на Македонија имаше вкупно седум пожари на отворен простор, од кои два се активни, два се под контрола и изгаснати се три пожари, информира Центарот за управување со кризи.
Активни се еден пожар во Општина Долнени, во село Долгаец каде гори мешана шума и еден пожар на влезот на Крушево каде гори депонија.
Под контрола е пожарот во Јасен, и еден пожар на планината Кожуф каде гори висока шума.
Изгаснати се пожари во Општина Штип: с. Судик (стрниште); Општина Дебар: с. Елевци (ниска вегетација) и во Општина Куманово: нас. Гоце Делчев (ниска вегетација).
Македонија
ВМРО-ДПМНЕ почнува со кампања за собирање предлози од граѓаните

Од среда, 27 август, ВМРО-ДПМНЕ ќе почне седумдневна теренска кампања за собирање на идеи и предлози за проекти од граѓаните, кои ќе бидат опфатени во програмите на кандидатите за градоначалници.
Од 27 август до 3 септември во временски период од 17 до 21 часот, во сите општини низ државата, на плоштадите или прометните локации во истите ќе бидат поставени штандови дел од акцијата „Предложи! Вистинската идеја за вашата општина!“ каде граѓаните на посебен формулар за оваа акција ќе можат да напишаат своја идеја која сакаат да ја видат реализирана како проект од идните градоначалници на ВМРО-ДПМНЕ.
Во истиот временски интервал ќе бидат отворени и сите штабови низ државата каде членовите на партијата и граѓаните исто така ќе може да ја дадат својата идеја или предлог за проект.
Истовремено во истиот период граѓаните ќе можат да ги достават своите идеи и предлози за проекти по електронски пат, на адресата: [email protected]. Каде ќе бидат разгледани исто како и предлозите и идеите од штандовите и штабовите од тимот експерти кои ќе ги пишуваат програмите.
Од ВМРО-ДПМНЕ велат дека очекуваат масовен одзив на граѓаните, се со цел што е можно подетални и содржајни програми со проекти кои извираат директно од нив и нивните потреби.