Претседателот на Владата на Република Северна Македонија Димитар Ковачевски, во рамки на посетата на САД, се обрати на прием по повод 5 мај – Денот на македонскиот јазик.

„Денеска, 5 мај, оддаваме почит на македонскиот јазик и на сите создатели на писмениот, литературен и стандарден македонски јазик. Владата на Република Северна Македонија во 2019 година овој ден го прогласи за Ден на македонскиот јазик во чест на 5 мај 1945 година кога Народната влада на Народна Република Македонија ја усвоила азбуката на македонскиот јазик како официјално писмо во државата.

Се гордеам што како држава, како народ, успеавме да добиеме шанса и статусот на македонскиот стандарден јазик да го втемелиме во европското законодавство. Да биде признат и почитуван од нашите меѓународни пријатели, дипломати, државници, да биде рамноправен со сите други јазици кои се зборуваат во Европската Унија. Знае професорот Малески којшто е тука и амбасадорот Фрчковски какви се предизвици имавме и имале и какви јас имав во делот на преговорите на практично внесување на македонскиот јазик во ОН потоа во НАТО, финално во јазиците на ЕУ, меѓутоа со потпишувањето на Договорот со ФРОНТЕКС и неговата ратификација, македонскиот јазик се издигна на рамноправно рамниште со сите други јазици кои се зборуваат во Европската Унија.

Тоа е практично прв договор кој е потпишан на сите јазици во ЕУ и на македонски јазик и одобрен од сите членки на ЕУ вклучително Грција и Бугарија.

Со заштитата на македонскиот јазик го заштитивме и нашиот идентитет, нашата култура и ги втемеливме како дел од мозаикот на европските јазици и европската разноликост. Македонскиот јазик го обликува нашиот идентитет, нашето културно наследство, па затоа нашиот услов од кој не отстапивме пред почетокот на преговорите беше македонскиот јазик да биде службен и единствен официјален јазик. Историски успех е што на македонски јазик ќе се зборува официјално и во Брисел и во сите европски престолнини. За идентитетот и јазикот не постојат фусноти, додавки, објаснувања, ѕвездички – македонски јазик е македонски јазик!

Јазикот е коренот од кој растеме. Тој е нашиот столб на образованието, културата, на нашата национална смисла. Со тоа што го заштитивме јазикот, ја заштитивме и суштината на нашето постоење.

Вклучувањето на македонскиот јазик во светската ризница на јазици е еден од приоритетите на Владата. Во соработка со Институтот за македонски јазик дадовме поддршка за активности за негова континуирана афирмација. Овде ќе ја спомнам интернет-платформата makedonski.gov.mk на која е поставен дигитализираниот „Толковен речник на македонскиот јазик“. Се гордеам што тој бесплатен дигитален толковен речник е достапен насекаде во светот, вклучително и на вас кои сте тука присутни, на вашите пријатели, на вашите роднини кои денес не можеа да бидат со нас. И насекаде во светот на нашите граѓани, соседи, на нашинците во дијаспората, на научниците, лингвисти, писатели, бизнисмени, сите кои сакаат да го користат македонскиот јазик.

Толковниот речник се надоврза на претходната иницијатива на Владата кога беше дигитализиран и Правописот на македонскиот јазик.

Владата останува посветена на развојот и афирмацијата на македонскиот јазик. Влогот во јазикот е влог во иднината на нашата земја, затоа и оваа година и минатата ги зајакнавме капацитетите на институтот за македонски јазик, ги вработивме 24 нови научници кои го сочуваат македонскиот јазик и тоа е обврска на сите нас кои што во моментов ја имаме честа и одговорноста да ја водиме Владата, а пред се моја одговорност и обврска е да го предадеме сето тоа во наследство на нашите поколенија.

Благодарам за присуството, благодарам на овие познати наши изведувачи тука кои што ќе изведат неколку наши нумери. Благодарам и на овој млад господин тука што е со нас, јас во текот на овие денови успеав да ја посетам и синагогата во Њујорк каде што практично е синагогата и на нашите битолски Евреи кои што се дојдени овде, со кои навистина имавме емотивно дружење завчера“, рече премиерот Ковачевски во своето обраќање.