Македонија
Ковачевски и Пленковиќ на средба со г. г. Стефан: Изградбата на православниот храм за Македонците во Загреб е во духот на мултикултурализмот, кој силно го поддржуваме
Премиерот Димитар Ковачевски, заедно со својот хрватски колега Андреј Пленковиќ, во рамките на неговата официјална посета на земјата се сретнаа со поглаварот на МПЦ-ОА, г. г. Стефан.
На средбата, неговото блаженство, архиепископот охридски и македонски, г. г. Стефан, заедно со премиерот Ковачевски, упати голема благодарност до хрватскиот премиер Пленковиќ за поддршката на хрватската Влада во изградбата на македонската православна црква „Света Злата Мегленска“ во Загреб.
На средбата заеднички беше констатирано дека со изградбата на овој православен храм, прв од ваков вид, изграден на територијата на поранешна СФРЈ, се остварени децениските желби на македонското национално малцинство за свој верски дом во Хрватска.
Поглаварот на МПЦ-ОА, г. г. Стефан, и премиерот Ковачевски истакнаа дека неизмерно го ценат потегот на градот Загреб, кој додели земјиште за да се реализира изградбата на црквата, како и за донациите на Загреб и Сплит и донациите на нашите државјани, Македонци во Хрватска, кои ја помогнаа изградбата на овој православен храм во Загреб.
Премиерот Ковачевски потенцира дека со изградбата на православниот храм за потребите на македонското малцинство хрватскиот народ ги негува мултикултурниот дух и почитувањето на правата на различните малцинства што живеат во Хрватска.
Притоа беше истакнато и дека нема отворени прашања меѓу Католичката црква и МПЦ-ОА, која е во канонско единство со сите други православни цркви.
На средбата поглаварот на МПЦ-ОА, г. г. Стефан, и премиерот Ковачевски на премиерот Пленковиќ и на хрватскиот народ им упатија честитки во пресрет на претстојниот христијански празник Велигден, кој припадниците на католичката вероисповест го прославуваат неделава.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Познат идентитетот на Македонката која загина во тешка сообраќајна незгода во Грција, тешко повредени уште две девојки
Министерството за надворешни работи соопшти дека денеска во 12 часот по локално време, на автопатот Егнатиа, во Република Грција, се случила тешка сообраќајна несреќа, во која М.Н. (1995), државјанка на Република Северна Македонија го изгуби животот.
„Претставниците на Генералниот конзулат на Северна Македонија во Солун, кои од времето на настанатата трагедија беа во контакт со блиски на жртвата, остануваат на располагање за асистенција во врска со преносот на останките на починатата во земјата.
Воедно, информираме дека засегнати се и три наши државјанки, сопатници на починатата, А.К (2000) и М.Р (2000), кои добиле тешки повреди и И.Ј (1999) која не е повредена, при што се соодветно хоспитализирани“, соопшти МНР.
Генералниот конзулат останува во постојана комуникација со надлежните институции и на располагање на повредените наши државјанки и нивните семејства при евентуална потреба за помош, до нивното враќање дома.
Македонија
(Видео) Хеликоптер на МВР исфрли над 20 тони вода врз пожар во кичевско
Денеска хеликоптер Бел-412 од Одделот за воздухопловни единици на МВР, по добиено барање од ЦУК, дејствуваше на пожарот на отворено во атар на село Цер во општина Кичево, извести МВР.
Хеликоптерот исфрли над 20 тона вода и го стопира кракот што се наближуваше да зафати букова шума, соопшти МВР.
Македонија
Топлото време продолжува и во наредните денови, утре температурите до 40 степени
Времето утре ќе биде сончево и многу топло со мала до умерена локална облачност. Попладне облачноста ќе се зголеми. Ќе дува слаб до умерен ветер од западен и југозападен правец. Минималната температура ќе биде во интервал од 15 до 23, а максималната ќе достигне од 33 до 40 степени. UV=9
Во Скопје сончево и многу топло со мала до умерена облачност. Ќе дува слаб ветер од западен правец. Минималната температура ќе се спушти до 21, а максималната ќе достигне до 40 степени.
Во деновите од викендот нашето подрачје и понатаму ќе биде под влијание на многу топла воздушна маса од југ поради што времето ќе биде претежно сончево и натпросечно топло. Од понеделник во попладневните часови ќе има локален развој на нестабилна облачност со краткотраен пороен дожд и грмежи. Дневните температури ќе бидат во постепено благо опаѓање.