Премиерот и лидер на ВМРО – ДПМНЕ, Христијан Мицкоски, вечерва многу порано отколку во првиот круг прогласи голема победа на ВМРО  ДПМНЕ и коалицијата. Рече дека ако некој се сомневал, народот покажал дека „Македонија повторно е твоја“.

„Победивме во Скопје. Убедлива победа на Орце. Победивме во скопски Карпош. Победа и во Аеродром и во Чучер Сандево. Беше жилава тешка борба со многу предизвици. Се одлучуваше во пет до 12, знаете дека не заслужува ни името да му го спомнам тој противкандидат се обиде да профитира на името на националните поделби, на етничките поделби. Не успеа. Поразен е. Брвеница останува Јоцо градоначалник. Победивме и во Валандово, Дојран и Крушево кои што досега имаа градоначалници од СДСМ. Победивме и во Кочани. Нашето Кочани кое мораме да го издигнеме и поткрепиме. Имаме победа и во Лозово, Могила, Македонски Брод, Росоман, Ранковце, Неготино, Чешиново Облешево, Виница, Дебарца,  Кочне, Демир Капија, Пробиштип. Во неколку други се пребројуваат гласовите“, рече вечерва Мицкоски.

Посебно внимание во победничкиот говор тој посвети на Кичево.

„Морам да признам и да соопштам една посебно силна порака. Таа е од нашето Кичево. Падна Фатмир Дехари. Падна од народот кој се обедини против раскалашеноста, недомаќинското работење и се докажа дека никој не е посилен од народот. Но, покажавме и што можеме кога сме обединети. Таму соработувавме различни вери различни припадности, против оние кои го влечеа градот надолу. Ова ја отвора вратата дека можеме да се обединиме Македонци Албанци, Турци, Роми, Срби, Власи, Бошњаци и останати,  христијани и муслимани, ВМРО-ДПМНЕ, СДСМ и другите околу вредностите и во онаа политика која што им е потребна на граѓаните“, рече Мицкоски.

За него победата во Кичево е показател дека народот е поголем од политиката и вербата во подобро утре е посилна од секој страв. Најави дека во следниот период Кичево мора да биде во владиниот фокус.

„Помина и времето на локални шерифи кои градеа кариера преку малверзации, ситни манипулации, со децении се шалтаа од еден во друг ќош, само за политички да преживеат. Тоа време вечерва завршува и во скопски Карпош. Тоа е порака до сите оние кои со нечесни подземни игри мислеа дека ќе го излажат народот. Епа, вистината им се распрсна пред очи. Бомбата која ја спремаа за други им прсна во рака“, рече Мицкоски.

Овој резултат Мицкоски смета дека е силна порака за СДСМ и нагласи дека не е среќен поради нивниот дебакл, но ваквиот резултат смета дека е одраз на тоа пто партијата не се реформирала и не атила чекор со времето.

Изборите Мицкоски смета дека се голема порака и за ВМРО – ДПМНЕ.

„Овие избори се порака и до нас, да не се забегува во победата туку да се носиме со одговорноста дадена од граѓаните и да ја оправдаме. Да се менуваме и подобруваме. И таа порака е разбрана. Обврска да продолжиме уште посилно и да не се опуштиме ниту еден ден и да ја претвориме надежта во конкретни резултати“, рече Мицкоски.

Им се заблагодари на сите што им дале поддршка, на сите што гласале различно им порача дека ја почитува нивната одлука, а оние кои не излегоа на гласање им кажа дека ја слушнал и нивната тишина и нема да ги убедува со зборови туку со дела.

Најави дека вечерва ќе слави со народот во Брвеница и Кичево, а за неколку часа ќе тргне за Брисел оти од утре „мора да се продолжи со уште поголема одговорност“.

„Ова е пирова победа на режимот. Јас како претседател на Левица ќе упатам честитки само до кандидатите во Кичево и во Брвеница. Тоа значи дека нашата македонска платформа дава резултати доколку се обединиме. За разлика од нив сетете се што и направија на Јована во Струга“, кажа Димитар Апасиев вечерва на прес-конференција.

„Ако треба да опишам во еден збор како помина вториот круг, тоа е ВМРО стагнира, Левица дуплира. Од првиот круг, Орце од Драчево има освоено плус 3 и пол илјади гласа што е само три посто зголемување, а Амар од Чаир има освоено плус 30 илјади и 500 гласа. Ова покажува дека опозициските тенденции се престројуваат позади Левица“, рече Апасиев.

„Од втора партија на ниво на цело Скопје, вечерва обзнанувам дека сме прва партија, пред ВМРО-ДПМНЕ, во Центар, во Карпош и во урбаниот дел од Аеродром. По којзнае кој пат балистичко-врховистичката коалиција потфрли и Вреди ги зафркна ДПМНЕ насекаде кадешто очекуваа нивни гласови. За возврат на кусогледоста на Мицкоски, курбан отиде Западна Македонија, патриоти продолжете да си го гласате Мицкоски“, додаде Апасиев.

„Во поглед на неопределените ќе кажам дека 66 проценти од нив не излегоа на гласање. Тоа е многу неинтелегентно решение со ваков изборен модел. Или да објасниме пластично, две третини од скопјаните не гласаа, една третина гласаа. Од тие една третина, само една петина одлучија за сите нас. Дваесет проценти ВМРО-вци ќе ви ја стават чизмата во наредните четири години. Апелиравме дека неизлегувањето е неинтелегентно решение и тоа се покажа во пракса. До гласачите на СДСМ – ве пуштија низ вода, ја предадоа Струмица и Карпош, предадени сте од корумпираното раководство, престројте се позади нашиот бајрак, да ги победиме ДПМНЕ на наредни парламентарни избори“, кажа Апасиев.

Тој истакна дека Амар е новото лице на Левица.

„Амар од обичен левичарски воин вечерва стана специјалец, борбата продолжува“, додаде Апасиев.

Кандидатот на ВМРО-ДПМНЕ за градоначалник на Град Скопје, Орце Ѓорѓиевски, ја слави победата на денешните избори. Тој вели дека вечерва не победил само тој, туку дека победило Скопје.

„Скопје е ослободено!
Вечерва, не победив само јас.
Победивте вие. Скопје победи!
Победи идејата дека овој град може да стане место на достоинство, ред и иднина.
Победи народот кој реши да се спротивстави на неправдата, нашиот горд народ кој никогаш не се откажува!
Вечерва ја славиме победата на духот над безнадежноста,
на храброста, на народот над оние што го потценуваа, кој сега ги пративме во историјата.
Но вечерва, исто така, нашата борба не завршува тука. Само што почнува.
Влегуваме во ново време, време на работа и на дела, не на изговори.
Ние нема да застанеме додека секој човек не се чувствува горд што живее во своето Скопје.
Секоја улица, секој плоштад, секој дом во овој град бара работа, ред и правда.
И токму тоа ќе му го дадеме.
Ќе се борам. Ќе се бориме. Секој ден, со сета сила.
Ќе се борам против небрежноста, против хаосот, безредието и рамнодушноста која му ја оставија на овој град.
Ќе се борам за секое дете што заслужува подобра иднина, за секој човек што бара достоинство.
Им благодарам на сите кои стоеја со мене – моето семејство на кое многу му должам, мојот тим и сите вие!
Најмногу благодарам на Премиерот Hristijan Mickoski, мојот најсилен столб!
Ви се поклонувам!
И ќе завршам со една моќна мисла на големиот Винстон Черчил:
,,Историјата ќе биде наклонета кон мене, затоа што јас имам намера да ја напишам”
Да живее Скопје!
Да живее идејата дека најдоброто допрва доаѓа!“, објави Ѓорѓиевски на „Фејсбук“.