Македонија
Ковачевски: Нови потенцијали за соработка со Ватикан во области од заемен интерес

Во рамките на посетата на Светата столица, како дел од програмата за одбележување на 24 Мај – Денот на сесловенските просветители, светите Кирил и Методиј, претседателот на Владата на Северна Македонија, Димитар Ковачевски, заедно со министерот за надворешни работи, Бујар Османи, имаше средба со државниот секретар на Светата столица, Пјетро Паролин, и со секретарот за односи со државите, Пол Ричард Галагер.
На средбата беше истакнато дека дипломатските односи меѓу Северна Македонија и Ватикан од воспоставувањето на дипломатските односи бележат континуиран развој со високо ниво на меѓусебна доверба, разбирање и пријателство.
Круна на силната динамика на заемните пријателски односи, беше речено на средбата, беше монументалната посета на папата Франциско на Република Северна Македонија во мај 2019 година, настан од исклучително значење не само за унапредување на билатералните односи туку и за регионот.
Соговорниците на состанокот истакнаа дека духовните врски преку цивилизациското наследство на Мајка Тереза и светите Кирил и Методиј се преточуваат и во пријателски политички односи со Ватикан, кои во последните години се потврдени и преку зголемената динамика на билатералните средби на највисоко ниво.
На средбата стана збор и за подготовките на двете страни за потпишување договор, односно конкордат меѓу Северна Македонија и Светата столица за регулирање на статусот на Католичката црква во нашата земја, со што ќе се отворат нови потенцијали за соработка во повеќе области од заемен интерес.
Чествувањето на светите Кирил и Методиј во текот на денот продолжи со полагање венец на спомен-плочата на македонски јазик во папската базилика „Санта Марија Маџоре“. Програмата по повод чествувањето на светите браќа Кирил Методиј попладнето продолжува со концерт на светски познатиот тенор Благој Нацоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Добро е што ВМРО-ДПМНЕ не ги отфрла црвените линии

По објавената Резолуција со црвените линии, добро е што ниедна од партиите, ниту ВМРО-ДПМНЕ, не ги отфрла црвените линии ниту чекорите од планот кој го предложи СДСМ, велат од опозициската партија.
Во овој контекст, додаваат од СДСМ, уште еднаш нагласуваме дека самата Резолуција е во заеднички национален и државен интерес, ги содржи сите потребни одредници за заштита на македонскиот јазик, идентитет, историја и култура и предвидува јасни државни позиции и чекори во однос на евроинтегративниот пат.
„Што се однесува до коментарите на Мицкоски за „лажни и неточни историски факти“, јасно укажуваме дека такво нешто во Резолуцијата нема. Напротив, во неа се вградени прецизно, фактографски и историски, сите претходни резолуции и историски датуми во прогресот кон Европската унија, и нема ништо непрецизно. Порачуваме дебатата на оваа тема во иднина да продолжи конструктивно – на никој не му оди во прилог да се извртуваат тезите или да се укажува на неточности кои реално не постојат“, велат од СДСМ.
Од таму велат дека се отворени за сите конструктивни забелешки на партиите и сите политички чинители.
„Време е конечно да изградиме национален консензус во интерес на сите граѓани и да покажеме зрелост дека партиите може да соработуваат кога се во прашање повисоки цели и иднината на државата. Граѓаните од партиите очекуваат дијалог и соработка кога станува збор за нивната иднина. СДСМ е подготвен на тоа“, велат од СДСМ.
Македонија
Зошто уште не се фатени сите потпалувачи и нарачатели на пожарите, прашуваат од „Зелен хуман град“

После еден од најкацерогените месеци во Скопје каде скоро секој ден имавме нов пожар, тренд што дури и уште продолжува, ние немаме никакво известување од МВР дека сите сторители и нарачатели се приведени. На сите ни е јасно дека вакво потпалување не е спонатно и несреќен случај. Зарем се исцрпени државните капацитети за лоцирање на луѓе што директно убиваат скопјани со загаден воздух, прашуваат од Граѓанската иницијатива Зелен хуман град.
„Како вистински терористички напад, зошто не се пуштени сите капацитети на државата за лоцирање на сите одговорни за нападот врз нас скопјани? Се апси спорадично и не се апсат нарачатели, туку (дел од) извршители.
Може во моментов не осетивме премногу импакт врз нашето здравје, но за неколку години кога ќе рипнат бројките на белодробни заболувања, карциноми, инфертилност и сите други сериозни здравствени нарушувања поради загадувањето, тогаш ќе се свестиме?
Некој денес да дојде и да ти удри тупаница, веднаш ќе очекуваш полицијата да го уапси. Епа така овие не-луѓе ни удираат тупаници нам и на сите наши најмили (читај деца, внуци, родители), чии „модрици“ ќе ги осеќаме до крајот на животот“.
Дополнително од Зелен хуман град прашуваат зошто не се сите сторители и нарачатели веднаш зад решетки.
И зошто, како што додаваат, од МВР сѐ уште не се преземени построги мерки за превенција на идни пожари.
Според нив, ова досега како што велат, не беа инцидентни пожарчиња, туку смислен терористички напад врз скопјани и потенцираат дека мора да биде третиран како таков.
Македонија
Ниеден сектор не напредува, погрешните политики на власта ги плаќаат граѓаните, вели Филипче

Претседателот на СДСМ, Венко Филипче од струмичкиот регион истакна дека само СДСМ е тој кој ќе може да се спротивстави на ВМРО–ДПМНЕ.
„Само ние сме организирана структура, која што сега треба да ги научи грешките од лани, за да излезе на терен и да покаже сила, и енергија, и волја, дека сме ние тука и сме подготвени да се бориме” рече Филипче.
На средбите со граѓаните во Ново Село, Василево и Босилово, Филипче посочи дека во ниту еден сектор нема никакви резултати, што е показател за погрешните политики на ВМРО-ДПМНЕ.
„Една работа да најдеме, нема. Во земјоделството? Ништо. Ниту поддршка, ниту зголемени субвенции. Плачат лозари, плачат сточари, производителите на оризот, тутунарите. Во здравството да не зборам. Во образование? Ништо. Какви плати, ги лажат луѓето – ќе биде до година. Работниците? Ништо. Даваме предлог за платите? Ништо. Цените до плафон. Не можат луѓето да живеат повеќе. За европското прашање да не збориме, рече Филипче.
Во периодот на СДСМ, како што кажа, немаше ниту една лоша политика, мерките се креираа за граѓаните.
„Ние немаме лоша политика во ниту еден сектор. Зашто сакате ќе збориме? 300% социјална помош, платите ги зголемивме, дуплирана минималната платата. Во здравство, во образование во стопанството, со цените имавме контрола, кризите ги пребродивме. Ние бевме тука за луѓето, а Владата на ВМРО-ДПМНЕ не е за луѓето тука, не ги интересира“.