Македонија
Ковачевски за Онкологија: Секој криминал има име и презиме, наводите се грозни, МВР и Обвинителството ќе ги идентификуваат

За премиерот Димитар Ковачевски грозни се наводите за случувањата на Клиниката за онкологија каде што пациентите биле третирани со физиолошки раствор, а скапите антиканцерогени лекови за нив завршувале на црниот пазар. Тој вели дека за вакви случувања на Клиниката се слушаат наназад 20 години, но првпат се презема обемна акција од МВР и Обвинителството.
„Се работи за наводи кои се грозни. Не смеат да се случуваат, а тоа се наводи за кои сме слушале наназад во текот на 20 години. Ова е првпат да биде спроведена една ваква обемна акција за идентификување на можни сторители на вакви дела. Би сакал да повикам да не се прави сензационализам и напад на сите доктори и медицински сестри во државата бидејќи најголемиот дел од медицинскиот персонал кој што работи во нашата држава се извонредни луѓе, кадри кои што се грижат за здравјето на нашето население. Секој криминал има свое име и презиме има одговорност и задачата на МВР и на Обвинителството е да обезбеди докази врз основа кои ќе бидат идентификувани сторителите. Од страна на претседателот на Владата и од Владата нема да има никакви интервенции во однос на заштита на кого било “, рече премиерот Ковачевски.
Нагласи дека забележал во медиумите, посебно на социјалните мрежи дека се креира слика за вмешаност само на одредени лица во зависност од нивната припадност, што вели дека е сосема непотребно.
„Она што можам да го кажам е дека ваков тип на криминал е мултипартиски, мултиетнички и мултикултурен“, рече премиерот Ковачевски.
МВР и Обвинителството направија претрес на Клиниката за онкологија и во станови на некои од вработените по објавите во медиумите. Премиерот Ковачевски смета дека обемната акција на МВР и на Обвинителството е доказ дека сериозно се сфатени изнесените обвинувања во медиумите и најави дека на ист начин ќе постапат доколку постојат такви сомневања и за другите клиники.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Католичката црква со реакција за муралот на Мајка Тереза: Ова е навредлив чин за сите верници

Католичката црква во Македонија изразува жалење за, како што велат, недостојниот и навредлив чин со кој на муралот на света Мајка Тереза, поставен на „Школка“ во Градскиот парк во Скопје, е додадена марама на нејзиниот лик.
Со оваа постапка,велат од Католичката црква, се повредуваат верските чувства на верниците и почитувачите на делото на светицата.
„Потсетуваме дека Света Мајка Тереза е светица на Католичката црква, родена во Скопје, почесна граѓанка на овој град и граѓанка на светот. Со својот живот посветен на сиромашните и болните, со својата едноставност, понизност и љубов, ја направи Македонија и Скопје препознатлива во светот и пример за почит кон другиот.
После големиот настан што се случи на 28 септември 2025 година за сиот македонски народ со осветувањето на храмот Свети Константин и Елена кој се наоѓа во непосредна близина на Спомен куќата на Света Мајка Тереза, се прашуваме: Зарем нашата Светица заслужи ваков однос од дел од своите сограѓани?
Почитта кон верските чувства е основен елемент на секое демократско општество. Грижата за нив е одговорност на сите граѓани, а воедно ја отсликува и демократската зрелост кај поединци и групи, нивната подготвеност за соживот и прифаќање на различните.
Слободата на уметничкото изразување и јавната дебата се драгоцени вредности, но тие треба да се остваруваат со почит кон достоинството на другите и кон она што е свето за една заедница. Затоа недозволиво е светите ликови, како света Мајка Тереза, да бидат инструментализирани или злоупотребувани за било какви цели“, се наведува во соопштението од канцеларијата на Скопска бискупија и Струмичко-скопска епархија.
Во него се додава дека Католичката Црква се приклучува кон сите добронамерни граѓани кои веќе реагираа и го осудија ваквиот срамен чин и апелира до целата македонска јавност на поголема свесност за значењето на светците, светите простори и другите свети работи, како и вредностите во општеството што ги застапуваат Црквите и верските заедници.
„Во таа насока, ги повикуваме надлежните институции да преземат соодветни мерки, да ги заштитат верските чувства на граѓаните и во иднина да ги превенираат ваквите појави. Во исто време изразуваме благодарност до сите луѓе на изразената загриженост и поддршка која ја упатија до Црквата“, велат од канцеларијата на Скопска бискупија и Струмичко-скопска епархија.
Македонија
Муцунски во Мичиген: Дијаспората претставува силен мост меѓу двете земји

Во рамки на завршните активности од посетата на САД, министерот за надворешни работи и надворешна трговија, Тимчо Муцунски, заедно со претседателката Гордана Силјановска-Давкова, ја посетија Македонската православна црква „Раѓањето на Пресвета Богородица“ во Стерлинг Хајтс, Мичиген, како и Неделното црковно училиште во кое 120 деца имаат можност да се запознаат со православната вера, македонската традиција и да го изучуваат македонскиот јазик.
Делегацијата присуствуваше на утринската литургија што ја одржа отецот Синиша Ристовски и оствари средба со бројната македонска дијаспора.
Муцунски истакна дека дијаспората претставува силен мост меѓу двете земји и има значајна улога во градењето на врските меѓу македонското и американското општество, како и во промоцијата на македонската култура и традиција на американско тло.
„Изразуваме благодарност за топлиот прием. Остануваме цврсто посветени на зајакнување и продлабочување на контактите со нашата дијаспора,“ порача Муцунски.
Македонија
Костовски: Градиме модерен затворен пливачки базен во Радишани

Радишани добива нов модерен затворен базен, во вредност од 80 милиони денари, извести градоначалникот на Бутел, Дарко Костовски.
Како што соопшти градоначалникот, предност во користење на овој базен ќе имаат учениците од ОУ „Ацо Шопов“, но генерално ќе можат да го користат сите ученици, а и граѓаните во подоцнежните часови.
Тој најави и уште еден нов затворен базен во населеното место Бутел 1, во дворот на училиштето „Св. Климент Охридски“.