Македонија
Ковачевски: Платите во образованието се зголемени за 21%, дијалогот со синдикатите продолжува и решение ќе има

Покачувањето на минималната плата не би требало да биде причина за отпочнување протести. Тоа е плата покачена на работниците доминантно во приватниот сектор коишто работат во фабрики и во услужен сектор. Преку даноците од приватниот сектор се исплаќаат платите на сите коишто работат во јавниот сектор, а јавниот сектор има 138.000 вработени. Тие 138.000 ги примаат своите плати благодарение на придонесите, благодарение на даноците кои што ги плаќа приватниот сектор, тоа не треба да биде причина да се врши притисок и да се прават протести, истакна премиерот Димитар Ковачевски во врска со најавените протести од страна на повеќе синдикати поврзани со барања за зголемување на платите.
Претседателот на Владата на Република Северна Македонија истакна дека зголемување на платите треба да има, но со методолошки пристап.
„Сакам исто така да напоменам дека од 2017, 2018, 2019 најголем дел од платите се зголемени за 20 проценти, во образованието платите беа зголемени кумулативно 21 процент во изминативе години, платите исто така на лекарите беа зголемени, капитациите исто така беа зголемувани и финансиските средства коишто го издвојувавме за здравството“, истакна премиерот Ковачевски.
Тој рече дека Владата ќе продолжи со тој дијалог, меѓутоа истакна дека не е добро за економско социјалниот дијалог прво да се најави штрајк, а потоа под притисок да се доаѓа на разговори со Владата.
„Сепак, и во такви услови Владата разговара, нормално со сите претставници на синдикатите и јас сум сигурен дека на крајот на денот ќе изнајдеме решение кое што ќе биде на обострано задоволство и на работниците и секако на оние кои што ги плаќаат даноците за да се исплаќаат тие плати“, рече премиерот Ковачевски.
Премиерот Ковачевски се осврна и на исплатата на минималната плата во јавниот сектор каде има застој во одредени институции, односно не е сè уште исплатена минимална плата до 18.000 денари.
„При носењето на минималната плата јас кажав дека сите ќе добиваат минимална плата од 18.000 денари, а за тоа е потребно да се изменат одредени закони, коишто во моментов се во собраниска процедура. Затоа Владата веќе минатата недела донесе заклучок со којшто ќе биде овозможено оние кои што нема овој месец да ја добијат платата до 18. 000 денари таа разлика да им биде исплатена веднаш штом ќе биде донесен законот соодветен за административни службеници“, рече премиерот Ковачевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Албанците го казнија ДУИ, Таравари денес им се поклонува на Ахмети и Груби, велат од „Вреди“

Арбен Таравари денес е најголемиот политички срам на Албанците во Македонија. Од човек кој некогаш зборуваше за “промени“, тој се претвори во слуга на Али Ахмети и Артан Груби, станувајќи патерица на ДУИ нонграта, најкорумпираната и најомразената партија од страна на Албанците, истакнуваат од „Вреди“.
Таравари, додаваат од таму, не ја напушти власта поради принципи или поради интересот на граѓаните, туку за валкани лични зделки.
„Сомнителната инвестиција „Ѓока“ и неговите сомнителни зделки целосно го открија неговото вистинско лице: политичар подготвен да продаде сè за лична корист.
Денес, Таравари е близок соработник на криминализираната ДУИ, која две децении го држи развојот на Албанците како заложник. Служејќи им на Ахмети и Груби, тој ги предаде идеалите за кои некогаш повикуваше и сега се постави со оние што ги казнија албанските граѓани на 8 мај“.
„Вреди“ како што истакнуваат, јасно става до знаење: Албанците не заборавиле кој донесе сиромаштија, неправда и изолација. Според нив, Таравари денес е лицето на деградирана политика, која ги продаде сите каузи на Албанците за свои лични интереси.
„Нема да дозволиме неговите игри да го спасат ДУИ од политичка пропаст. Албанците избраа промени и оваа промена е незапирлива.
ВЛЕН е основана за да го искорени овој стар, скапан и продаден менталитет. Албанците се одлучија: нема да се вратат кај Тараварите кои се продадени за тендери, ниту кај Ахметите кои владееја преку страв и корупција. Затоа, денес јасно го кажуваме: Арбен Таравари е симбол на политичко предавство и вазал на ДУИ нонграта. Албанците никогаш нема да го простат ова кршење на нивната доверба. Историјата ќе го памети како човекот кој беше продаден, додека ВЛЕН како силата што ја донесе долгоочекуваната промена“.
Македонија
ДУИ: Од Балансер до Бадeнтер, план за рушење на уставниот поредок

Северна Македонија никогаш немала влада- по настроена против Охридскиот договор, против европската иднина и европската интеграција и повеќе од рамнодушна кон диктатот на српскиот свет од оваа што денес ја води државата, велат од ДУИ.
Според оваа партија, јавните ставови на претставниците на Владата против Охридскиот договор, се претворени во пракса.
„Да се каже дека „е време за укинување на Бадeнтеровото мнозинство“, едeн од клучните столбови на уставниот поредок на државата, не е случајност.
За жал, секојдневно сè повеќе им се дава простор на политички партии или политичари кои имаат опасни идеи – дека мултиетничките држави не функционираат, дека треба да постојат „етнички чисти“ држави. Ваквите идеи и идејатори се крајно опасни затоа што ги влошуваат меѓуетничките односи и водат кон нивно рушење. Ние сме сведоци дека оваа Влада има агенда систематски да го напаѓа Охридскиот договор, што се покажа со низа потези: укинување на Балансерот и непочитување на правичната застапеност, непочитување на албанскиот јазик и Законот за употреба на јазиците, како и барањето на ВМРО-ДПМНЕ Уставниот суд да го поништи Законот за јазици. Денес, иако постои Закон за употреба на јазиците, над 100 институции зборуваат само на еден јазик.
Понатаму, Владата неправедно го намалува бројот на советници во општините, со што се нарушува реалната застапеност на Албанците, спротивно на Уставот, Законот за локална самоуправа и одлуката на Уставниот суд“.
На почеток, велат од партијата на Ахмети, не ја почитуваа политичката волја на Албанците, ги избраа оние кои Албанците ги одбија.
„Потоа ја забранија употребата на националното знаме од државни функционери. Следно на удар беше албанскиот јазик. Потоа го нападнаа заштитниот механизам на правичната застапеност и го укинаа Балансерот. А сега читаме дека сакаат да го укинат и Бадентеровото мнозинство!
И овој план се реализира затоа што најдоа неколку Албанци кои за една функција се подготвени да се откажат од сè што има вредност за мултиетничката и унитарна држава“.
На 19 октомври, како што велат, народот ќе го даде својот одговор на референдумот. Според ДУИ, часот на политичката и правната одговорност се приближува.
Македонија
Зголемен интензитет на сообраќај поради летните одмори

На 27.08.2025 од 05:00 часот регионалниот пат Р-1106 Нова Брезница – Македонски Брод преку националниот парк Јасен ќе биде пуштен за сообраќај во термините од министерство за внатрешни работи. Се препорачува внимателно возење, почитување на сигнализацијата и прилагодување на брзината поради можни одрони на патот.
Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на граничните преминиод македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.