Македонија
Ковачевски: Со мерките на СДСМ растат производството и извозот на македонското вино
Со воведувањето на грантовите од 10.000 евра малите семејни винарници го модернизираат производството и активно учествуваат во развојот на лозарството и винарството, порача претседателот на СДСМ, Димитар Ковачевски, при денешната посета на винарницата „Брзанов“ во скопско Трубарево. Оваа винарница грантот од 10.000 евра за набавка на опрема, модернизирање на целиот процес за производство на квалитетно и конкурентно вино.
„Го отворивме патот за развојот на малите семејни винарници бидејќи во минатото имаше неколку државни винарници, кои беа големи и кои практично беа приватизирани, некои од нив навистина станаа познати брендови, други не постојат денес. Меѓутоа, малите семејни винарници денес прераснаа во наша гордост и препознатлив бренд на нашата држава. Денес, имаме вкупно 173 регистрирани мали семејни винарници“, изјави Ковачевски.
Притоа Ковачевски потенцира дека со правилни мерки и политики македонското вино сега бележи голем успех на странските пазари, а паралелно растат и извозот на пакувано вино и девизниот прилив.
„Пред 2017 ние извезувавме налевно вино. Шишињата ги полнеа странски винарници, ни го враќаа назад пакувано со етикети на други производители и држави. Од година на година бележиме зголемување на извозот на вино во шишиња наспроти извозот на налевно вино. Може да кажеме дека веќе надминавме 50 % извоз на пакувано вино од државата. Според последните податоци на World Top Export, први сме во регионот по извоз на вино и неговата вредност и според количините. Првпат пред Грција, а исто и пред Србија, Словенија, Бугарија, Хрватска и сите земји во регионот“, рече Ковачевски додавајќи дека девизниот прилив сега достигна околу 60 милиони евра годишно, со што Северна Македонија е на високото 13. место во светот според вредноста на извезеното вино.
Претседателот на СДСМ потенцира дека партијата го вреднува трудот на земјоделците. Над 7 милиони евра субвенции и годинава се исплатија точно на празникот Свети Трифун на сметките на лозарите. Како и другите земјоделци, на крајот од 2023 година им беа исплатени 30 % авансно од субвенциите за 2023 година, или 12.000 денари, со што вкупната субвенција што лозарите до сега ја добија изнесува 52.000 денари од хектар.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Сиљановска-Давкова ги прими акредитивите на новоименуваниот амбасадор на Алжир, Абделмаџид Наaмун
Претседателката Гордана Сиљановска-Давкова денеска ги прими акредитивните писма на новоименуваниот амбасадор на Народна Демократска Република Алжир, со седиште во Букурешт, Абделмаџид Наaмун.
Неговото именување, како што рече претседателката, е уште една потврда за добрите македонско-алжирски односи, втемелени на заемно разбирање и почит.
За неа, посветениот и професионален ангажман на амбасадорот Наамун ќе придонесе кон продлабочување на пријателските и партнерски односи на билатерален и мултилатерален план.
Истакнувајќи дека обете држави имаат богата историја и вредно културно наследство, Сиљановска-Давкова очекува интензивирање на соработката во културата, образованието и туризмот, како и во рамките на ООН и другите меѓународни организации.
На церемонијата, новоименуваниот амбасадор Абделмаџид Наaмун ја истакна својата желба да гради нови мостови на пријателство и меѓусебно разбирање.
Двајцата изразија загриженост за геополитичките предизвици со коишто се соочени сите држави и народи, без оглед на географската положба и големина. Тие ја потенцираа потребата од мултилатерализам како соодветен одговор и механизам за решавање на проблемите.
Сиљановска-Давкова и амбасадорот Наамун се согласија дека донесувањето правна рамка за регулирање на меѓусебните односи, како и размената на посети на највисоко ниво ќе ја поттикат соработката.
Соговорниците имаа усогласен став и во однос на потребата од реформи во Обединетите нации, како и за неопходноста од назначување на жена на највисоката позиција – генерален секретар.
Македонија
Петрушевски: Оставката на Љупчо Коцевски е значајна победа за правната држава
За првпат и самиот обвинител го признава тоа што целата јавност го кажуваше: дека Јавното обвинителство не може да продолжи да функционира со изгубен легитимитет, под товар на политички влијанија и со селективна правда, изјави Бране Петрушевски од ВМРО-ДПМНЕ.
„Фактот што оваа оставка доаѓа дури сега, а не уште од првиот ден кога беше очигледно дека институцијата е компромитирана, само дополнително ја потврдува длабочината на проблемот и обидите со месеци да се одржи статус кво кое служеше на поранешната власт. Со оваа оставка се става крај на еден мрачен период, во кој обвинителството беше перципирано како партизиран механизам, а не како независна институција во служба на законот“, вели тој.
Според Петрушевски, оставката е јасен сигнал за крајот на практиките на заштита на поранешната власт на СДС и ДУИ и почеток на процесот на департизација и европеизација на јавнообвинителската дејност.
„Оставката на Коцевски не е персонално, туку единствено системско решение. Ова е јасна порака дека никој не е недопирлив“, вели Петрушевски.
Македонија
Општина Бутел додели 4.000.000 денари финансиска помош на спортски клубови
Општина Бутел додели 4.000.000 денари финансиска помош на спортските клубови од општина Бутел.
„Локалната самоуправа секоја година ги поддржува спортските клубови и доделува спортски стипендии на најдобрите спортисти од Бутел. Во општина Бутел се градат спортско-рекреативни центри во секое населено место. Во општина Бутел вредноста на спортот и спортските успеси е најголема“, изјави градоначалникот Дарко Костовски.
Тој изрази надеж дека финансиска поддршка ќе поттикне напредок во сите спортови и спортистите ќе освојат европски и олимписки медали.

