Македонија
Ковачевски: Со членството во ЕУ, Северна Македонија станува дел од трговската суперсила
Претседателот на Владата, Димитар Ковачевски, вечерва се обрати на првата отворена трибина во рамки на кампањата „Ние сме Европа“, на која се говореше за економските придобивки од членството во ЕУ.
Првата отворена трибина се одржа на тема: „ЕУ за македонската економија”.
Осврнувајќи се на економските политики, премиерот говореше дека фокусот на Владата е насочена кон системски промени во зајакнување на човечкиот капитал, отворање нови работни места, зголемување на платите и пензиите, зголемени директни странски инвестиции.
Ковачевски истакна дека Владата се стреми да обезбеди подобро утре за сите граѓани во Северна Македонија и досега има направено рекордни резултати. Во своето обраќање, Ковачевски ги сублимираше резултатите споредено со период од 2016 година. Економскиот модел на Владата, во овој временски интервал до 2022 година резултира со историски намален број на невработени за речиси 52%, странски директни иневстиции за овој период зголемени 2,5 пати, просечната пензија е зголемена за 40%, а во 2023 година, просечната нето плата е историски највисока и изнесува 36.527 денари. Тоа се цели 230 евра повеќе во сечиј домашен буџет.
Овие позитивни показатели може да се зголемат и мултиплицираат, а единствениот начин да се направи тоа е продолжувањето на евроинтегративниот пат на Северна Македонија.
„Има многу показатели кои јасно покажуваат кој е позитивниот ефект од ЕУ, и тоа не само од членството туку и од самиот процес на пристапување кон Унијата. Тоа го искусиле сите земји кои се приклучиле во Европската Унија и за сите нив имало и сѐ уште има позитивни економски показатели кои обезбедиле многу повисок стандард и побогат живот за граѓаните. И Северна Македонија е таков пример, колку и да е нашиот европски пат долг и тежок. Во изминатите 30 години поддршката на ЕУ се проценува на над 3,3 милијарди евра преку грантови и макрофинансиска поддршка и тоа ние, и како држава, и како граѓани го гледаме во зголемените инвестиции, во зголемените плати, намалената невработеност, зголемената вработеност за кои зборував претходно. Влезот во ЕУ пак дополнително ќе ги зајакне позициите за нашите компании, ќе отвори нови трговски перспективи со што очекувано е да се обезбедат одржливи стапки на раст на БДП што пак во крајна линија ќе значи повеќе пари кај граѓаните и подобар животен стандард“ рече премиерот Ковачевски.
Претседателот на Владата во своето обраќање, истакна дека економската моќ на Европската Унија е огромна. Учество на ЕУ во светската економија и тргување е 16% и тие само во 2021 година имаат направено извоз од 2,18 трилиони евра. Со членството на Северна Македонија во ЕУ, нашата земја ќе стане дел од трговската суперсила.
„Европската Унија има единствен пазар од 500 милиони луѓе, што обезбедува континуиран раст на целиот сојуз, нешто што секоја земја членка поединечно нема никогаш да може да го постигне. Проценките велат дека бруто домашниот производ на ЕУ во целина е поголем за девет проценти токму како резултат на целосната интеграција на пазарот. Тоа преведено во реални пари за граѓаните значи приближно 850 евра дополнителен годишен приход по глава на жител. Процентите покажуваат дека ЕУ затоа што е голем пазар и затоа што земјите работат заедно нивните економии се за десет проценти поголеми само заради тоа. Тие десет проценти преведени во БДП изнесуваат 850 евра по глава жител дополнителен приход во секоја од државите во ЕУ“, рече на трибината Ковачевски.
Покрај претседателот на Владата на трибината свое излагање имаа и министерот за економија Крешник Бектеши и вицепремиерот за европски прашања Бојан Маричиќ.
„Нашата држава е дел од европскиот континент, но ние имаме друго минато и имаме други економски системи.Тоа можеме да го смениме само со економското чудо наречено Европска Унија“, кажа министерот за економија Крешник Бектеши на првата отворена трибина во рамки на кампањата „Ние сме Европа“, на тема: „ЕУ за македонската економија”.
„ЕУ е економско чудо што не дозволува десет или 20 луѓе да ја држат државата во заложништво. Ние како држава мора да работиме за младите, за нашите идни генерации да бидат успешни”, кажа министерот Бектеши и сподели пример.
„Од осамостојувањето до сега можеме да наброиме 10-15 бизнисмени кои се најголеми во оваа држава. Затоа ние како држава треба да работиме, младите нивната иднина да не ја гледаат во администрација, туку да работат, да станат конкурентни на пазарот и да сакаат да работат во приватниот сектор. Да сакаат да им конкурираат на овие олигарси. Нашите млади сакаат да одат да работат во странство затоа што таму можат да работат, да носат иновации и да им конкурираат на европските и светските мултимилионски компании. Затоа нашата иднина е Европската Унија, тоа е иднината на нашите млади. Младите ја сакаат Европската Унија, а ние сме тука тоа да им го исполниме“, истакна на трибината министерот за економија, Крешник Бектеши.
Вицепремиерот за европски прашања, Бојан Маричиќ, во своето обраќање рече дека ЕУ е економско чудо кое ни отвора можности и ги задржува младите во нашата држава.
„Основно прашање на оваа кампања е каде сакаме да припаѓаме. Дали сакаме да припаѓаме во најголемиот мировен, политички и економски проект или сакаме да веруваме во алтернативни приказни во коишто многу малку луѓе веруваат и од кој никој нема видено придобивки. Доказ за економските придобивки кои ги нуди ЕУ се државите кои пред десет или 20 години станале членки. За изминатите 15 години ние имаме една милијарда евра европски пари искористено, а Хрватска откако е членка има искористено 25 милијарди евра, тоа е огромна разлика. Северна Македонија без дилеми припаѓа во ЕУ и нашите граѓани без дилеми сакаат да бидат дел од ЕУ. Да ги задржиме нашите млади луѓе тука, да им ги отвориме овие можности дома, да го создадеме нашето економско чудо тука, преку Европска Унија“, кажа Маричиќ на вечерашната трибина.
На трибината говореа и Хозе Луиз Лозано Гарсија, амбасадор на Кралството Шпанија во земјава, Благица Петрески од Finance Think, као и Ирена Јакимовска, од компанијата Комфи Ангел.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски: Секој кој ја добил довербата на граѓаните е денешниот современ патриот
Претседателот на ВМРО-ДПМНЕ, Христијан Мицкоски, се обрати од денешниот настан одржан во општина Дојран, во рамки на вториот круг од локалните избори кои ќе се одржат на 2 ноември годинава. Мицкоски зборуваше за случувањата за време на изборната кампања и за тоа што следува во наредниот период. Тој истакна дека ВМРО-ДПМНЕ е партија која легитимитетот го црпи од граѓаните, а како што вели, секој оној кој ја добил довербата од народот и работи чесно и трудољубиво е денешниот современ патриот, илинденец и асномец.
,,Нема да биде лесно, ќе биде тешко, не памтиме ние лесни времиња, во суштина, многу предизвици, затоа сме ние да ги решаваме тие предизвици, не да лелекаме, не да кукаме, затоа е ВМРО-ДПМНЕ, затоа е оваа коалиција која што ја предводи ВМРО-ДПМНЕ, да ги решава проблемите“, рече Мицкоски.
Мицкоски истакна дека довербата која граѓаните ја дадоа на ВМРО-ДПМНЕ и коалицијата за овие локални избори, во првиот круг од истите, е од историски размери.
,,На овие локални избори, граѓаните дадоа доверба, а коалицијата која што ја предводи ВМРО-ДПМНЕ во историски размери, како никогаш до сега. Јас сум убеден дека на овие 33 градоначалници, кои што се избрани во првиот круг, ако се додадат овие нови два, бидејќи противниците се откажаа, веќе се 35 убеден сум, дека на овие 35 ќе се додадат и преостанатите 24 и бројката ќе биде 59“, кажа Мицкоски.
ВМРО-ДПМНЕ е партија која легитимитетот го добива од граѓаните, и како што вели Мицкоски, таа доверба нема да се изневери и само ќе се надградува.
,,ВМРО-ДПМНЕ е партија која што својот легитимитет го добива, тој легитимитет извира од граѓаните. И ние со нашето работење нема никогаш да дозволиме таа доверба да ја прокоцкаме, таа ја доверба да ја изневериме, туку напротив ќе се трудиме со нашето работење да покажеме и докажеме дека сме ја заслужиле таа доверба и дека само ќе ја надградуваме“, истакна Мицкоски.
Мицкоски посочи оние, кои според него, работат искрено, чесно и трудољубиво да ја оправдаат довербата кој граѓаните им ја даваат се денешните современи патриоти, асномци и илинденци, а не тие кои се кријат зад црни кампањи и ад хоминем напади.
,,Секој оној, кој што добил можност, ја добил довербата на граѓаните, и кој што работи напорно, чесно, трудољубиво, којшто е вреден, којшто не се однесува надмено, туку напротив, се однесува понизно, кон граѓаните кон народот, кој што го избрал, е денешниот современ патриот, е денешниот гемиџија, е денешниот илинденец, асномец“, рече Мицкоски и додаде:
,,Не оној кој што седи зад статусите и се крие со лажни имиња, кој што навредува кој што лаже, кој што води црни кампањи, кој што напаѓа ад хоминем, со ниски страсти, тие не се патриоти тие се измамници“.
Македонија
Тентов: Време е во Дојран да ја заокружиме промената што ја започнавме на 19 октомври
„Дојран е скапоценост на Македонија, но таа скапоценост мора повторно да биде препознаена. Ни треба развој, ни треба визија, обединување, а тоа може да го направиме заедно“, вели Илија Тентов, кандидат за градоначалник на општина Дојран од редовите на ВМРО-ДПМНЕ, кој се обрати од денешниот настан одржан во Дојран.
Тентов истакна дека со поддршката од Владата, во Дојран ќе се реализираат проекти кои ќе го подобрат животот на граѓаните.
„На 2 ноември гласате за иднината на вашите деца, за нашето вековно езеро, за урбанизиран Дојран, почисти улици, подобар туризам, за поголеми инвестиции, за вистинска шанса младите да останат овде, во својот дом“ рече Тентов.
Тентов ги повика граѓаните обединето да излезат на гласање и да го заокружат бројот 9, да го направат вистинскиот избор за сигурна иднина и развој на Дојран.
„Време е да ја потврдиме победата, време е да покажеме дека Дојран стои цврсто, обединет и достоинствен. Време е да ја заокружиме промената што ја започнавме. На 2 ноември да излеземе масовно, да ја подигнеме главата гордо и да гласаме за бројот 9. За работа, за сигурност, чесност и достоинство, за иднина. Да гласаме за Дојран што ќе блесне како никогаш досега“, истакна Тентов.
Македонија
Мицкоски: Очекуваме во вториот круг бројката на гласови за Орце Ѓорѓиевски да биде околу 125-130 илјади
Христијан Мицкоски, претседателот на ВМРО-ДПМНЕ, се обрати од денешниот настан одржан во Валандово, во рамки на вториот круг од локалните избори кои ќе се одржат на 2 ноември 2025 година. Мицкоски се осврна на темата за локалните избори, од кои првиот круг беше одржан на 19 октомври годинава, а ВМРО-ДПМНЕ имаше победа во 33 општини. Според него, ова е историски резултат во независна Македонија, а дополни и дека кандидатот од редовите на ВМРО-ДПМНЕ за градоначалник на Град Скопје е во водство 3:1 во однос на неговиот противкандидат.
,,Ние цела кампања, од првиот ден до последниот, па и до ден денешен, ниту во еден момент не објавивме негативен спот за нашите политички противници, ниту во еден момент не водевме црна кампања, ниту во еден момент не ги нападнавме ад хоминем, ниту со ниски страсти“, вели Мицкоски.
Мицкоски зборуваше за опозицијата, која според него, од првиот ден на изборната кампања водат црна кампања, а тоа се пресликува и за време на вториот круг од изборите.
,,Тие од првиот ден, до последниот ден, па и денеска, водат црна кампања. Мене ме спакуваа во парчиња во куфер, па потоа ми велеа дека ме презираат и што ли не им се случи. И резултатот од сето тоа го видоа граѓаните на 19 октомври, само 3 општини. Ние сме демохристијанска партија, ние со добро треба да ги совладаме нашите политички противници, само така ќе покажеме дека можеме поинаку, и дека сме поразлични од другите“, рече Мицкоски.
Како што кажа Мицкоски, ВМРО-ДПМНЕ на 19 октомври освои 33 општини, а изминативе два дена, двајца од противкандидатите на кандидатите од редовите на ВМРО-ДПМНЕ се откажале, и според него веќе може да се зборува за 35 градоначалници, што е историски резултат.
,,Тоа што е зад нас, еден факт кој што е немилосрден. Тоа се бројки. После првиот круг, ВМРО-ДПМНЕ и коалицијата која што ја предводи ВМРО-ДПМНЕ освоија 33 градоначалници. Изминативе 2 дена, два противкандидати на нашите кандидати за градоначалници е откажаа, така што веќе можеме да зборуваме за 35 градоначалници“, истакна Мицкоски и додаде:
,,ВМРО-ДПМНЕ и коалицијата водат, имаат веќе освоено градоначалник или се во круг како второпласирани, но тоа се во 6 општини каде што е многу мала, но и значителна разлика во вкупно 59 општини. До сега ваков историски резултат во независна Македонија не се случил“.
Мицкоски се осврна и на трката за градоначалник на Град Скопје, каде, како што рече, кандидатот од редовите на ВМРО-ДПМНЕ, има предност 3:1 во однос на неговиот противкандидат, а истакна и дека очекува бројката на гласови за кандидатот на ВМРО-ДПМНЕ да биде околу 125-130 илјади во вториот круг од изборите.
,,Како коалиција предводена од ВМРО-ДПМНЕ, имаме победа или мнозинство во 58 општини во Македонија, и конечно на крај да споменам дека идниот градоначалник нашиот главен град, Скопје, има предност од 3:1 во однос на неговиот противкандидат, 92-3 илјади наспроти 30 илјади. И убедлива победа за Советот на Град Скопје, но истовремено очекуваме после вториот круг бројката на гласови за Орце Ѓорѓиевски да биде околу 125-130 илјади“, нагласи Мицкоски.
Мицкоски додаде и дека ова е една од најточните и најпрецизни кампањи, со јасна порака, јасна визија и јасна дефиниција, што според него, ќе се постигне во годините кои следат.
,,Вие сте нашата инспирација, вие сте нашиот мотив, да продолжиме да се бориме, бидејќи вреди да се бори човек за секој еден кој што остана тука дома, да се бориме заедно за нашата татковина заедничка Македонија“, заклучи Мицкоски.

