Македонија
Кои политичари се фотографирани со криминалци од подземјето – од пријателства до случајни средби

Последниве четири години стана правило по секоја мафијашка пресметка со убиство, во јавноста да испливаат фотографии од политичари со криминалците. Насмеани, многу често и прегрнати, македонските политичари и високи функционери имаат разни објаснувања за нивниот однос со криминалците.
Дали се работи за средби кои биле намерни или случајни? Некои од политичарите ја коментираат заднината на фотографиите, други не. Додека едни велат моментот е овековечен од заедничка средба со граѓани, други во минатото јавно проговорија за пријателствата, трети молчат.
Последна во низата вакви фотографии беше онаа на претседателот Стево Пендаровски со Орхан Бајрами-Оки, кој беше убиен викендов во Грција.
Ликвидираниот Оки ѝ е познат на македонската јавност како дел од мафијашкото подземје. Го сметаа за неформален лидер на групата „Дуќанџик“. Беше инволвиран во неколку вооружени инциденти, а познат е и за македонската полиција.

Орхан Бајрами-Оки со претседателот Стево Пендаровски
Од претседателскиот кабинет за „Макфакс“ посочија дека Пендаровски се фотографирал со сите што ќе побарале. Според нив, фотографијата е направена пред четири години за време на кампањата за претседателските избори. Прашани како може Пендаровски да биде во друштво на водачи на наркокланови, како што се сметаше Оки, тие рекоа дека безбедносни процени за лица што спонтано приоѓаат за фотографирање не се прават.
,Бајрами бил виден и во друштво со градоначалникот на општина Сарај, Блерим Беџети, кој е дел од огнената група на ДУИ. Фотографијата е направена во угостителски објект.

Орхан Бајрами-Оки и градоначалникот на Сарај, Блерим Беџети
„Макфакс“ испрати прашање до Беџети дали се познавал лично со Бајрами и дали бил запознаен дека станува збор за лице од подземјето, но од таму до овој момент не е пристигнат одговор.
Пред убиството на Оки, во март годинава беше убиен негов близок пријател, Јетон Кривањева-Жила во Старата скопска чаршија. Слично како и убиството на Оки, и во случајот на Жила убиството беше извршено од неколку лица, кои со автоматски пушки влегоа во кафуле и пукаа.
Жила, исто како и Оки, важеше за еден од главните водачи на „Дуќанџик“, двајцата имаат многу заеднички фотографии.

Шеваљ Муареми, Јетон Кривањева-Жила и Орхан Бајрами-Оки

Јетон Кривањева-Жила, Шеваљ Муареми и Орхан Бајрами-Оки
По убиството на социјалните мрежи, осамна фотографија од Жила со претседателот на Собранието, Талат Џафери, во неговиот кабинет, а за чија заднина „Макфакс“ не доби одговор од кабинетот на Џафери.

Јетон Кривањева-Жила и претседателот на Собранието, Талат Џафери
Фотографии се појавуваа и по убиствата поврзани со браќата Идризи.
На крстосница во Чаир со 80 куршуми беше убиен Камер Идризи, а само една година подоцна на истото место и неговиот брат Јонуз Идризи. Името Камер Идризи допре до јавноста откога стана извесно дека е едно од лицата врз кое беше пукано во хотелот „Александар палас“ во 2019 година.
Непосредно по убиството, повторно се појавија фотографиите. Вниманието беше насочено кон фотографија на Камер Идризи со тогашниот градоначалник на Бутел, Велимир Смилевски, но и со ексгенералниот секретар на Владата, Мухамед Зекири.

Камер Идризи и ексгенералниот секретар на Владата, Мухамед Зекири
Зекири тогаш не одговори на повиците за да каже од каде се познаваат со Идризи, а Смилевски рече дека биле другари цел живот.
Ексградоначалникот во таа пригода за „А1он“ рече дека не знае за неговиот бизнис, ниту разговарал за тоа. Се дружеле, рече Смилевски, а за разлика од коментарите во јавноста, каде што Идризи е преставен како „лице познато на полицијата“, градоначалникот рече дека не го познава како таков.

Камер Идризи и ексградоначалникот на Бутел, Велимир Смилевски
Прашан дали знае зошто Идризи бил убиен, градоначалникот на Бутел рече дека не знае.
„Сме разговарале за фамилијарни работи, се консултирал со мене, а за други работи – не. Тој главно работеше во ‘Комунална хигиена’ и беше контролор на трета смена, како внатрешна контрола. Од дете, од 17 години, мислам дека работеше таму“, рече тогаш Смилевски.
Во минатото не изостануваа ни фотографии од политичари со избеганиот Шеваљ Муареми, кој важи за познат наркобос од Грчец, а се споменуваше и во дел од бомбите.
Муареми, исто како и во случајот со Оки, Жила и со Идризи, се поврзуваше и со пукањето во „Александар Палас“ на крајот на 2019 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Денеска топол ден низ цела Македонија

Управата за хидрометеоролошки работи (УХМР) информира дека денеска нѐ очекува претежно сончево и топло време, со слаб до умерен ветер, а долж Повардарието повремено ќе дува и засилен северен ветер.
Минималните утрински температури се движат од 8 до 18 степени, додека максималните ќе достигнат од 26 до 33 степени Целзиусови. Метеоролозите најавуваат стабилни услови во текот на целиот ден.
Во Скопје, времето исто така ќе биде сончево и топло. Ќе дува умерен, а во одредени делови од котлината и повремено засилен северен ветер. Температурата во главниот град ќе се движи од 14 до 31 степен.
„Очекуваме стабилно време и во следните денови, со претежно сончеви периоди и температури кои ќе останат високи за овој период од годината“, велат од УХМР.
Македонија
(Видео) ВМРО-ДПМНЕ ги објави имињата на уште осум кандидати за градоначалници

Извршниот комитет на ВМРО-ДПМНЕ, вечерва во Штип определи уште осум кандидати за градоначалници за претстојните локални избори.
ВМРО-ДПМНЕ донесе одлука да му предложи на Централниот комитет.
1. Македонски Брод – Жарко Ристески.
2. Могила – Драганчо Саботковски
3. Пробиштип – Тони Тоневски
4.Богданци – Марјан Пеев
5. Демир Капија – Наталија Димитриева
6. Росоман – Ѓорги Крстевски
7. Новаци – Стевче Стевановски
8. Дебарца – Златко Силјановски
Пратеникот Антонијо Милошоски по состанокот изјави дека овие 8 кандидати за градоначалници се одговорни, исполнителни личности кои што својата активност ја докажале не само во рамките на коалицијата на ВМРО-ДПМНЕ туку имаат углед и во самите општини. Ним ќе им биде препорачано во следниот период, да си отворат што поголема комуникација со локалните граѓани во општините за да може да поработат директно на терен за составување на програмата која што е потребна за локални избори.
Централниот штаб ќе биде на располагање заедно со еден тим кој што ќе биде формиран за локалните избори, да им помогне за одредени проекти, кој што се од поголемо капитално значење за Македонски брод, Могила, Новаци, Пробиштип, Богданци, Демир Капија, Росоман и Дебарца.
„Цениме дека со овие 8 вечерва објавени кандидати за градоначалници и претходните 25, ВМРО-ДПМНЕ со самодоверба чекори кон локалните избори бидејќи сме единствената партија која што во моментов има обзнането имиња на 33 кандидати за градоначалници за кои што сметаме дека се на добар пат и да ја добијат довербата на граѓаните“, рече Милошоски.
За оние кои што се актуелни градоначалници, партијата смета дека дека со досегашната работа, ќе имаат добар кредит да ја добијат и понатамошната доверба.
Македонија
СДСМ: Јавното обвинителство се обиде да ја релативизира одговорноста на актуелните функционери

Според СДСМ, со денешната прес-конференција, Јавното обвинителство уште еднаш потврдило дека постои сериозен обид да се минимизира и релативизира одговорноста на носителите на актуелни функции и институции поврзани со трагедијата во Кочани.
Од опозициската партија велат дека наместо да се лоцира институционалната одговорност и да се повикаат на одговорност директорите на Државниот пазарен инспекторат, УЈП и други релевантни органи кои имаа обврска да постапуваат, фокусот се префрла на индивидуални случаи и на маргинални групи, избегнувајќи ја суштината – зошто и како фирма увезувала и со месеци продавала опасна пиротехника без дозвола, и кој тоа го дозволил.
Дополнително, како што се додава, наместо да се отворат посебни истраги за секој аспект од случајот – за незаконскиот увоз, за институционалниот надзор, за реакцијата на полицијата и за конкретните пропусти на диското, Обвинителството сѐ спакува во еден предмет, со што ризикува да се развлекува постапката со години, па дури и децении. Со ваков пристап, правдата станува недостижна – а тоа е неприфатливо.
„Сериозно прашање е и одлуката приведените полицајци и полициски функционери, кои биле одговорни кобната вечер, да се пуштат на слобода со мерки за претпазливост. Особено загрижува фактот дека двајца од нив биле пресретнати на пат кон граница со Бугарија, што отвора сомнеж за можно бегство и криење на вината.
СДСМ уште еднаш потенцира – без целосна и непристрасна истрага, без одговорност за институциите и носителите на функции кои затаиле, нема да има вистинска правда за жртвите и нивните семејства.
Граѓаните гледаат. И со право очекуваат правда“, се додава во партиското соопштение.