Македонија
Констатирана оставката на потпретседателот на Собранието, Весел Мемеди
Собранието на Република Северна Македонија на денешната седница ја констатираше оставката на потпретседателот и пратеник од НДП, Весел Мемеди.
Тој во обраќањето до пратениците ја обраложи оставката, посочувајќи на несериозен пристап кон НДП како мала партија и коалиционен партнер, но и нечесна политичка игра по завршувањето на промените во државата.
„Според нашите сознанија, играта била зачувување на интересите на СДСМ и ДУИ, за сметка на една друга помала политичка партија. Договорот бил постигнат многу порано помеѓу Ахмети и Заев, за трансформација на Секретаријатот за спроведување на охридскиот договор во посебно министерство. На тој начин, бидејќи не било можно Албанците да водат 6 министерства, трампата на министерствата ‘1 за 1’, Ахмети се обидел да ја прикрие пред Албанците со изговор дека тој не жртвувал ниту едно министерство, компензирајќи за новото министерство. Од другата страна, Заев ќе ја продаде приказната кај Македонците дека не попуштил пред Ахмети за едно министерство плус, туку успеал да им го земе Министерството за локална самоуправа. Ем волкот сит, ем овците на број“, рече Мемеди.
Тој истакна дека со самото разрешување на министерот Фазлиу, Заев и Ахмети како нова власт, ја потврдиле погубната филозофија во политиката за именување и разрешување кадри. Мемеди упати низа обвинувања на адреса на Ахмети и во врска со Исламската верска заедница.
„Како потврда на кажаното досега, јавноста, а особено чесните луѓе, се уверија преку последните случувања во земјата. Г. Ахмети, припадниците на Исламот во целина, а посебно тие кои ви верувале и чекале 13 години да ги средите работите во ИВЗ, останаа шокирани од вашите приватни разговори со вашите најблиски соработници, за понижувачкиот однос што го имате врз душевната институција ИВЗ и дека воопшто не ве интересирало средувањето на работите во оваа институција, туку слатко се смеете што сте успеале да го претворите во седиште каде се пие најскапиот алкохол. Повеќе од тоа немаме коментар. Само се молиме на Господ да не испадне истото и со вистинските војници, кои верувале во нивниот командант и биле спремни да го дадат нивниот живот за вашиот кажан збор“, рече Мемеди.
Тој на премиерот Зорам Заев му порача дека методот и сценариото кои ги употребил СДСМ спрема албанските коалициони партнери, и конкретно спрема нивните кадри и функционери со ангажирање на Финансовата полиција и политикото искористување на антикорупциската комисија, за нив се познати удбашки методи.
„Преку таквите методи, се врши притисок и уцена кон сите албански личности и кадри, од функционери па до најниските административци, за да се одвојат постепено од нивната матична албанска партија и да ја прифатат политичката платформа на СДСМ како нивна, по можност во иднина и јавно да се зачленуват во СДСМ со цел ослабување на улогата на политичкиот албански фактор во власта. Ова е истата логика која ја применуваше и ВМРО кон албанските кадри и можете слободно и сами да се уверите колку е трагикомично. СДСМ треба веднаш да престане со копирање на лажната и трагичната филозофија што ја наметнала претходната власт, ако веќе не е доцна“, додаде Мемеди.
Мемеди оставката ја поднесе лут на премиерот Зоран Заев и владината коалиција што без негова согласност донеле одлука да го разрешат министерот за локална самоуправа Сухејл Фазлиу и на негово место да дојде Горан Милевски од ЛДП. Заев тврдеше дека на НДП им било понудено да предложат министер без ресор, додека Мемеди рече дека немал намера да прави политички пазар за смена на министерства.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Герасимовски: Ги прошируваме капацитетите на „Јохан Хајнрих Песталоци“, го санираме покривот и создаваме подобри услови за учениците
Кандидатот за нов градоначалнички мандат во Општина Центар, Горан Герасимовски, најави проширување на капацитетите на ООУ „Јохан Хајнрих Песталоци“.
„Со зголемувањето на бројот на ученици, потребата за дополнителен простор стана приоритет. Затоа ќе инвестираме во проширување на капацитетите на училиштето со изградба на нови училници,“ рече Герасимовски.
Во програмата се предвидува и промена на фасадната столарија и подовите, како и партерно и хортикултурно уредување на дворот на училиштето.
Дополнително, по промената на кровот на училиштето, реконструкцијата на отворените игралишта и тековната санација на покривот врз спортската сала, „Ј.Х. Песталоци“ ќе биде целосно реконструирано.
Македонија
Обвинителството побара притвор за директорот и за управителот на „Комунална хигиена“
Скопското обвинителство побара притвор за в.д. директорот на ЈП „Комунална хигиена“ – Скопје, Сабахудин Рустеми, и за еден управител за отпад во претпријатието во рамките на истрагата што се води против нив за кривично дело загрозување на животната средина и природата со отпад.
„Осомничените, од кои едниот в.д. директор, а другиот управител за отпад во ЈП ‘Комунална хигиена’ – Скопје, заедно постапиле спротивно на Законот за управување со отпадот и на својата основна дејност за редовно собирање и транспортирање безопасен отпад на подрачјето на град Скопје, како и на обврските предвидени во оперативната програма за собирање и транспортирање на комуналниот отпад и на оперативниот план за одржување на јавната чистота во градот. Со пропуштање на целосниот надзор над собирањето и транспортирањето комунален отпад, како и со непрописното управување со отпадот, тие овозможиле во текот на месецот да се создадат мали депонии на јавни и сообраќајни површини во близина на предвидените садови за собирање комунален отпад со што предизвикале значително оштетување на квалитетот на почвата, воздухот и водата и ги довеле во опасност животот и здравјето на луѓето од предизвикување заразни или други болести“, велат од Обвинителството.
Од таму додаваат дека ваквите сомненија се утврдени и констатирани со вонредните инспекциски надзори од овластените локални инспектори за животна средина кои излегоа на терен по насоки на јавното обвинителство, како и со експертско мислење за влијанието на отпадот врз јавното здравје и можноста за ширење заразни заболувања од ЈЗУ Институт за јавно здравје.
„Поради опасност од влијание врз сведоци и можност за повторување на делото, јавниот обвинител до Основниот кривичен суд Скопје достави предлог за определување мерка притвор за двајцата осомничени“, соопшти Обвинителството.
Македонија
Директорот на „Комунална хигиена“ и раководителот сè уште во полициска станица
Директорот на ЈП „Комунална хигиена“ – Скопје, Сабахудин Рустеми, и уште едно раководно лице сè уште се наоѓаат во полициска станица по приведувањето во врска со проблемот со отпадот во главниот град.
„Лицата се задржани и постапката е во тек“, велат од Јавното обвинителство.
Од тука вчера соопштија дека лицата се приведени во врска со сомненија за кривично дело од член 230 од Кривичниот законик или, како што појаснуваат, станува збор за загрозување на животната средина и природата со отпад.
Владата претходно го задолжи Министерството за внатрешни работи во координација со Државниот комунален инспекторат, Државниот инспекторат за животна средина, Државниот санитарен и здравствен инспекторат и Институтот за јавно здравје да изврши вонреден инспекциски надзор во Град Скопје и во „Комунална хигиена“ со цел да се утврди состојбата со отпадот во главниот град и да се преземат соодветни мерки.
Во врска со приведувањето во текот на вчерашниот ден реагира градоначалничката на Скопје, Данела Арсовска, која на „Фејсбук“ со иронија напиша дека директорот, кој е кадар на ДУИ, бил пуштен од станица кога во полиција по убедување им кажал дека во срцето и душата е „Влен“. Арсовска вината ја лоцира кај претседателката на управниот одбор на претпријатието, Јулијана Спировска, за која исто со доза иронија напиша дека неа не ја апсат оти имала албум со фотографии со сите функционери од ВМРО-ДПМНЕ.

