Македонија
Конференција за унапредување на правата на ЛГБТИ-заедницата

Социјалната заштита, здравството, образованието, вработувањето, пристапот до правда, домувањето, спортот и медиумите за ЛГБТИ-лицата се темите за кои се носат конкретни заклучоци на дводневната регионална конференција за унапредување на правата на ЛГБТИ-заедницата во земјата.
Конференцијата е во организација на Министерството за труд и социјална политика во соработка со Советот на Европа, а на неа денеска говореа министрите за труд и социјална политика, за внатрешни работи и за здравство, Мила Царовска, Оливер Спасовски и Венко Филипче, како и претставничката од Советот на Европа, Елени Цецеку, и Билјана Гинова, копретседавач на ЕРА.
Министерката за труд и социјална политика, Мила Царовска, истакна дека годинава е направен историски чекор напред со носењето на новиот Закон за спречување и заштита од дискриминацијата, кој се темели на Уставот на Република Северна Македонија, во кој се утврдени основните слободи и правата на човекот и граѓанинот. Ја ратификувавме Истанбулската конвенција за спречување на сите форми на насилство и отворивме шелтер-центар за заштита на жртви од насилство.
„Свесни сме дека сè уште се потребни значителни напори за спротивставување на нетолеранцијата кон ЛГБТИ-заедницата. Позитивните промени можеме да ги донесеме само заедно бидејќи секој од нас има улога и општествена одговорност. Токму како резултат на оваа конференција ќе имаме акциски план за унапредување на правата на ЛГБТИ и на национално и регионално ниво, кој ќе можеме понатаму да го користиме за носење стратегија за надминување на хомофобијата и трансфобијата. Остануваме посветени на зајакнување на владеењето на правото и унапредување на квалитетот на животот за сите“, рече Царовска.
Министерот за внатрешни работи, Оливер Спасовски, рече дека кога се говори за еднаквиот пристап до правдата, нема никаква дилема – секогаш се тргнува од фундаменталното уставно-правно начело на еднаквост пред законите. Дополнително, со дефинирањето на кривичното дело омраза како кривично-правно дејство, насочено, меѓу другото, и кон припадници на ЛГБТ-заедницата, во Кривичниот закон на РСМ од крајот на минатата година, се овозможи натамошно продлабочување и прецизирање на постапките и процедурите на полициското работење во таквите случаи.
„Убеден сум дека од огромна важност е да се допре до секој поединец во преиспитување на предрасудите, на штетните застарени практики и поведенија, на дискриминацијата по кој било основ, вклучително и по основ на сексуалната ориентација на луѓето. Искрено, очекувам оваа конференција да даде своја квалитетна контрибуција во таквите наши напори за градење правично, просперитетно општество за сите“, истакна министерот Спасовски.
Министерот за здравство, Венко Филипче, во обраќањето истакна дека здравствените работници треба да осигурат оти секое лице во секое време ќе добие соодветна здравствената заштита, без никаква дискриминација.
„Сакам да нагласам дека со новиот Закон за спречување и заштита од дискриминацијата основите на сексуална ориентација и родов идентитет се експлицитно наведени, при што се забранува секаква дискриминација на трансродовите лица во повеќе области наведени во законот, меѓу кои и областа на здравството, работните области, образованието и други области. Имено, со усвојување на овој закон сите министерства се задолжени во рок од две години да ја хармонизираат својата легислатива со новиот концепт на недискриминација, кој е хармонизиран со ЕУ-директивите и меѓународните стандарди“, рече министерот Филипче.
Претставничката од Советот на Европа, Елени Цецеку, истакна дека со унапредувањата на правата на ЛГБТИ, невидливите ги правиме видливи, а тоа може да се нашите деца, соседи, пријатели…
„Во изминатите 5 години како дел од Советот на Европа можев да видам позитивен напредок во сите 25 земји членки, но овој напредок е кревок и не сметаме дека сме ја добиле битката. Со самото тоа што имаме тројца министри на конференцијата, кои работат на промоција на правата на ЛГБТИ, сме постигнале многу, но општеството дава отпор и исто така и верските лидери, кои се обидуваат да ги наметнат верските убедувања. Овие убедувања не мора секогаш да се прифатат. Советот на Европа е ваш партнер и ваш поддржувач во унапредувањата на правата на ЛГБТИ-лицата“, рече Цецеку.
Билјана Гинова, копретседавач на ЕРА, ја нарече конференцијата историска бидејќи кај земјите од регионот се забележува напредок во унапредувањето на правата на ЛГБТИ-лицата.
„Во времето кога ја основавме ЕРА како мрежа, кога разговаравме дека вмрежувањето на НВО мора да оди паралелно со вмрежувањто на владите при унапредувањето на пристапот до права за ЛГБТИ-луѓето, во земјата владееше трансфобичен период, а видете каде сме денес“, рече Гинова.
Гинова ги повика присутните, граѓаните и поддржувачите в сабота гордо да маршираат, со што ќе ѝ се спротивстават на дискриминацијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Поединци од СДС потпалуваат за да има политички пожари, а го бранат и Коцевски како последен бастион за нивниот криминал

Христијан Мицкоски, претседател на ВМРО-ДПМНЕ и премиер на вечерашната трибина на тема „Реформи во здравството, ги градиме темелите на промените“ во организација на ВМРО-ДПМНЕ, а која се одржа во Штип се осврна на актуелни теми меѓу кои ситуацијата со пожарите и гласањето недоверба во Собранието за јавниот обвинител Љупчо Коцевски.
„Гледам една нескриена радост и возбуда кај опозицијата од пожарите. Истата таа возбуда ја имаа и кога секојдневно ја злоупотребуваа големата и ужасна трагедија во Кочани. Така брутално, дневно политички и паушално излегуваат на прес-конференции додека стотици граѓани заедно со пожарникарите и полицијата и луѓето од „Македонски шуми“ борба бијат на дневно ниво против пожарите во Македонија и во време кога за жал нашата татковина во одредени делови е во пламен“, рече Мицкоски.
Мицкоски укажа дека „тие наместо да бидат помеѓу народот одбираат со салонски прес-конференции да потпалуваат и да се радуваат на секој пожар“.
За разлика од претходната владата, сега, кажа тој, актуелната за една година ги стави во употреба авионите, леталата, цела флота на БТР возила, хермелини и пинцгауери за гасење на пожари.
„Кога нивни луѓе ќе ги видиме озарени како потпалуваат пожари за да има политички пожари, како живи ќе ги фатиме со огнот во раце за да имаат потоа причина за прес-конференции, тука се е јасно“, кажа Мицкоски.
Коментираше и за гласањето недоверба за јавниот обвинител Коцевски.
„Уште една тема којашто вчера многу јасно, кристално јасно ја видовме во македонското Собрание како постапуваат против интерпелацијата на државниот јавен обвинител. Сами се соголија. СДСМ и ДУИ останаа единствената сламка за спас на кариерата на државниот јавен обвинител затоа што е јасно дека тој им е последниот бастион во одбрана на нивниот криминал во изминатите 7 години, затоа нема ниту еден отворен случај против висок функционер на СДСМ и ДУИ“, посочи Мицкоски.
Според него, „паѓаат во вода сите оние тиради од прес-конференции за оној страшен ужасен случај во Кочани, оние лажни повици, буцкањата каде лажно велеа дека бараме правда“.
„Па тој случај токму го води, токму овој за којшто сега зборував, нивниот државен јавен обвинител и нема потреба да повикуваат јавно, слободно нека си го викнат, нека си се затворат во канцеларија тие малкумина што останаа во раководството на СДСМ и ДУИ и нека си го прашаат Коцевски до каде е. А ние нема да се откажеме од борбата за правда и подобар живот и правда ќе има, и ќе има подобра иднина која сакаме да ја донесеме“, дополни Мицкоски.
Македонија
Андоновска: Во Институтот за јавно здравје секој тргнувал само од личниот интерес

Директорката на Институтот на јавно здравје и член на ИК на ВМРО-ДПМНЕ, Марија Андоновска, во рамки на вечерашната трибина „Реформи во здравството, ги градиме темелите на промените“, истакна дека наследиле распаднати институции каде што воопшто не се размислувало за услугите и грижа за граѓаните. Таа додаде дека конкретно во Институтот, ниту една работа не била водена согласно законските прописи.
„Мораме да ги поставувавме темелите повторно, и нема да се откажеме и сме силно мотивирани да го направиме тоа. Најдовме распаднати институции, каде што воопшто не се размислувало ниту за услугите, ниту за институциите, а најмалку за граѓаните. Секој тргнувал само од личниот интерес, ниту една работа што ја затекнав во Институтот не беше водена согласно законски прописи, се беше спротивно на законот“, нагласи Андоновска.
Андоновска објасни дека со преземањето на Институтот, затекнале опрема којашто била купена скапо, но не се употребувала повеќе години. Таа информираше дека опремата веќе е ставена во употреба, се со цел граѓаните да може да се обратат во државните институции.
„Затекнавме опрема којашто е купена многу скапо и може да биде многу од корист на граѓаните, но е вон употреба повеќе години. Ја ставивме таа опрема во употреба и направивме се за таа да може да профункционира, повторно да можат граѓаните да се обратат во државните институции, наместо да одат само во приватните и да имаат дополнителни трошоци. Воведовме втора смена и сме единствената микробиолошка лабораторија којашто можат граѓаните да ја посетат и после работното време“, заклучува Андоновска.
Македонија
Стабилно снабдување на онкологија и хематологија, за само една година, две промени во позитивната листа на лекови која не беше обновена 10 години, се пофали Клековски

„Не почнавме од нула, туку од минус. 10 години во Македонија не беше обновена позитивната листа на лекови. 10 години од 2014-та година ниедна промена на позитивната листа, за една година ние успеавме да направиме две промени. Во првата промена 9 генерички лекови, во последната 2 онколошки лекови кои од следниот понеделник ќе бидат достапни во аптеките“, истакна членот на ИК на ВМРО-ДПМНЕ и директор на ФЗОМ, Сашо Клековски на денешната трибина во Штип на тема „Реформи во здравството – Ги градиме темелите на промените“.
Клековски додаде дека фокусот бил ставен на лековите.
„Благодарејќи на поддршката на владата одвоивме неверојатни пет милијарди денари за иновативни лекови, тоа е 70% повеќе од 2024-та година или двојно повеќе до 2023-та година. Тоа се многу повеќе пари, една милијарда повеќе за онкологија, повеќе пари за хематологија, педијатрија. Ова не се само пари, ова се животи спасени и олеснети. Стабилно снабдување на онкологија и хематологија, сите пациенти на неврологија со мултипла склероза опфатени. Луѓето на кои им треба хормон раст не чекаат веќе на тоа, и многу такви примери“, вели Клековски.
Тој истакна дека бројот на ин витро што го покрива ФЗОМ наместо 3 сега е зголемено на 6 и исто така процесот за добивање известување за барателите на ин витро е дигитализиран.