Македонија
Костовски му одговори на Геровски

Господине Героски,
Со внимание ги читав вашите текстови посветени на Еуростандард банка и кон мене како личност.
Ја имате мојата нескриена почит како новинар и главен уредник, а вашето CV е навистина импресивно на тој план.
Вашата дејност е новинар, посебно истражувачкото новинарство ви е главен адут. Објавениот извештај е направен од консултантската куќа Р.У.Р предводена од еминентниот Драго Кос, познат и докажан борец во борбата против криминалот вклучително и во банкарскиот сектор.
Јас во изработениот и објавен извештај немав никакви лични сугестии со кои би требало да се скријам зад параванот на овој извештај.
Ме чуди, во целава консталација на овој фактографски извештај, свртувате внимание исклучиво на мене, а суштински се работи за многу поголем проблем кој може да предизвика вистински и мошне сериозни последици по цела Република Македонија.
Еуростандард банка била само алка во тој систем кој и денес функционира, а тој систем стручно беше објаснет од страна на господинот Драго Кос.
Не ви го разбирам поривот, наместо да се зафатите со истражувачко новинарство, токму за споменатите 7 банки во извештајот, кои не ги споменав јас, туку господинот Драго Кос, се вртите кон мене. Во извештајот се препознава дека не барав експертот да ме штити мене или мојата Еуростандард банка, бидејќи ние сме колатерала.
Те упатувам директно, за подетални информации, да му се обратиш токму на господинот Драго Кос. Ме зачудува твојата изјава дадена со леснотија со која зафаќаш страна на Народна банка вмешана во овој мега-скандал во банкарскиот систем.
Сакам да те потсетам дека институцијата Народна банка треба да го штити и одржува банкарскиот систем, а не како во случајов полни две децении да прогледува низ прсти на т.н. тајкуни во банкарскиот систем на Македонија.
Јас сум свесен за можните последиците врз мене, после објавувањето на овој извештај, бидејќи севкупниот систем кој функционира во Македонија е комплетно контролиран од сивите еминенции кои денес владеат во Македонија.
Во нормална правна држава јас ќе бидам награден и обештетен, не само во банката туку и за останатиот имот во Македонија, токму поради фактот што сакав да му ставам крај на незаконскиот систем, кој со години наназад бил практикуван во мојата банка БЕЗ МОЕ ЗНАЕЊЕ . Оној момент кога дознав, го
сменив стариот Управен одбор кој беше лиценциран од Народна банка со право да ја води банката. Да биде појасно, лиценците на Управните одбори, Надзорните одбори и директорите на секторите на банка, ги издава Народна банка.
Стариот Управен одбор не се соочи со одземање на лиценци , бидејќи беше дел од шемите, а Народна банка многу добро знаела дека во банките се практикува недозволен начин на позајмици преку трансакциски сметки на правни и физички лица, многу често без знаење на сопствениците на овие сметки.
Јас кога дознав веднаш именував нов Управен одбор со наредба за излегување од овие шеми и силно прибирање на одлеаните пари. Да ти биде јасно, трагата на парите не може да се скрие. Тоа е клучниот момент кога е донесена одлуката Еуростандард банка да се уништи по секоја цена.
Уште два податоци кои би требало да ти бидат интересни како новинар: Првиот- по светски параметри највисоко рангирана ревизорска куќа Standard @ Poor`s, Македонија бележи пад на квалитетот во банкарскиот систем и тоа, во 2020 година рејтингот на Македонскиот банкарски систем е ББ+, во 2021 година е само ББ, а во оваа 2022 година е ББ-.
Те молам прочитај што значи ова и кој е следниот пад во ова рангирање. Вториот -Македонија е веќе со години меѓу водечките земји по организиран криминал и корупција во светот. Проучи што значи организиран криминал и корупција, бидејќи овој криминал не е на улица, туку се прави со институции и силни играчи во позадина.
На крајот завршувам, секој човек на земјината топка има свои доблести, ама има и слабости и јас не сум исклучок. Водењето на порталот „Плусинфо” врз кој имаш тотална контрола за мене е твој стил на работа.
Во мојот три децениски стаж поминат надвор од Македонија, никојпат не сум се соочил со проблеми со кои се соочив тука во Македонија, напротив институциите во земјите каде што работев ме штитеа мене, мојот имот и мојот бизнис, а овде го доживеав спротивното Моето CV ти е многу добро познато, би било упатно да извлечеш некои заклучоци за мене како личност.
Еуростандард банка е само последната капка што ја прели чашата во моето работење во Македонија. Ти посочувам истражувачко новинарство, приватизацијата на „Градски аптеки” , процес кој бедно се заврши, по мене и за вработените во Градски аптеки.
Имам уште минимум десетици примери и доколку времето ти дозволува те поканувам на средба да ти ги обзнанам и документирам.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити изврши увид на градежните активности за изградба на примарната водоводна мрежа во Мерово, Желино

Првиот заменик-претседател на Владата и министер за животна средина, Изет Меџити, придружуван од градоначалникот на општина Желино, Блерим Сејдиу и пратеници од регионот, денеска изврши увид на градежните активности за реализација на проектот за изградба на примарната водоводна мрежа во селото Мерово, општина Желино.
Проектот предвидува изградба на дистрибутивната мрежа за водоснабдување во рамките на селото, изградба на поврзувачки цевковод од резервоарот до главната мрежа, отворање на нов бунар покрај постојниот, како и рехабилитација и проширување на веќе изграден резервоар.
Досега е извршено отворање на еден бунар и изградба на еден резервоар, кои во рамките на овој проект ќе бидат финализирани и модернизирани.
Вкупната вредност на инвестицијата изнесува 15.847.359 денари, обезбедени од буџетот на надлежното министерство, а градежните активности се очекува да завршат до крајот на 2025 година.
„Одржливото снабдување со вода е еден од најважните приоритети на нашата Влада, бидејќи е директно поврзано со квалитетот на животот на граѓаните и развојот на нашите населени места. Со овој проект ставаме крај на децениските проблеми со недостиг на водовод во Мерово и им обезбедуваме на жителите подобри услови за живот“, истакна првиот заменик-претседател на Владата, Изет Меџити.
Оваа инвестиција претставува дел од стратешките проекти кои имаат за цел унапредување на основната инфраструктура и задоволување на елементарните потреби на граѓаните во сите населени места на општина Желино и пошироко.
Македонија
На Табановце се чека околу 10 до 15 минути за излез од државата

Поради пожар во националниот Парк Јасен, регионалниот пат Р1106 Македонски Брод – Скопје затворен е за секаков вид на возила.
Сообраќајот на државните патишта се одвива непречено, по суви коловози. Интензитетот на сообраќајот на патиштата надвор од градските средини е зголемен.
Поради летните одмори, се бележи зголемена фреквенција на возила, на ГП Табановце времето на чекање за излез е околу 10-15 минути. На останатите гранични премини од македонска страна нема подолги задржувања при влез или излез од државата.
Македонија
Општина Карпош: Го демантираме другарот на Мицкоски, Сотир Лукровски, дека има нерешени 11 000 предмети за легализација, а тој ќе ги решел за две и пол години

„Општина Карпош во целост го демантира другарот на Христијан Мицкоски, Сотир Лукровски, дека во општина Карпош има нерешени 11 000 предмети за легализација и замислете, тој ќе ги решел за две и пол години. Фактите говорат дека општина Карпош од 2011 до 2018 година има примено вкупно 12688 барања и од нив досега се решени 9385, а останати се уште 3303 барања“, велат од општина Карпош.
„Најголем дел од нив се со нерешени имотно-правни и оставински постапки и се чека на завршување на судска постапка, на друг дел е побарана дополнителна документација, и мал дел се во постапка за решавање.
За кандидатура на градоначалник основен услов за кандидатот е да биде добро информиран и да не кажува лаги. Ако кандидатот во кампања кажува лаги, какво ли ќе биде неговото функционирање како Градоначалник!?
Општина Карпош го замолува г-дин Христијан Мицкоски да го едуцира својот кандидат и го замолуваме да не ги вознемирува директорките на градинките и училиштата“, соопшти општина Карпош.