Македонија
Коцевски со транспарентност ќе ја враќа довербата: Обвинителството и јас во секое време ќе бидеме достапни за информации

Новиот државен јавен обвинител, Љупчо Коцевски, во првата изјава за медиумите најави дека довербата на граѓаните во Обвинителството ќе ја врати со транспарентност на институцијата, што очекува да поттикне и отчетност, одговорност и ефикасност на јавните обвинители. Работата на државниот јавен обвинител, според него, е тешка и одговорна, но со долгогодишното искуство и знаење вели дека може да одговори на сите предизвици.
„Во однос на моите понатамошни активностите, во програмата што ја дадов пред пратениците и пред јавноста основното начело е транспарентноста. Ценам дека самата транспарентност ќе ги поттикне отчетноста, одговорноста, ефикасноста на јавните обвинители во нивната работа и, секако, тоа ќе ја подобри самата доверба во јавноста. Ценам дека Јавното обвинителство треба да го заслужи местото и треба да биде навистина единствениот орган што се бори против корупцијата. Ценам дека ова што го ветувам ќе го исполнам. Во однос на транспарентноста, еве сега пред јавноста изјавувам дека Јавното обвинителство, а исто и јас, ќе биде отворено за јавноста и секако ќе бидеме во секое време достапни за информации што се однесуваат на предмети што се во интерес на јавноста“, рече државниот обвинител Коцевски.
Денес, поради заклетвата во Собранието, не сакаше да навлегува во детали за предметите. Немаше конкретен одговор на новинарското прашање дали ќе поведе постапка за издавањето лични документи без новото име, но уверува дека Јавното обвинителство ќе поведе постапка за секого ако има доволно докази.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Ѓорче Петров и Аеродром денеска без струја

Од ЕВН Македонија АД известуваат дека поради технички зафати во електродистрибутивната мрежа денеска без електрична енергија ќе останат:
· Во периодот од 09:00 – 10:00 часот дел од корисниците од село Кучково кон Манастир, општина Ѓорче Петров;
· Во периодот од 09:00 – 12:00 часот дел од корисниците на улицата Гаврил Констатиновиќ (околу бр.57), општина Аеродром;
· Во периодот од 09:00 – 10:00 часот корисниците од улицата Алексо Демниевски 17, 11 и други куќи во близина, општина Ѓорче Петров.
Македонија
Променливо облачно со сончеви периоди, попладне нестабилно со пороен дожд

Времето денеска ќе биде променливо облачно со сончеви периоди. Попладне наместа ќе биде нестабилно со пороен дожд и грмежи, локално во форма на невреме. Ќе дува слаб до умерен ветер од северен правец. Минималната температура ќе биде во интервал од 5 до 12, а максималната ќе достигне од 17 до 25 степени.
Во Скопје, променливо облачно со сончеви периоди. Попладне во делови од котлината ќе биде нестабилно со пороен дожд и грмежи. Ќе дува слаб до умерен северен ветер. Минималната температура ќе се спушти до 9, а максималната ќе достигне до 25 степени.
Времето во наредните денови
Во следните денови времето ќе биде променливо облачно и посвежо со повремен локален дожд.
Македонија
Предложен притвор за кичевецот кој утрово со секира си го уби таткото и тешко ја повреди мајка си

Основното јавно обвинителство Кичево поведе истражна постапка против кичевец осомничен за кривични дела убиство и обид за убиство.
„При вршење семејно насилство рано утрово, во дворот на семејната куќа во селото Србјани, осомничениот 47-годишник го лишил од живот својот татко, а се обидел да ја убие и својата мајка. При вербална расправија, со нож и секира најпрво го нападнал таткото, прободувајќи го по телото и удирајќи го со секирата по главата. Потоа и нанел убоди со нож во вратот и на неговата мајка. Од многубројните повреди оштетениот маж починал при укажување прва помош, а жената е пренесена на Ургентниот центар во Скопје во тешка состојба“, извести вечерва Обвинителството.
Јавниот обвинител до судијата на претходна постапка од Основниот суд во Кичево вечерва достави предлог за определување мерка притвор за осомничениот. Осомничениот беше уапсен откога самиот пријавил во Итната медицинска помош дека ги нападнал родителите.