Македонија
Коциќ: По шлаканицата и одлуката од Стразбур, ВМРО-ДПМНЕ треба да им се извини на граѓаните

Очекував овие два дена некој од ВМРО-ДПМНЕ, кој и да било, да излезе и доблесно да им се извини на граѓаните по шлаканицата, по одлуката на Судот во Стразбур, рече пратеникот на СДСМ, Ненад Коциќ, во рамките на дебатата на денешната собраниска седница.
„Голема нервоза покажува во Собранието и јасно ми е зошто е тоа така. Очекував овие два дена некој од ВМРО-ДПМНЕ, кој и да било, да излезе и доблесно да им се извини на граѓаните по шлаканицата, по одлуката на Судот во Стразбур. Се потврди сѐ она што го правеше ВМРО-ДПМНЕ, која по 11 години крадење, сакаше да ги аболира криминалците. Македонската јавност нема да му прости на Ѓорге Иванов за тоа што по 10 години, злоупотребувајќи ја позицијата, сакаше да ги спаси криминалците од ВМРО-ДПМНЕ. Над 100 осудени криминалци се поврзани со ВМРО-ДПМНЕ. Државата сега функционира и сите случаи се процесираат. Сега нема заштитени мечки“, рече Коциќ.
Пратеникот на СДСМ додаде дека ВМРО-ДПМНЕ нема никаков кредибилитет и ја обвини опозициската партија дека има лажен морал затоа што и во последните 3 години постојано го блокира Собранието, ги кочи институциите и тоа во време на глобални кризи, што е на директна штета на граѓаните.
„Македонската јавност ниту може да заборави ниту да прости што во време на глобални кризи, корона, војни, ги кочите државните институции. Дури и хакерскиот напад на ФЗО го злоупотребувате. А во Аеродром системот е блокиран 1 месец, ама ние не сме како вас и не се ситиме“, рече пратеникот на СДСМ, Ненад Коциќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Истрагата за Кочани ја води обвинителството, не владата

Премиерот Христијан Мицкоски на денешната собраниска седница за пратенички прашања, потенцираше дека обвинителството ја води истрагата за несреќата во Кочани, а не владата и токму обвинителството кажува кој ќе биде опфатен и посочи дека во моментов 68 лица се опфатени меѓу кои има актуелни функционери, што во време на СДСМ беше невозможна мисија.
„Не мислев дека можете толку ниско да се спуштите и сѐ уште да се обидувате да се качите на бранот на колективната трагедија која ја зафати државата. Барем пратеничката група на СДСМ има најмалку право да зборува за морал. Што се однесува за оставките за 5 месеци од денеска ќе започне кампања за локални избори и граѓаните ќе кажат чија политичка кариера завршува, чија продолжува и во каква форма. Граѓаните ќе кажат. Тоа што играте на картата на кратко помнење и континуирано ги навредивте граѓаните мислејќи ќе добиете политички поени, ве советувам, не, нема да добиете, туку губите“, изјави премиерот Мицкоски одговарајќи на пратеничко прашање од пратеникот Митко Трајчулевски.
Премиерот Мицкоски му појасни на пратеникот дека истрага води обвинителство и обвинителството кажува кој треба да биде приведен, а не владата.
„Нека ви кажат сопартијците за модуларната болница, за Ласкарци и за Беса Транс колку беа опфатени со истрага и колку кривични пријави беа поднесени во тој момент. Ако не ви кажат, набргу од денеска ќе има расправа во Собранието и ќе слушнете од другите колеги пратеници и зошто, кој и како. Истрагата за Кочани ја води јавниот обвинител, не јас, не владата. Ако јавниот обвинител одлучи дека мене треба да ме приведат, нека ме приведат. Седум години не затворавте, не приведувавте и до ден денеска ВМРО-ДПМНЕ е под прогон на обвинители од времето кога СДСМ ги бираше. Издржавме и затвор е за мажи, а во нашиот случај и за жени. 68 лица досега се опфатени во истрагата од страна на јавниот обвинител, обвинителството и сите кои се задолжени за ова. За разлика од модуларната болница, Ласкарци, Беса Транс каде починаа 75 наши сограѓани имаше нула. Овде има 68 лица, дали ќе бидат 168 ќе каже обвинителството, не јас, не министерот за внатрешни работи, туку обвинителството заедно со судот одредуваат“, потенцираше премиерот Мицкоски.
Тој додаде дека да нема дилема ако обвинителот рече дека треба да се приведат високи функционери од оваа влада, ќе се случи тоа.
„Еден член на владата е во притвор. Во ваше време тоа беше невозможна мисија. Повикани на информативен разговор високи функционери од страна на обвинителството, не од моја страна, не од страна на министерот за внатрешни работи. Истите обвинители и судии кои вие ги биравте, вашиот Совет за јавни обвинители и Судски совет кои вие ги биравте, не ВМРО-ДПМНЕ и треба работите правилно да се кажуваат, македонската јавност треба да ја знае вистината. Актуелен градоначалник е притворен, во време на СДСМ тоа беше невозможна мисија“, рече Мицкоски.
Мицкоски нагласи дека нема да се заборават случаите како модуларната болница, Беса Транс и Ласкарци и дека нема да помогне ниту шверцерски поминатиот Кривичен законик со европско знаме.
Македонија
Крводарителска акција на 30 април по повод Светскиот ден на слободата на медиумите

Самостојниот синдикат на новинари и медиумски работници организира крводарителска акција на 30 април со која ќе го одбележи 3 мај – Светскиот ден на слободата на медиумите. Акцијата ќе се одвива координирано на неколку локации во земјава.
„На 30 април 2025 во терминот од 08:00 до 14:00 часот драгоцената течност која спасува животи ќе може да се дарува во Скопје во просториите на Дневен центар за дарување крв на Црвен крст на град Скопје (ДХО „Даре Џамбаз“). Во исто време во просториите на службите за трансфузиона медицина во Клиничкиот центар Битола, во Општата болница во Струмица, ЈЗУ Општа болница Прилеп и во Клиничкиот центар во Штип крв ќе може да се дарува од 09:00 до 14:00 часот“, велат од ССНМ.
Крводарителската акција, која Синдикатот ја организира трета година по ред, се одржува во соработка со Здружението на новинари на Македонија (ЗНМ) и со поддршка на Црвен крст на град Скопје. Со цел ефикасно организирање на оваа солидарна акција пријавувањето е на електронската пошта на ССНМ – [email protected].
Македонија
Викендов облачно време со дожд

Утре и во деновите од викендот ќе се задржи променливо облачно и нестабилно време со повремени врнежи од дожд и појава на грмежи, информира УХРМ.
Локално ќе има поинтензивни процеси во форма на невреме со пообилен пороен дожд, грмежи, силен ветер и изолирана појава на град.
В понеделник ќе има повремен локален дожд, а од вторник стабилизирање на времето.