Македонија
(Видео) Крмов до Мицкоски: Дадете заклетва без Северна

Пратеникот од Левица, Борислав Крмов, на собраниската седница го повика мандатарот Христијан Мицкоски да даде заклетва без „Северна“.
„Секогаш кога ќе има лоша влада на СДСМ, доаѓа ВМРО и обратно и, за жал, мандатаре, Вам Ви се обраќам, уште во старт ретириравте на неколку полиња! Прво и основно ретериравте кај придавката Северна и рековте дека сега ќе го изговарате, наводно, новото име. Во една емисија рековте дека дури и мандатот ќе го жртвувате – Вие новата придавка не сакавте ни да ја ословите која е, викавте дека нема да ја изговорите, а сега тврдите и сами кажавте дека ќе дадете заклетва со таа придавка. Еве, јас ве повикувам, да не испадне дека го кршите зборот, имате време да си дадете оставка, па да си останете на зборот – истакна пратеникот од Левица, Борислав Крмов, на собраниската седница, обраќајќи се кон Мицкоски.
Крмов потсети дека едно од големите ветувања на ДПМНЕ беше дека ДУИ ќе оде во опозиција.
– Го факторизиравте ДУИ. Ветувавте дека ДУИ нема да биде фактор и кога дојдовме за гласање на Законот за организирање на државната управа, кога ви требаше две- третинско мнозинство, седнавте со ДУИ и се договоривте. Следуваат измени и дополнување на Законот за локална самоуправа, исто, закон, којшто се носи со две -третини и за којшто е потребно дури и Бадентерово мнозинство, така што уште повеќе ќе влезете во договор со нив, а бесрамно лажевте пред изборите дека Левица работела со ДУИ! Вие не издржавте ни влада да формирате и веќе ги факторизиравте. Народот не е наивен. Сигурно, не се работи тука за пазарење за некоја комисија во Собранието за правична застапеност и слично. Моја претпоставка е дека ДУИ преговара да си ги спаси своите функционери од прогон. Вие, како викавте, ја споредувавте таа партија со рак – рана, криминално здружение и слично, за сега со нив во прв момент да се здружите уште пред да имате влада. И, еве, мое мислење е дека во тој табор како и до сега нема да има никакви пријави и апсења. Значи, народот да не очекува – објасни Крмов.
Крмов го потенцираше задолжувањето на државата со 1 милијарда евра што уште во старт, како што рече, го планира ДПМНЕ, а истото го најавил Мицкоски.
– Тоа, нечесно, не го кажавте пред граѓаните уште пред изборите, затоа што знаете колку се граѓаните осетливи на задолжување. Имено, вашите пратеници секој ден во Собранието скокаа тука, се бунеа за секој земен грант од странство, за секој кредит, додека сега вие, фактички, го правите истото. Јас сметам дека ова ќе биде ново „Скопје 2014-та“, а пола пари од тие ќе отидат за сомнителни тендери! Барем пола пари од тие планирате да ги пумпате во општеството – потенцираше пратеникот Крмов.
Според Крмов, ВМРО-ДПМНЕ исто како и СДСМ не нуди некоја радикална промена или вистинска реформа.
– Имаше еден ,,народен” израз во времето на Груевски: „Ок, и овие крадат како претходните, ама барем се гради“. Значи, ќе биде паролата сега, во овој нареден период: „Кради, ама и гради“.
Крмов се надоврза на говорот на претседателот на Левица, Димитар Апасиев, кој на истата собраниска седница потенцираше дека само два пати новата влада го спомнува зборот работник во Програмата.
– Не се видовте со ниеден синдикат, со ниедно работничко здружение. Значи, македонскиот работник ќе остане незаштитен, ќе биде обична стока на пазарот и вие ќе го дадете на тацна и на домашните бизнисмени и на странските бизнисмени.
Во однос на деловите од Програмата што се однесуваат на економијата Крмов стави посебен акцент во своето излагање.
– Во мултинационална добивка, на мултинационалните компании на добивка планирате да им го намалите данокот само на 5%, што значи и така тие компании ништо не партиципираат. За илустрација, на пример, само од рудниците, околу 15% од профитот мислам дека останува во државата – значи, вие сега и тоа ќе го намалувате. Значи, ние немаме, апсолутно, никаков ќар. И сега планирате раст од 3-5%. Тоа во ваква економска ситуација е невозможно. Едино може да го пумпате економскиот раст вештачки со таа милијарда евра, на сличен начин како што Груевски вештачки одржуваше економски раст со проектот Скопје 2014 – образложи пратеникот Крмов.
Во Програмата е планирана инфлаторна стапка од 2 до 2,5%.
– Тоа, исто така, тешко ќе се изведе, зашто веќе кај нас инфлацијата не зависи од менаџирање на денарот. Инфлацијата е интернационална, зависи од големите валути и ние како увозно зависна држава, апсолутно, нема да имаме никакво влијание таму. Кога идевте во Будимпешта да го преговарате тој еден милјарда евра кредит, сте можеле да разговарате со Виктор Орбан, кој јавно кажа дека Европа веќе се спрема за голема ескалација во Украина, што значи дека тие деструкции на пазарот веќе, најверојатно, ќе се случат. Слично нешто говори претседателот на Србија Вучиќ. Тука јас очекував од вас да видам програма каде што мислите да ја заштитите оваа економија од тие потреси. Тие држави во моментот се наоружуваат, ги полнат амбарите со жито, ги полнат сите резерви со нафта. Вие, напротив, немате ништо такво, него мислите, очекувате розева слика и давате розеви прогнози – појасни Крмов.
Во врска со делот од Програмата што се однесува на борбата против корупцијата, Крмов го зеде личниот пример на Мицкоски.
– Би почнал со Вас, мандатаре. Вие како директор на ЕЛЕМ имате добиено концесии за државно земјиште и за мали хидроцентрали. Тоа е, де факто, коруптивно однесување. Како човек да очекува дека вие сега од далеку посилна позиција, практично најсилната позиција во државата, нема да правите нешто слично? Понатаму, го имате Златко Пирински, којшто е за локална самоуправа кандидат и којшто беше сменет од в.д. директор за Водовод и канализација за, наводно, нешто дека милионски тендер злоупотребил во Град Скопје. Понатаму, го имате Панче Тошковски, познатиот адвокат на урбаната мафија на кој Вие лично му имате дадено два тендера: еден за 25 000 евра, еден за 143 000 евра за т.н. адвокатски услуги. Понатаму, Цветан Трипуновски за земјоделие, којшто има кривична пријава за злоупотреба на службена положба и овластување. Како може да очекуваме ние сега од него одеднаш да нема злоупотреба на службена положба? Понатаму, Орхан Муртезани за европски прашања – директор на МЕПСО и претходно на Македонски железници, којшто вашата партија го нарекуваше паразит, којшто ќе паразитира на македонскиот народ со превисока плата, а македонскиот народ плаќа превисоки сметки за струја и како шлаг на тортата – тој не ги признава македонските инсигнии, македонските државни симболи и со тоа плука директно на македонската држава и на македонскиот народ – рече Крмов, образложувајќи во делот за борбата против корупцијата.
Исто така, пратеникот Крмов се задржа и на уште неколкумина кадри кои влегуваат во новата влада, а кои, како што рече, имаат коруптивно минато.
– Тука е Изет Меџити, кој се фалеше дека многу легализирал дивоградби и незаконски ги има променето имињата на училиштата во неговата општина. Вашиот потпретседател излегуваше на пресови и кажуваше како бил купен Арбен Таравари со куќа што вредела 500 000 евра за 150 000 евра и сега тој ќе го ставите министер за здравство. И ќе завршам со Горан Минчев, за јавна администрација, кадар на ЗНАМ, којшто е кум на Бранко Црвенковски и негов соработник. Значи, вие ја проширувате соработката со бранковистите! Сега освен што го факторизирате ДУИ, го факторизирате и Бранко Црвенковски, којшто, е, нели, најомразената фигура во ВМРО-ДПМНЕ, којшто ја спроведе приватизацијата во 90-те години кога Македонија беше фрлена на колена и оттогаш, практично, не можеме да се исправиме! Вие не можете да ја избегнете корупцијата, не можете да ја избегнете злоупотребата на државниот апарат, за да дојдете до поголема финансиска и нелегална добивка, што значи дека вие потекнувате од истиот систем што тука пред македонските граѓани тврдите дека ќе го реформирате. Истиот систем којшто заедно со СДСМ и ДУИ, 30 години го имате градено, што значи дека нужно ќе потфрлите, само треба да ви се даде време.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Доаѓа невреме – силен ветер, пороен дожд и град ќе ја погодат Македонија

Управата за хидрометеоролошки работи информира дека под влијание на влажна и нестабилна воздушна маса, во понеделник и вторник на повеќе места ќе биде нестабилно со пороен дожд и грмежи.
„Процесите ќе бидат поинтензивни особено во текот утрешниот ден кога локално ќе бидат во форма на невреме со пообилен пороен дожд за кратко време (над 15л/м2), силен ветер (над 60км/ч) и изолирана појава на град“, велат од УХМР.
Според најавите, од среда ќе преовладува претежно стабилно и потопло време со пораст на дневната температура.
Во Скопје, утре и во вторник времето ќе биде променливо облачно и нестабилно со пороен дожд и грмежи. Во делови од котлината ќе има појава на невреме со пообилен пороен дожд, силен ветер и изолирана појава на град.
Од УХМР препорачуваат во случај на појава на електрични празнења се препорачува поголема внимателност, да не се престојува на отворен простор и под осамени дрвја.
Македонија
ЦУК: Четири активни пожари во Македонија, 2 под контрола

Центарот за управување со кризи информира дека на територијата на Македонија се евидентирани вкупно 15 пожари на отворен простор, од кои: 4 се активни, 2 се под контрола, а9 се изгаснати.
Активни пожари: 4
1. Општина Чашка – над Богомила (мешана шума)
2. Општина Куманово – с. Слупчане (нискостеблеста шума)
3. Општина Студеничани – с. Дречавица (шумски пожар во планински терен)
4. Општина Македонски Брод – с. Грешница (деградирана нискостеблеста шума)
Под контрола: 2
1. Општина Долнени – с. Стровија, позади место викано Гајдарец-Клепало (нискостеблеста шума)
2. Општина Желино – с. Церово (мешана шума)
Изгаснати се пожарите во Берово, Брвеница, Струмица, Гевгелија, Куманово, Крушево, Долнени, Струга и Студеничани.
Македонија
(Видео) Избувнаа повеќе нови пожари – „Во Македонија има многу граѓани кои не ѝ мислат добро“, вели Михаилов

Попладнево низ повеќе делови од Македонија се појавија нови пожари, откако претпладне беше стабилизирана состојбата на теренот.
Надлежните институции реагираат со интервенции на копно и од воздух.
Информации објави заменик-директорот на ЈП „Национални шуми“, Кире Михаилов.
„Дефинитивно во Македонија има многу граѓани кои не и мислат добро, друго објаснување за ова кое се случува јас немам!
Пожаров кој го гледате е над село Ваксинце, општина Липково и избил пред 30 тина минути, а истиот ветерот многу бргу го шири накај Стража!
Таму се две екипи на ЈП “Македонски Шуми” Куманово и ТППЕ Куманово!
Откако ја стабилизиравме целосно состојбата и со добра координација на Главниот Штаб на Македонија до пладне го решивме и последниот активен пожар кај Долнени, во текот на попладневните часови веќе имаме пријава за неколку нови пожари!
После пладне е пријавен нов пожар во близина на село Богомила, општина Велес каде веднаш од страна на Главниот Штаб беа упатени сили на ЈП “Македонски Шуми” , екипи на МВР и месно население, а таму на помош беше пратен и делуваше од воздух еден хеликоптер.
Во 14 часот, во исто време се појавија два пожари, едниот во близина на село Милетино во општина Брвеница кој по брзата интервенција од копно беше локализиран и пожарот во општина Желино, во близина на село Церово на кој во моментов во координација со Главниот Штаб делуваат копнени сили составени од ТППЕ и ЈП “Македонски Шуми” и двата ЕР Трактори на ДЗС!
Исто така, нашите копнени сили кои сеуште се наоѓаат високо на пожарот во Долнени над селото Стровија попладнево ни пријавија појава на дури четири нови чадења или нови пожари кој во моментов службите ги проверуваат и пристапуваат на гасење на истите!“, напиша Михаилов на ФБ.