Македонија
Културната соработка со Скопје и проектот за паметни градови теми при посетата на делегација од збратимениот Дрезден

Делегација на збратимениот град Дрезден во Германија деновиве престојува во официјална посета на Скопје.
Како што информираат градските власти, за време на престојот делегацијата посетила повеќе средни училишта во Скопје и повеќе бази на Противпожарната бригада во градот, а во текот на посетата остварени биле и голем број официјални средби.
Вчера, делегацијата од Дрезден остварила средба и со заменик-градоначалникот на град Скопје, Енвер Малиќи, и поголем број претставници на градската администрација.
„На средбата имаше дискусија за досегашната соработка меѓу Скопје и Дрезден, како и можноста за нејзино продлабочување, пред сè, во областа на културата, економијата, образованието, противпожарната заштита и туризмот. Една од темите на разговорот беше и кандидатурата на Скопје во 2028 година да биде европска престолнина на културата бидејќи Дрезден аплицира за таа титула во 2025 година. На средбата се дискутира за размена на искуства од аспект на организација и подготовки за овој голем настан, како и за подобрување на соработката на културните институции од двата града“, наведуваат во соопштение од Град Скопје.
На средбата станало збор и за активностите во рамките на европскиот проект MAtchUP, кој е проект за паметен град, во кој учествуаат и Скопје и Дрезден. Преку овој проект, кој е финансиран од европската програма за истражување и иновации „Хоризонт 2020“, градовите ќе дизајнираат и имплементираат палета иновативни решенија од областа на енергетиката, мобилноста и ИКТ, кои ќе се користат како модел на урбанистички трансформации за други градови во Европа и пошироко.
Скопје и Дрезден се збратимени градови од 1967 година и имаат успешна соработка на полето на културата, образованието и спортот, како и размена на искуства во противпожарната заштита.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
На Табановце се чека околу 45 минути, зголемена фреквенција на возила поради летните одмори

Сообраќајот на државните патишта се одвива непречено, по наместа влажни коловози.
Интензитетот на сообраќај на патните правци надвор од градските средини е зголемен. Поради летните одмори се бележи зголемена фреквенција на возила на ГП Табановце, времето на чекање за влез и излез од државата е околу 30-45 минути. На останатите гранични премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Викендов сончево време со услови за локален пороен дожд

Утре и во деновите од викендот ќе преовладува сончево и потопло време со мала до умерена облачност. Ќе има услови за локална појава на пороен дожд и грмежи, информира УХРМ.
В понеделник на повеќе места ќе биде нестабилно со пороен дожд и грмежи, а од вторник се очекува стабилизирање на времето.

Извор: УХРМ
Македонија
Исчистен паркот спроти „Нова Македонија“

Денеска, во раните утрински часови во координирана акција на инспекциските служби на Општина Центар и Министерството за внатрешни работи, беше расчистен јавниот простор спроти зградата на „Нова Македонија“, познат и како Паркот на новинарите.
Акцијата беше спроведена по теренска проценка и по пријава од страна на центарци, кои изразија сериозна загриженост за безбедноста и изгледот на просторот. Жителите пријавија случаи на нарушување на јавниот ред и мир, поставени шатори и физички пресметки, за кои постојат и видео-снимки кои се доставени до општината.
Градоначалникот Горан Герасимовски потенцира дека јавните простори мора да се користат согласно нивната намена и ги охрабрува сите граѓани навремено да пријавуваат неправилности до надлежните служби.
„Притоа, се водевме и од социјалната димензија на проблемот – на терен беше затекнато и едно лице со посебни потреби, што дополнително ја нагласува потребата од институционална поддршка. Иако Министерството за социјална политика, демографија и млади не беше дел од денешната акција, сметаме дека е морално и неопходно да се вклучи во понатамошниот процес за да се обезбеди соодветна грижа за ранливите категории. Јавниот простор мора да остане чист, безбеден и достапен за сите“, изјави Герасимовски.