Свиркачот Ѓорги Лазаревски, кој прислушуваните разговори незаконски ги извади од УБК и ги предаде на поранешниот директор на управата, Зоран Верушевски, на почетокот од сведочењето за случајот „Таргет – Тврдина“, прашан од обвинителот Трајче Пеливанов накратко да ја каже својата биографија, истакна дека првото унапредување по вработувањето во МВР во 1987 година го имал од таткото на обвинетиот во случајот Сашо Мијалков, Јордан Мијалков, додека бил министер на МВР.

Наспроти ова, по бројните унапредувања кои понатаму следувале во кариерата на Лазаревски, во 2006 година тој бил деградиран од страна на Сашо Мијалков, кој по доаѓањето на чело на УБК го спуштил на почетничка позиција во управата.

Лазаревски истакна дека по 2006 година работел по наредба на Горан Грујевски, иако тој не му бил надлежен. Исто така кажа дека секојдневно трпел терор и навреди од страна на Грујевски, кој му велел на Лазаревски дека претходно одработувал за непатриотска власт, но и му правел опструкции да се види со директорот за да му се пожали.

Обвинетите за прислушувањето во предметот „Таргет – Тврдина“ на специјалното јавно обвинителство материјалите ги добивале на своите лични компјутери, а Никола Бошкоски гу уништил направените фотографии и видеа од дробењето на системите за прислушување. Единствено за ова обвинение СЈО не објави анонимизиран примерок на својата веб-страница поради многуте класифицирани документи наведени во обвинителниот акт.

Обвинителите од СЈО во воведниот говор рекоа дека ќе докажат оти во февруари 2015 година, по објавувањето на бомбите, Горан Грујевски и Сашо Мијалков се обиделе да го скријат фактот дека незаконското следење на комуникациите се одвивало во просториите на Управата за безбедност и контраразузнавање. Мијалков му наредил на Грујевски да ги уништи системите Vernit и Nice Track во време кога Nice Track сè уште бил во употреба. Грујевски, заедно со шефот на одделот за координација во УБК, Тони Јакимовски, воспоставил ад хок комисија во отсуство на какви било законски основи. Процесот го одобрила Гордана Јанкулоска, тогашната министерка за внатрешни работи. Со таквите дејства, според СЈО, му била нанесена штета на буџетот од 87.261.058 денари.

Виктор Јованов