Македонија
Левицата: ДПМНЕ спремна за влада со ДУИ – за бугаризација и косоваризација на Македонија

„Широката коалиција на ДПМНЕ-ДУИ-СДС се разобличи со заедничкото гласање за недемократскиот Деловник, со кој се укина блокирањето на закони – механизам кој постои во најстарите парламентатни демократии! Иако токму лицемерите од ДПМНЕ заговараа активна блокада (која никогаш не се случи) – сега побараа да се укине филибастерингот, а СДС и ДУИ ревносно им испорачаа“, велат од Левицата.
„Направија и кворум за новиот Кривичен законик, со кои се амнестираа 80 функционери на ДПМНЕ, а во Собранието заедно со СДС и ДУИ го изгласаа Законот за корумпирање на медиумите. Вака се наговестува коалицијата ДПМНЕ-ДУИ. Коалиција која веќе беспрекорно функционира во неколку општини, како во Велес и Охрид – додека нивните градоначалници го закитија со тендери од над 615 илјади евра „Пуцко петрол”, во сопственост на пратеникот од ДУИ.
Јасно е дека сегашната партија ДПМНЕ е проект за внатрешно поткопување на македонските позиции од страна на бугарските служби. Раководството на оваа партија е инсталирано и обучено да работи на исполнување на Софиската платформа за бугаризација на Република Македонија. Во јадрото на идеологијата на овие луѓе е врежано бугарофилството и тежнеењето да се затвори ‘македонското прашање’, во склоп на великодржавниот проект на живковистичките позиции.
Лидерот на оваа бугарашка и антимакедонска партија Христијан Мицкоски, во јуни на т.н. ,,лидерска средба” пред цела македонска јавност се зарече дека ќе ги внесе Бугарите во Уставот по секоја цена. Лидерот на оваа врховистичка и македономразачка партија Христијан Мицкоски на Македонците во лице им соопшти дека неговото раководство влече континуитет од најголемиот крвник на македонската нација Ванчо Михајлов.
Од бојкотот на територијалната поделба, преку амнестијата на грозоморните Хашки случаи, до испораката на осум пратеници за промена на уставното име, после наредните избори, Мицкоски и квинслишкото ДПМНЕ ќе ја испорача и бугаризацијата на Уставот, со која ќе се финализира процесот на редефинирање на македонската држава и нејзина федерализација!“, соопшти Левицата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сончево и топло со мала до умерена локална облачност, максималната температура до 35 степени

Времето денеска ќе биде сончево и топло со мала до умерена локална облачност. Ќе дува слаб до умерен, наместа долж Повардарието повремено засилен ветер од јужен правец. Минималната температура ќе биде во интервал од 8 до 18, а максималната ќе достигне од 29 до 35 степени.
Во Скопје, сончево и топло со мала до умерена облачност. Ќе дува слаб до умерен, во делови од котлината повремено засилен ветер од јужен правец. Минималната температура ќе се спушти до 16, а максималната ќе достигне до 34 степени.
Времето во наредните денови
Под влијание на влажна и нестабилна воздушна маса од четврток до недела ќе преовладува променливо облачно и нестабилно време со локален пороен дожд, грмежи и засилен ветер. Дневната температура ќе биде во опаѓање.
Македонија
Постои сомнеж дека пожарот во Дрисла е подметнат

Скопската противпожарна бригада со сити сили се обидува да го локализира пожарот во депонијата Дрисла. Направен е противпожарен појас за да не се дозволи на огнот да тргне кон блиската трева, грмушки и шума од горната страна на депонијата., информира директорот на Дирекцијата за заштита и спасување, Стојанче Ангелов.
Како што додаде, постојат сомненија дека пожарот бил предизвикан намерно.
„Ќе потсетам само дека летово имавме рекордно високи температури но Дрисла не се самозапали“, рече Ангелов.
Противпожарните возила и дополнителните цистерни од „Комунална хигиена“ интервенираат на терен, а пожарот сè уште не е целосно локализиран.
Командантот на Територијалната противпожарна бригада на Град Скопје, Звонко Томевски посочи дека станува збор за посериозен пожар од поголеми размери, при што постоела опасност огнот да се прошири.
Македонија
Филипче од Париз: Потребен е проактивен пристап и политички консензус за напредок кон ЕУ

Претседателот на Социјалдемократскиот сојуз на Македонија, Венко Филипче, во рамки на еднодневната работна посета оствари повеќе средби со високи француски политички претставници, на кои во фокусот на разговорите беа реформската агенда и предлог Резолуцијата на СДСМ, како гаранција за заштита на националните интереси и решение за деблокирање на преговите со ЕУ.
Филипче одржа работна средба со пратеничката и потпретседателка на групата за пријателство Франција – Северна Македонија во француското Собрание, Лилиана Танги, со шефот на Канцеларијата за соседство, проширување и одбрана при Генералниот секретаријат за европски прашања, Жозеф Жустиниани, како и со директорот за Континентална Европа при Министерството за Европа и надворешни работи, Брис Рокфеј и со специјалниот претставник за Балканот, Рене Троказ.
На состаноците беше истакната поддршката од Франција во процесот на евроинтеграција, но и потребата од брзи резултати во исполнување на обврските и работа на реформите.
Филипче ги презентираше позициите на СДСМ и истакна дека партијата има проактивен пристап и работи на решенија за деблокирање на евроинтеграцискиот процес. Тој нагласи дека во завршна фаза е подготовката на Резолуцијата, со која ќе се потврдат националните црвени линии – македонскиот јазик, култура и идентитет, како и механизми за справување со евентуални непринципиелни барања што излегуваат надвор од Преговарачката рамка.
Во разговорите беше потенцирано дека во Европската Унија постои јасен консензус за проширувањето, и дека тоа е можност која Македонија мора да ја искористи. Француските претставници пренесоа очекувања дека нашата земја треба да направи напредок во евроинтеграцискиот процес, како што тоа веќе го прават државите од регионот, особено Албанија и Црна Гора.