Цените на производите во продавниците и понатаму растат, граѓаните живеат сè потешко и потешко, народот станува се посиромашен.
Тоа го потврдуваат и официјалните податоци. Државниот завод за статистика објави дека инфлацијата во месец ноември оваа година достигна 4,3%, истакна на прес-конференција Лолита Ристова, членка на Извршниот одбор на СДСМ.

Оваа бројка, оценува таа, не е само статистика, туку покажува колкав е ударот врз џебот на секој наш граѓанин, врз секој семеен буџет.

Владата, како што вели, води целосно погрешна економска политика, дека мерките со така наречените „кошнички“ немаат никаков ефект, напротив, цените растат инфлацијата ги јаде платите, а стандардот на граѓаните опаѓа.

„Споредбено со октомври во 2023 година со октомври оваа 2024 година, трошоците за живот се зголемиле за 3,5 проценти, а цените на мало се зголемиле за 3,9 проценти за овој период. Ова е потврда дека „есенската кошничка„ не даде никаков, буквално никаков резултат. На едно четиричлено семејство, му требаат 62.021 денари за да може да го помине месецот. Новогодишната „кошничка“, која ја сега повторно се најавува исто така нема да има никаков ефект затоа што власта им остави време на трговците кои веќе ги зголемија цените. Кошничките се лага и измама, додека Владата го храни народот со лаги цените само растат а платите стојат. Животот во Македонија со власта на ДПМНЕ станува луксуз за обичниот човек“, додава ЁРистова.

СДСМ, како што напомена, уште еднаш бара итно прифаќање на предлозите кои ги даде СДСМ кои докажано функционираат и ќе ги намалат цените вистински и на долг рок. Прво со укинување на ДДВ за храна а потоа и со покачување на платите.

„Доста е од лаги и манипулации кои граѓаните сами ги препознаваат во маркетите. Секоја лоша политика на Мицкоски удира директно по џебот на граѓаните.

Крајно време е Владата нешто да почне да работи за да го заштити стандардот на граѓаните. Во спротивно, оваа зима ќе остане запаметена како периодот кога народот скапо ја платил нивната неспособност“, кажа Ристова.

Наместо реформи гледаме брутална партизација на судството, би рекла дури и окупација од страна на ВМРО-ДПМНЕ. Скандалозен е изборот на Данка Ристова за нов член на судскиот совет, избарана е сопруга на актуелниот градоначалник на ВМРО-ДПМНЕ од Радовиш, Ацо Ристов, вели Богданка Кузеска, портпаролка на СДСМ.

„Ова се партиски инсталации во судството како во време на режимот. Истото тоа што го правеше ДПМНЕ порано се прави и сега. Чист обид за поставување на контролирано, партиско судство кое нема да служи на граѓаните, туку на нивните интереси“, посочува Кузеска.

Како што вели, ВМРО-ДПМНЕ е партија која секогаш кога е на власт имала една единствена цел, ставање на судството под контрола и сега тоа го докажува на дело.

Додека гледаме како партиски инсталираниот Директор на киднапирана Агенција за национална безбедност, Бојан Христовски е назначен и за асистент на Факултет, за скандалот околу неговиот избор молчат и Јавното обвинителство и Државната комисија за спречување на корупцијата. Што се чека? До каде е предметот што го оформи Јавното обвинителство? Зошто молчи Државната комисија за спречување на корупција?, вели Богданка Кузеска, портпаролка на СДСМ.

„Поминаа два месеци откако изби скандалот. Доказите, фактите и аргументите кои се објавија и веќе се јавно достапни. Се оспоруваат условите за именување на Директор на АНБ, сомнежи има за работниот стаж, образованието, искуството и јазичниот сертификат од Бугарија од непостоечка агенција. Прашањето е дали воопшто ги исполнува условите да биде на оваа висока позиција. Како што јавно соопшти ДКСК предметот за Христовски е отворен на 22-ри октомври. Еве го сме декември, речиси два месеци поминаа а разрешница нема. Побара ли ДКСК од Просветниот инспекторат информации за факултетската диплома на Христовски од Универзитетот за менаџмент и туризам? Бидејќи законскиот рок од 15 дена за одговор е поминат јавноста очекува ДКСК да ги соопшти сите наоди и сите детали за овој скандал. Не сакаме да веруваме дека се прават обиди да се заташка овој случај. Јавното обвинителство пак на 1 ноември соопшти дека отворило предмет за Христовски. Помина повеќе од од еден месец, нема никаква информација. Да не треба некој како Мицкоски да ги прозива обвинителите дека добиваат главоболка, покачена температура, грчеви во стомак, дијареа?“, вели Кузеска и додава:

„СДСМ бара од Јавното обвинителство и од Државната комисија за спречување на корупцијата да ја информираат јавноста за предметите за овој скандал. Клучната безбедносна агенција стана партиска испотава на ДПМНЕ кога наместо професионалец власта ја киднапираше АНБ со поставување претседател на Градскиот комитет за директор. Јавноста чека разрешница за лажните сертификати за познавање англиски јазик, за стажот, за образованието, дали е сторено кривично дело, кој ќе понесе одговорност? Обвинителство и ДКСК должат одговор на клучното прашање: Дали воопшто Христовски ги исполнува условите пропушани со закон за да биде на оваа позиција? Ги повикуваме Јавното обвинителство ДКСК да излезат пред јавноста и да соопштат што досега е преземено и до каде е случајот за скандалот со Христовски“.