Македонија
Универзитетот во Тетово е дувло на непотизам и корупција, велат од Левица

Соопштение на политичката партија Левица
„Деновиве голем скандал го тресе Медицинскиот факултет при Државниот универзитет Тетово (ДУТ). Имено, беше обелоденето дека на студентите при Факултетот за медицински науки им предаваат професори чии научни трудови се плагијати.
Италијанскиот весник ‘Веритас во неодамнешен напис открива плагијат и копирање научни трудови од страна на неколку уважени професори на медицина од Универзитетот во Тетово. Како што се наведува во истражувањето на ‘Веритас’, станува збор за научни трудови на: Емира Беџети, Неџбедин Беадини, Албулена Беадини, Шеќибе Беадини, Мирлинд Беџети, Дестан Халиди, Екрем Исмани, кои се очигледен плагијат, во голем дел директно препишан текст, без да се наведат извори или, пак, да делата да бидат наведени во литературата.
Направена е анализа на спорните дела од страна на истражувачи и во споредба со оригиналните текстови, при што е утврдено дека научните трудови на овие професори се целосен плагијат. Имено, во овие трудови професорите автори имаат украдено буквално цели текстови, во кои променети се само името, презимето и државата каде што се објавува.
Ова треба да биде аларм за целата јавност, но и за академската заедница – дека во Македонија, додека се наметнуваат квазиреформи во образованието, лица објавуваат квазинаучни трудови, без никаква одговорност и врз основа на тоа добиваат академски звања и остваруваат други придобивки. Она што е највџашувачко е тоа дека вакви лица не само што заземаат улога на педагози тие дури се и професори на високообразовните институции, каде што предаваат знаења на идни генерации, а некои од нив можеби се и т.н. екперти, на кои се повикува министерката за образование, Мила Царовска.
Ова не само што го нарушува квалитетот на наставата туку го доведува во прашање и кредибилитетот на високообразовните институции. Деградацијата на високото образование, недостигот на контрола, финансиската мотивираност, непотизмот, партиските интереси, антиакадемизам, интелектуална мафија – се само некои од причините што доведуваат до вакви случувања. Сепак, на крајот најоштетени се студентите, кои не го добиват образованието што го заслужуваат, а кое патем и скапо го плаќаат.
Со цел да го прикрие скандалот, ректорот на ДУТ го суспендирал деканот на Медицинскиот факултет, д-р Кастриот Хаџиреџа, откога претходно неуспешно се обидувал да изнуди оставка од него.
Левицата стои зад ставот дека за професорите обвинети за плагијат треба да следи поништување и одземање на академското звање, а воедно и престанок на договорот за работа“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Костадиновска-Стојчевска до Љутков: Се знае ли кој е државен секретар во Министерството за култура?

Пратеничката на СДСМ, Бисера Костадиновска-Стојчевска, на денешната собраниска седница посветена на пратенички прашања, упати прашање до министерот за култура и туризам, Зоран Љутков. Прашањето се однесуваше на прекинувањето на значајни проекти во културата и на фактот дека незаконски се претставува кој е државен секретар во Министерството за култура.
„Драго ми е што ги продолжувате проектите коишто беа наследени, како што е еден од нив – реконструкцијата на кино „Партизан“. За волја на вистината, не ги продолжувате сите, меѓутоа сепак гледаме некое поместување.
Најголем дел од проектите ги прекинавте, како „Љубојно“ и ред други значајни проекти, меѓутоа никој не дозна зошто.
Не дознавме ни зошто нема резултати од конкурсот за креативни индустрии, како што не ги видовме ниту програмите на националните установи јавно објавени, за да знае јавноста што е тоа што е одобрено“, рече Костадиновска-Стојчевска.
„Не знаеме зошто не распишувате конкурс за капиталните дотации до ЕЛС, а имате 200 милиони денари на таа сметка – конкурс којшто се објавува најдоцна до април.
Знаеме колку потрошивте за Јапонија, и дека отсега имате купено авио карта за во септември повторно за Јапонија. Изгледа убаво е таму.
Но, не знаеме кој е државен секретар во Министерството за култура. Затоа моите три прашања до вас се следниве: Кој е државен секретар во Министерството за култура на 22 мај 2025 година? Кој е државен секретар во Министерството на култура на 24 мај 2025 година? Кој е државен секретар во Министерството за култура на 26 мај 2025 година“, праша пратеничката Костадиновска-Стојчевска.
Македонија
Арсовска: Висар Ганиу фатен со криминално легализирање дивоградби со фалсификат, документи се доставени до обвинителство

„Висар Ганиу фатен со криминално легализирање дивоградби со фалсификат, за што документи се доставени до обвинителство и има изјави кои сведочат за начинот на кој ги спроведувал овие незаконски постапки, институциите уште се мислат кога да ПОЧНАТ да постапуваат“, вели градоначалничката на Град Скопје, Данела Арсовска.
„Во меѓувреме Висар си брише имотни листови од Катастар, замислете овие луѓе кои до вчера имале имот, денес немаат, поради неговите фалсификати.
Фалсификатот го запишувал во Катастар на 20.03.2025 година сред денови на жалост за трагедијата во Кочани, користејќи период кога мислел дека нема никој да примети што прави.
1. Барање за упис во катастар
2. Решение за упис во катастар со фалсификат документи
3. Барање за бришење имотен лист од катастар
4. Решение за бришење да може да го уништи досието со фалсификатите
5. Катастар за 24 часа го брише досието со што директно овозможува да можат да се уништат докази за делото
Зошто само 2% доверба имаат граѓаните во правосудството? Во моментов во затвор лежат луѓе за влез во Собранието на 27 април и за 100 ќебапи. Таму се постапило веднаш! Во Чаир кај Висар Ганиу ќе влезат да обезбедат докази за некоја година, нека троши кеш и нека ужива до тогаш!“, додаде Арсовска.
Македонија
Бројот 192 моментално не е во функција, граѓаните кои имаат потреба, да го користат 112, велат од МВР

Министерството за внатрешни работи ги известува граѓаните дека бројот 192 поради технички причини моментално не е во функција и се преземаат мерки за нивно отстранување.
„Ве информираме дека во функција е бројот 112 и граѓаните кои имаат потреба можат да го користат овој број“, додаваат од МВР.