Договорот од Преспа, како и секој друг меѓународен договор, не е совршен, но отвора можности и перспективи за напредок на земјата, изјави поранешниот специјален пратеник на ЕУ во РМ, амбасадорот Ален Ле Роа, во рамките на панел-дискусијата што се одржа денеска во Министерството за надворешни работи.

Во своето обраќање Ле Роа нагласи дека Македонија се наоѓа пред историски момент и одлука, како и пред историски крстопат и дека официјален Париз цврсто стои зад евро-атлантстките и европските интеграции на нашата земја. Тој направи споредба со елисејскиот договор, што во почетокот на 1963 го потпишаа челниците на Франција и Германија. Рече дека овој договор тогаш наидувал на критики, но од денешна перспектива се покажал како визионерски чекор, што овозможил двете земји, но и цела Европа, да тргнат кон мир, напредок и благосостојба.

„Оттука, на договорот од Преспа треба да се гледа како историски и визионерски чин, што отвора широки хоризонти, со потенцијал да се искористат отворените перспективи и можности за Република Македонија“, нагласи амбасадорот Ле Роа.

Воведно обраќање на панелот имаше државниот секретар во МНР, амбасадорот Виктор Димовски, кој се осврна на изминатиот едногодишен период оценувајќи го како интензивен и значаен. Притоа нагласи дека активностите на новата реформска Влада се одвиваат на два паралелни колосека: спроведување длабоки и одржливи внатрешни реформи во владеењето на правото и градење независни институции, како и обновување на македонската позиција во меѓународните односи, примарно преку унапредување на добрососедските односи.

„Фокусот денес е на референдумот, кој се смета за историска раскрсница за Македонија и историска шанса граѓаните да учествуваат во дизајнирањето на својата иднина“, истакна државниот секретар Димовски.

„Реформи, референдум и евро-атлантски интеграции на Република Македонија“, беше темата на денешната панел-дискусија, на која учествува и францускиот амбасадор, Кристијан Тимоние, како и претставници од државните институции, медиумите, невладините организации и академската јавност.