По покана на министерката за надворешни работи на Република Бугарија, Екатерина Захариева, во улога на земја претседавач со Организацијата за црноморска економска соработка, министерот за надворешни работи на Република Северна Македонија, Никола Димитров, денеска, во Софија, учествуваше на 40. состанок на Советот на министрите на Организацијата за црноморска економска соработка.

На денешниот состанок нашата земја доби покана да стане рамноправна членка на оваа организација. По тој повод министерот Димитров имаше обраќање во кое ги изнесе придобивките и можностите што ги нуди членството во оваа организација преку продлабочување на заемното почитување, довербата и соработката, во духот на пријателството и добрососедството.

„Ова е пресвртница за нашата регионална соработка давајќи ни можност стратешки да ги продлабочиме и зајакнеме нашите заеднички визии промовирајќи ги предностите што ги нуди овој регион. Земјите членки на БСЕК се и наш економски партнер не само поради нашата географската положба туку и поради нашата културолошка и историска поврзаност. Проширувањето на Организацијата за црноморска економска соработка со Република Северна Македонија само по себе претставува одличен пример за регионална соработка и солидарност поттикнувајќи ги нашите заеднички аспирации за раст и одржлив развој. Во овој контекст членството во Организацијата отвора нови хоризонти за економска соработка во регионалната средина. Тоа дополнително ќе го збогати духот на пријателство и добрососедство и особено за зајакнување на меѓусебното почитување, доверба и размена во регионот на БСЕК.
Не треба да ја пропуштиме можноста за подобар квалитет на процесите што нè зближуваат наместо да нè раздвојуваат. Градењето мостови на пријателство се од суштинско значење за градење инфраструктура и поттикнување на растот“, изјави Димитров.

Министерот оствари средба со Захариева, при што двете страни ги потврдија заложбите од двете страни за имплементација на договорот за пријателство.

Црноморската економска соработка (БСЕК) се појави како ветувачки модел на мултилатералната политичка и економска иницијатива со потпишувањето на декларацијата од самитот во Истанбул и изјавата на Босфор од страна на шефовите на држави и влади на земјите од регионот на 25 јуни 1992 година. Со влегувањето во сила на оваа повелба на 1 мај 1999 година, БСЕК стекна меѓународен правен идентитет и се трансформира во полноправна регионална организација – Организација за црноморска економска соработка. Во БСЕК членуваат 12 земји (Албанија, Ерменија, Азербејџан, Бугарија, Грузија, Грција, Молдавија, Романија, Русија, Србија, Турција, Украина). Северна Македонија ќе стане полноправна членка по ратификација на повелбата на БСЕК.