Под слоганот „Илинден – нашата сила за иднината“, денес се одбележува 2 Август – Денот на Републиката – Илинден. Во таа чест, делегации на Владата, Собранието и на претседателот ќе го чествуваат празникот преку голем број свечености.

И оваа година граѓаните го слават националниот празник почитувајќи ги заедничките, интеркултурни вредности, меѓусебно почитувајќи се, празнувајќи гордо, достоинствено и обединето.

Чествувањето на денот, кога славиме 119 години од започнувањето на Илинденското востание, прогласувањето на Крушевската Република и денот кога пред 78 години е одржано Првото заседание на АСНОМ и воспоставувањето на нашата државност, почна традиционално синоќа, со манифестацијата „Десет дена Крушевска Република“.

Претседателот на Владата, Димитар Ковачевски, годинава ја предводи владината делегација во Крушево, каде ќе има свое обраќање.

Во состав на владината делегација предводена од премиерот се првиот вицепремиер и министер за политички систем и односи меѓу заедниците, Артан Груби, заменичката на претседателот на Владата задолжена за политики за добро владеење Славица Грковска, министерот за внатрешни работи, Оливер Спасовски и министерката за култура Бисера Костадиновска-Стојчевска.

Владината делегација ќе се поклони и ќе оддаде почит положувајќи цвеќе на вечното почивалиште на првиот претседател на Крушевската Република, Никола Карев, во споменикот „Македониум“ на Гумење и на споменикот на паднатите борци на Слива, кои се симбол на жртвата на востаниците за одбрана на Крушевската Република.

Од 10:30 часот, со присуство на панихидата за загинатите илинденци во црквата „Св. Никола“, на владината делегација и со положување цвеќе на споменикот на Мечкин Камен продолжува церемонијата во чест на националниот празник, по што на Мечкин Камен во 11:30 часот, започнува манифестацијата на која свечено ќе се обрати претседателот на Владата, Димитар Ковачевски.

Во рамки на централниот дел од државната програма за чествување на 2 Август во Крушево ќе биде одржана празнична културно-уметничка програма.

Претседателот Стево Пендаровски утрово ќе учествува на свечена манифестација во вилата на Водно, каде се очекува да одржи говор и постхумно да ги одликува со орден Крсте Црвенковски и Невена Георгиева-Дуња.

Пендаровски по повод одбележувањето на Илинден, во текот на денот ќе ја предводи и државнo-црковната делегација во посета на манастирот „Св. Прохор Пчински“.

Државната празнична програма продолжува пред Меморијалниот центар АСНОМ, во Пелинце, во организација на претседателот на Собранието, Талат Џафери.

Свечената програма за одбележување на Денот на Републиката и оваа година го опфаќа традиционалното чествување на Илинден во Смилево во организација на Општина Демир Хисар, каде се чествува со положување цвеќе и фолклорна манифестација.