Македонија
Македонија првпат доби жена претседател – која е Гордана Силјановска-Давкова и за што се залага
Првпат во Македонија во претседателската фотелја седнува жена откога Гордана Силјановска-Давкова, поддржана од ВМРО-ДПМНЕ, го победи досегашниот претседател Стево Пендаровски на изборите со разлика од повеќе од 300.000 гласа.
Според последните податоци објавени на веб-страницата на ДИК, Силјановска освоила 560.170 гласа (65,41 отсто) наспроти Пендаровски со 251.541 (29,25 отсто).

Таа синоќа за време на победничкото обраќање до јавноста рече дека од овој момент ќе се однесува како претседателка на сите граѓани, на сите етнички групи, партии, оние што не се во партиите и вети дека нема да заборави на разноликоста. Силјановска истакна дека за време на кампањата го зборувала она што го мисли, се посветила на целта, а наградата за неа е непроценлива. Рече и дека нема поголема инспирација од тоа жена да стане претседател и ќе ги штити државните и националните интереси.
Која е Силјановска-Давкова
Во кампањата Силјановска велеше дека придавката „Северна“ нема да ја користи, но ќе стои пред табла со новото уставно име. Воедно, таа имаше изјавено и дека е против уставните измени за внесување на Бугарите во Уставот, но ако Собранието донесе таква одлука, ќе ја почитува бидејќи Собранието е уставотворен орган. Порачуваше дека треба да ги почитуваме темелните вредности на нашиот уставен поредок, а преспанскиот договор за неа е политички и правно отворено прашање.
„Ама и во какви било односи кон надвор со држави поголеми од нас, па и со сојузи како што е ЕУ, ние вистинските Европејци имаме обврска да потсетуваме на темелните вредности оти без нив нема ниту демократија, ниту просперитет, ниту мир. Не се оди во Европа со реторика ЕУ – НАТО, НАТО – ЕУ. Не, туку со почитување на вредностите и со практикување на вредностите, само ако станеме нормална, стандардна држава, ќе бидеме во рамките на ЕУ“, велеше Давкова.
Честопати говореше за жените поентирајќи дека и политиката е од женски род, а со претседателка македонските жени ќе станат поуспешни.
Кампањата ја водеше со слоганот „Македонија повторно горда“, кој, како што рече, е поради хроничната и актутна состојба со македонската демократија, која не само што е во тешка криза туку зборува и за една слаба држава. Во таквата држава најголеми жртви се граѓаните и кога вели „Македонија повторно гордаа“, пред сè, мисли на граѓаните – повторно горди, говореше Давкова.
Силјановска-Давкова е родена на 11 мај 1953 година во Охрид. Таа е македонски универзитетски професор, правник и собраниски пратеник во претходните четири години.
Во нејзината биографија стои дека основно и средно образование завршила во Скопје (1973). Дипломирала на Правниот факултет во Скопје (1978), каде што и магистрирала. Докторирала пред комисија предводена од проф. Франц Град со Cum laude на Правниот факултет во Љубљана, на тема Local Selfgovernment – between Norms and Reality во 1994.
Била избрана за асистент по предметот политички систем на Правниот факултет во Скопје (1989), за доцент по уставно право и политички систем (1994), а потоа и за редовен професор во 2004. Била член на Уставната комисија на Собранието на РМ (1990 – 1992) и министер во владата на РМ (1992 – 1994). Експерт за избори на ООН и потпретседател на групата Независни експерти за локална самоуправа при Советот на Европа. Член е на Венециската комисија. Автор е на стотина научни труда за уставното право и политичкиот систем.
И на претседателските избори во 2019 година таа беше кандидат на ВМРО-ДПМНЕ, но ги изгуби од Стево Пендаровски.
На парламентарните избори во 2020 година Силјановска е носител на кандидатскиот список за пратеници на ВМРО-ДПМНЕ и коалицијата во Изборната единица 1. Од август 2020 година таа е пратеник во македонското Собрание.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Неколку скопски општини денеска без струја
Од ЕВН Македонија известуваат дека за денеска се планирани неколку прекини во снабдувањето со електрична енегија на корисниците од градот Скопје и неговата околина:
· од 06:00 – 10:00 часот, корисниците од ул. Пајак и ул. Наум Наумовски Борче. (Општина Центар)
· од 08:00 – 12:00 часот, дел од корисниците од ул.Пејо Јаворов (општина Кисела Вода)
· од 09:00-11:00 часот корисниците од улиците со бр. 406 и бр, 408 во с. Марино. (Општина Илинден)
· од 09:00-15:00 часот корисниците од улица со бр. 101 во нас. Волково. (Општина Ѓорче Петров)
· од 09:00-15:00 часот корисниците од улиците Индира Ганди, Брсјачка Буна, Овчеполска, Пелагонија, Демирхисарска, Сландол, Хаџи Јован Шишков,Злетовска, Тиквешка и ул.Нов Живот. (Општина Шуто Оризари)
Македонија
Претежно облачно, попладне и кон крајот на денот повремен дожд
Променливо облачно, попладне и во текот на ноќта ќе има повремени локални врнежи од дожд, а на повисоките планини врнежи од дожд и снег. Ќе дува умерен, а долж Повардарието повремено засилен ветер од југоисточен правец.
Минималната температура ќе биде во интервал од 1 до 6, а максималната ќе достигне од 6 до 12 степени.
Во Скопје, претежно облачно, попладне и кон крајот на денот ќе има повремен дожд. Ќе дува слаб до умерен, а во делови од котлината повремено засилен ветер од југоисточен правец.
Минималната температура ќе се спушти до 3, а максималната ќе достигне до 11 степени.
Времето во наредните денови
Продолжува период на променливо облачно време со повремени врнежи од дожд, кои локално ќе бидат пообилни. На повисоките планини врнежите од дожд ќе преминуваат во врнежи од снег. Ќе дува умерен, повремено засилен јужен ветер што ќе услови до недела релативно високи температури. Од недела попладне ќе започне да дува северен ветер и температурите ќе бидат во опаѓање.
Македонија
Магла на неколку патни правци, слаб снег на Попова Шапка
Сообраќајот на државните патишта се одвива во зимски услови, по претежно влажни коловози. Слаби врнежи од снег на Попова Шапка без задржување на коловоз. Намалена видливост поради појава на магла има на планинските премини Плетвар до 100 метри, Стража до 80 метри и кај Крушево до 30 метри, извести АМСМ.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.

