Македонија
Македонија побара посредство од Франција за олеснување на комуникацијата и конечна деблокада на релација Скопје – Софија

Комисијата за надворешна политика и надворешна трговија оствари средба со Кристоф ле Риголер, вонреден и ополномоштен амбасадор на Франција во земјава.
Претседателот на Комисијата, Муса Џафери, ја поздрави првата средба на Комисијата со амбасадорот Ле Риголер. Притоа го потенцира придонесот на Франција од осамостојувањето на земјата до ден денес, вклучително бадентерот и рамката за решавање на спорот со Бугарија.
„Токму билатералното прашање со источниот сосед, односно уставните измени, беа во фокусот на разговорите, како услов за отворање на преговорите за членство во Европската Унија. Во таа насока, беше побарано посредување на Франција за олеснување на комуникацијата и конечна деблокада на релација Скопје – Софија. Како што рече Џафери, единственото решение за земјата е интеграција во ЕУ, не постои друга алтернатива затоа што припаѓаме на Европа и сме членки на НАТО“, соопшти Собранието.
Францускиот амбасадор истакна дека проширувањето е комплицирана тема, но постои отворен прозорец и Западен Балкан треба да го искористи моментот.
„Евроинтегративниот процес е долг, со различни етапи, затоа апсолутни гаранции не може да има, а на крајот мора да следи и ратификација од сите земји членки на ЕУ. Најдобра гаранција е двете земји да можат да се договорат со помош на други држави или институции. Франција, како и други земји членки, е расположена да помогне и да даде свој политички ангажман за олеснување на преговорите. Сепак, мора да постои политички договор за деблокада, а за тоа е потребна добра волја и мал политички ризик од двете страни“, рече амбасадорот. Во оваа насока, ги упати и пратениците од двете земји со меѓусебни средби и разговори да придонесат кон враќање на довербата.
Во дискусијата се вклучија и членовите на Комисијата – Иванка Василевска и Реџеп Исмаил, како и заменик-членката и потпретседателка на Собранието, Весна Бендевска.
Василевска ги истакна заложбите за откочување на процесот со билатералното прашање и вербата дека копенхашките критериуми ќе бидат приоритетни за интеграцијата на Западен Балкан, зашто вакви преседани со билатерални спорови ќе се рефлектираат и во иднина кај други земји аспиранти за ЕУ.
Бендевска потсети на тоа дека земјата е рекордер во чекалната на ЕУ и следствено на тоа е алармантната разочараност на граѓаните и државата. Го спомена Францускиот предлог од 2022 година кој не беше поддржан од граѓаните и постоењето несиметричен притисок само кон нашата земја во билатералниот спор со Бугарија. Иако сме мала земја, рече Бендевска, сепак имаме долга историја и местото ни е во ЕУ. „Апсурдно е што се наоѓаме во еден билатерален спор кој се покажува како поголем одБигарија исполнувањето на копенхашките критериуми“, рече таа.
Пратеникот Реџеп Исмаил го искажа ставот дека волјата на ЕУ да ги прифати земјите од Регионот, се покажува како геостратешка потреба за Западен Балкан. „Јавноста во земјава нема јасна слика за бенефитите од ЕУ и сомнежот кај народот расте“ – рече тој.
На крајот од средбата, амбасадорот изрази свесност за евроскрептицизмот и револтот од долгото чекање пред вратите на ЕУ, но нагласи дека треба да се гледаат огромните бенефити од членството во европското семејство. Нашата земја ја смета за пример во Регионот и Европа како мултитничка демократија, и како таква треба да се вклучи во обединувањето на европското семејство со Западен Балкан.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ЕСМ: Од 15 октомври официјално започнува грејната сезона 2025/2026

Од 15 октомври официјално започнува грејната сезона 2025/2026 за потрошувачите приклучени на системот за централно греење во градот Скопје, со кој управува АД ЕСМ. Согласно регулативата, грејната сезона може да започне и порано, односно од 1 октомври, доколку прогнозата за средна надворешна температура за наредниот ден изнесува 12˚С или пониско, според податоците на Управата за хидрометеоролошки работи.
На веб-страницата на ЕСМ Снабдување секојдневно ќе се објавува информација дали се исполнети условите за испорака на топлинска енергија сè до 15 октомври. Овие информации ќе бидат објавувани согласно одлуката на Регулаторната комисија за енергетика и водни услуги на РСМ и врз основа на прогнозите за средна дневна температура на воздухот во Скопје од Управата за хидрометеоролошки работи.
„Навременото снабдување со топлинска енергија е клучно за комфорот на нашите потрошувачи. Затоа апелираме да се следат препораките и да се соработува со службените лица за да се обезбеди сигурно функционирање на системот. Ги повикуваме сите корисници навремено да ги завршат потребните поправки на своите внатрешни грејни инсталации, бидејќи редовното одржување е нивна обврска. Завршените интервенции треба да се пријават во Центарот за грижа на потрошувачи, со што ќе се овозможи непречено снабдување со топлина. Исто така, важно е заедниците на сопственици да обезбедат непречен пристап на службените лица до топлинските потстаници и редовно електрично напојување во топлинската станица, односно платени сметки за електрична енергија и функционална електрична инсталација.
Сите потрошувачи можат да проверат дали нивниот објект е на списокот на затворени објекти без услови за испорака на топлина, кој е достапен на линкот „Затворени објекти – ЕСМ Снабдување“. За информации, пријави на дефекти или известувања за завршени интервенции, потрошувачите можат да се јават во Центарот за грижа на потрошувачи на телефонските броеви 02 3076 200 и 075 400 100“, се вели во соопштението на ЕСМ.
Македонија
Делови од Ѓорче Петров и Сопиште денеска без струја

Од ЕВН Македонија АД известуваат дека денеска без електрична енергија ќе останат:
– во периодот од 09:00 до 13:00 часот, дел од корисниците на улицата Мице Козар, општина Ѓорче Петров;
– во периодот од 10:00 до 12:00 часот, корисниците од ул.4 во Горно Соње, општина Сопиште.
Македонија
Променливо облачно со сончеви периоди, максималната температура до 24 степени

Времето денеска ќе биде променливо облачно со сончеви периоди. Ќе дува слаб до умерен ветер од северен правец. Минималната температура ќе биде во интервал од 5 до 14, а максималната ќе достигне од 17 до 24 степени.
Во Скопје, променливо облачно со сончеви периоди. Ќе дува слаб ветер од северен правец. Минималната температура ќе се спушти до 12, а максималната ќе достигне до 22 степена.
Времето во наредните деново
Од среда попладне до петок под влијание на нов влажен бран ќе има врнежи од дожд, локално пообилни (над 30 l/m²). Поради продор на постудена воздушна маса од север и засилен северен ветер во четврток и петок на повисоките планини ќе има услови врнежите од дожд да преминуваат во повремен снег. Температурата значително ќе опадне. Во деновите од викендот ќе има стабилизирање на времето и постепен пораст на дневната температура.