Македонскиот дипломатски синдикат (МДС) повторно во една недела најостро реагира против „растечкиот тренд на разбивање на професионалноста и внатрешните регулативи во Министерството за надворешни работи“.

„По скандалозните именувања партиски кадри во текот на минатата недела на клучни позиции во дипломатската мрежа, денес се соочуваме со нов дипломатски бисер. Имено, за генерален конзул во Мелбурн се предлага целосно анонимна личност, на која единствена квалификација, според медиумите, е дека била дел од безбедносниот тим на премиерот Ковачевски.

И покрај обидите за прикривање на информацијата за назначувањето на г-ѓа Елена Брајковска за генерален конзул, користејќи креативни флоскули од типот „нема таква точка на отворената седница“ иако овие одлуки се носат на затворени седници, денес именуваната веќе ги собира потребните потписи во МНР пред почнување на подготвителните процедури за упатување“, велат од МДС.

„Веќе укажавме, Македонскиот дипломатски синдикат бил и ќе продолжи да биде последниот бедем и механизам за зачувување на угледот и професионалните стандарди во дипломатската служба. Затоа повикуваме за итна ревизија на овие упатувања и враќање на дипломатските стандарди во државата.

На крајот, сè уште чекаме на одговор од министерот Османи за фрагрантното кршење на Законот за надворешните работи при упатувањето на г. Мухаби Синани за генерален конзул во Њујорк. Пред да го добиеме одговорот, упатуваме на целосно читање на законот, односно да се обрне внимание на членот 5, од оваа измена што беше наведена како основ за ова упатување („Службен весник“ 226/2015), со која се додава нов член, 35-а, кој гласи:

Член 35-а

Најмалку една третина од вкупниот број шефови на дипломатско-конзуларни претставништва се именуваат од редот на дипломатско-конзуларните службеници со високи дипломатски звања во Министерството.

Со оглед на ова, прашуваме кое е дипломатското звање на Синани и дали се крши Законот за надворешните работи“, се наведува во соопштението на МДС.