Македонија
Манифест на македонските учители
Вкупно 844 наставници, професори, научници, лекари, општествени и културни дејци, педагози, уметници и новинари стојат зад Манифестот на македонските учители. Го пренесуваме интегрално:
„Ние, македонските учители (наставници, професори, научници, лекари, општествени и културни дејци, педагози, уметници, новинари и сите што помагаме во воспитанието и образованието на нашите поколенија), кои целиот свој живот им го посветуваме на уката и науката на нашите деца, на нашиот македонски народ и на неговиот просперитет, повикувајќи се на Повелбата и на Општата декларација на ООН за човековите права и слободи, како и на Европската конвенција за заштита на човековите права и слободи, а во духот на КРУШЕВСКИОТ МАНИФЕСТ и МАНИФЕСТОТ НА АСНОМ, го искажуваме своето незадоволство од предлогот на францускиот претседател г. Макрон, во кој македонскиот народ е предмет на омаловажување и понижување.
Францускиот предлог, во кој билатералните протоколи со Бугарија стануваат составен дел од преговарачкиот процес, македонскиот народ и македонскиот јазик ќе ги сведе на еднострана изјава, која нема важност пред институциите на ЕУ. Македонскиот народ ќе биде дрво без корен и ќе нема можност за изразување на својот континуитет во просторот и времето. Со овој предлог уште пред да почне преговарачкиот процес Македонците ќе бидат сведени на вештачки конструкт од 1944 година. Македонскиот јазик, според овој предлог, ќе биде историски непостоен за ЕУ.
Предлогот наведува дека „ЕУ ќе ги земе предвид соодветните еднострани декларации на Бугарија и на Македонија за македонскиот јазик“, а содржината на декларациите за македонскиот јазик не се соопштува. Како што ни е познато, бугарската официјална политика отсекогаш тврдела дека македонскиот јазик не постоел пред 1944 година, но сега тоа ќе го верификува и ЕУ, бидејќи во сите идни документи на ЕУ, каде што се споменува македонскиот јазик, ќе биде додадено „во согласност со Уставот на Република Македонија“, а Република Македонија ќе мора да изјави „дека македонскиот јазик, како што се наведува во нејзиниот Устав, е официјален јазик на државата, кој е кодифициран во 1945 година“.
Македонски народе, драги Македонки и Македонци, Ќе ве потсетиме на зборовите напишани во МАНИФЕСТОТ НА АСНОМ:
„Во деновите на најголемите световни стресенија, во времето на најкрвавата борба на македонскиот народ, твоето прво народно Собрание израснато од крвта и од животите на најарните свои синови, во твое име излегува пред лицето на целиот свет да каже на пријатели и душмани, на сојузници и окупатори, на блиски и далечни, оти македонскиот народ е решен да заживее слободен живот и оти никаква сила на светот не може да му застане на неговиот пат кон полна национална слобода“.
Драги наши сограѓани од сите етнички и верски заедници во нашата заедничка татковина Република Македонија, ќе ве потсетиме на зборовите во Крушевскиот манифест:
„Ние, вашите вечни комшии, пријатели и познајници от хубавото Крушево и неговите китни села, без разлика на вера, народност, пол и убежденија, не можејќи веќе да трпиме тиранијата на жедните за крф и гладните за чоечко месо муртати, шчо гледаат и нас и вас да дотерат до нош, и нас и вас да дотерат до питачки стап и нашата мила и богата земја Македонија да заприлегат на пуста пустиња, денеска дигнафне глава… …Ако и вие не имате како ваши браќа и ни сакате доброто, ако есапите пак да живејте со нас, како шчо сте живејале досега и ако сте верни и достојни синој на мајка Македонија, можите да ни поможите само со едно нешчо ‒ а тоа јет голема помошт. Да не се заортачите со душманите…“
Господине Пендаровски, претседател на Република Македонија, Ваша света должност е да ги браните интересите на македонскиот народ и на сите граѓани што живеат во заедничката татковина Република Македонија.
Да Ве потсетиме дека дадовте свечена заклетва и дека во моментот Вие ги претставувате сите граѓани на Република Македонија, а не политичката елита ниту, пак, која било партија на која ѝ должите нешто. Не заборавајте дека народот Ве избра! Од Вас бараме јасно и гласно да кажете дека не се согласувате со предлогот на г. Макрон, кој всушност ги штити бугарските националистички идеи, во кои се препознава идентитетска ликвидација на Македонија и македонската посебност.
Господине Ковачевски, претседател на Владата на Република Македонија, господине Османи, министер за надворешни работи, г. Маричиќ и сите министри во Владата на Република Македонија, Македонија се наоѓа во најтешките моменти од своето постоење.
Вашата согласност за францускиот предлог во кој се промовираат етноцидните политики насочени против Македонија и Македонците, а легитимирани како „европски“ и „евро-атлански интеграции, никогаш нема да биде заборавена! Не понижувајте се себеси, а со тоа и нашата заедничка татковина Република Македонија повторно! Не дозволувајте уште еднаш да учествувате во распетието. Дури и на Исус Христос му било многу полесно зашто имаше само еден Јуда. Не бидете како Понтиј Пилат миејќи ги рацете од гревот што сакате да го прикриете.
Господине Макрон, претседател на Република Франција, жално е за еден претседател на Франција, земја на слободата и демократијата, локомотивата на европските вредности, земја во која се родиле великани со космополитски умови, како Волтер, Русо, Даламбер, Декарт, како нобеловецот Анатол Франс, кој целиот свој живот се борел против неправдите и кој јавно се залагал за правата на Ерменците и на Македонците во новите констелации на светската геополитика, Вие да го промовирате спротивното.
Потсетете се, ако некогаш сте го прочитале, на делото на Луј Вансен Тома, „Антропологија на смртта“, во кое тој пишува што значи идентитетска смрт. Според него, а и според многумина, таа е најстрашна од сите видови смрт! Господине Мишел, претседател на Европскиот совет, госпоѓо Фон дер Лаен, претседателка на Европската комисија, госпоѓо Мецола, претседателка на Европскиот парламент – како одговорни политичари треба да знаете дека секое искривување на вистината е грев и неправда.
А кога станува збор за објективноста и вистината, ние македонските учители да ве потсетиме дека вистинските заговорници и визионери на обединета Европа не се Моне, ни Аденаур, туку големиот француски поет и хуманист Виктор Иго и просветлениот руски анархист Михаил Бакунин. Затоа, не сметајте го македонскиот народ за глупав и неписмен. Виктор Иго се борел против смртната казна и против апсолутизмот во Франција надевајќи се на подобри денови преку создавањето на „Републиката“ во цела Европа. Михаил Бакунин исто така се борел против руската монархија надевајќи се дека еден ден сите Словени, Германци, Италијанци и Французи ќе живеат во обединета Европа.
Во изјавата упатена до рускиот цар Николај Први Бакунин вели: „Го сакате моето признание. Но, мора да знаете дека грешникот не е обврзан да ги открива неделата на другите. Јас ја имам само честа и совеста дека никогаш не сум ги предал оние што ми веруваат и ете затоа нема да ви дадам имиња“.
Македонскиот народ во својата вековна историја никогаш не се обидувал да зграби нешто што не е негово и љубоморно да го чува од другите, впрочем за тоа зборува и фактот што светите браќа Кирил и Методиј кај нас се нарекуваат сесловенски просветители, а во црковниот календар се сметаат како патрони на Европа.
Јазикот на кој е создадена првата словенска азбука и на кој се напишани првите книги ние го нарекуваме старословенски, а не како нашиот источен сосед старобугарски. Неправедно е во 21 век од страна на ЕУ како чувар на европските и светските демократски вредности да се наметнуваат вакви понижувачки услови во еден непристоен предлог од една водечка земја во ЕУ (Република Франција), каде што се врши геноцид кон цел еден народ.
Длабоко сме уверени дека ова не се вредностите на најпрогресивната заедница на народи и држави за почеток на преговорите на Република Македонија со ЕУ и дека овој предлог, во кој се наведени сите барања на официјална Софија за промена на историјата, за ограничување на правото на изразување на научната мисла, за негирање на македонскиот јазик како атрибут на македонската нација е неприфатлив и за вас. Македонскиот народ е мирољубив и чесен, можеби според вашите критериуми е малоброен, но не е народ без достоинство и вредности, не е народ што сака својата среќа да ја гради врз туѓа несреќа.
Властите во Република Македонија се единствените политичари што потпишале дека нивната држава се оградува од своите национални малцинства во соседството, единствените што се согласуваат на ваков срамен и понижувачки начин да се обезличи македонскиот народ, кој живее на библиска земја споделувајќи ја судбината со сите сограѓани од различна етничка и верска припадност, народ што „светот го разбира како поле за културен натпревар меѓу народите“, а не поле за борба, каде што луѓето се виртуелни фигури, без чувства и емоции, без колективна меморија, поле каде што, место емпатија, се вгнездува културна и духовна агресија.
Ако тоа е условот македонскиот народ да влезе во ЕУ, тогаш ние, македонските учители, велиме НЕ!“, се вели во Манифестот на македонските учители.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Утре врнежи од дожд а на планините снег
Под влијание на влажна и нестабилна воздушна маса утре попладне, во текот на ноќта и во недела ќе има врнежи кои повремено наместа ќе бидат пообилни (над 25 l/m²). Локално ќе има услови за појава на нестабилност со пороен дожд, грмежи и силен ветер. Во понеделник во текот на ноќта и во вторник ќе има заладување со нови пообилни врнежи кои на планините ќе бидат од снег, а на повисоките места од дожд и снег. Утре ќе дува засилен, повремено силен ветер од јужен, а во недела од северозападен правец.
Во Скопје, од утре од попладневните часови до недела ќе има повремени врнежи од дожд, со услови за појава на грмежи. Утре ќе дува засилен, повремено силен ветер од јужен, а во недела од северозападен правец. Во вторник се очекуваат нови врнежи од дожд, кои на повисоките делови од котлината ќе преминуваат во снег.
Македонија
Ѓорѓиевски: Започна реконструкцијата на улицата ,,Лазар Трповски” во Чаир
Градоначалникот на Град Скопје, Орце Ѓорѓиевски заедно со градоначалникот на општина Чаир, Изет Меџити, го означија почетокот на реконструкцијата на улица „Лазар Трповски“, една од најзначајните сообраќајни артерии во овој дел од градот. Овој проект е клучен за обезбедување поголема безбедност, ред и ново достоинство за граѓаните на Чаир, посочуваат од Град Скопје.
„Станува збор за целосна реконструкција со нов асфалт на двете коловозни ленти, изградба на стандардизирани тротоари, велосипедски патеки од двете страни, уредени паркинг-простори и современ систем за јавно осветлување. Со ова се става безбедноста на прво место за сите учесници во сообраќајот, вклучително возачи, пешаци и велосипедисти. Улицата „Лазар Трповски“, која во минатото беше позната како критична точка за сообраќајни незгоди, добива инфраструктура по европски стандарди која обезбедува јасна сигнализација, подобрена прегледност и функционални решенија што одговараат на реалните потреби на граѓаните.
Градот Скопје продолжува со инфраструктурните инвестиции и до крајот на годината ќе започне постапката за целосна реконструкција и проширување на булеварот „Цветан Димов“, кој секојдневно го користат повеќе од 100.000 граѓани и кој поврзува неколку скопски општини. Овој проект ќе овозможи трајно решение за метежот и небезбедноста, ставајќи крај на долгогодишниот сообраќаен хаос на оваа делница“.
Македонија
Манасиевски: Обвинителката Кадриу сведочи дека Филипче немал ниту елаборат за струја за модуларната болница во Тетово
Членот на Централниот комитет на ВМРО-ДПМНЕ, Валентин Манасиевски, на денешната прес-конференција изјави дека, според сведоштвото на поранешната обвинителка Лејла Кадриу, поранешниот министер за здравство Венко Филипче ја составувал техничката спецификација за модуларната болница во Тетово, без да изготви елаборат за електрична енергија, а трагичниот пожар можел да биде спречен.
„Кадриу потврдува дека работата е забошотена. Таа била повикана вечерта на трагедијата да учествува во истрагата, а потоа дошол и Јовевски со свои обвинители, за кои таа вели дека имале обврска да ја држат истрагата под контрола“, рече Манасиевски.
Тој додаде дека, според Кадриу, модуларните болници биле изградени од панели со пурпена кои чинеле 5–6 евра по метар, додека пожароотпорните панели со камена волна чинеле околу 17 евра.
„Сите модуларни болници чинеле околу 300.000 евра, а за нив биле обезбедени 30 милиони евра од Светската банка. Каде се тие пари – нема одговор. Можеби се наоѓаат во некоја акција во индиска авиокомпанија, стан во Дубаи или фирма во Бугарија“, изјави Манасиевски.
Тој истакна дека трагедијата со 14 загинати во Тетово можела да биде избегната.
„За жал, трагедијата во Тетово во која загинаа 14 наши сограѓани, можела да биде и спречена доколку Филипче потпишал минимум технички спецификации и ако направил елаборат за електрична енергија, со кои не би дошло до спој во електричната енергија и доколку панелите биле малку поскапи и подобри, можеби и ќе се избегнел пожарот. Но, Филипче по се изгледа алчен за парите, искористил минимум од обезбедените средства. Згора на се, ова можеби би било спречено и доколку Филипче ја прифател понудата на тогашниот медицински директор во тетовската болница, кој понудил сместување на КОВИД пациенти, на двата спрата кои биле слободни во истоимената болница каде тие биле оставени така празни. Филипче ова го одбил поради тоа што овие модуларни болници морале да бидат изградени“, рече Манасиевски.
Во изјавата, Манасиевски тврди дека вистинските виновници не се зад решетки, а дека „оние кои нуделе други решенија сега се осудени само на три години“.
„Вистинскиот виновник денес води политичка партија во опозиција“, заврши тој, најавувајќи нови информации утре, вклучително и околу тоа зошто обвинителката Кадриу била суспендирана.

