Македонија
Манчевски во Брисел: Македонија ќе има стратегија за сајбер-безбедност

Министерот за информатичко општество и администрација, Дамјан Манчевски, денеска во Брисел истакна дека првпат Македонија подготвува национален оперативен план за широкопојасен интернет. Говорејќи за приоритетите, за интеграција во дигиталниот пазар на Европската Унија, Манчевски рече дека најпосле Македонија ќе има стратегија за сајбер-безбедност, на што активно се работи периодов.
„МИОА во моментот работи во повеќе сфери со цел целосна дигитализација на земјата. Првпат во Македонија подготвуваме национален оперативен план за широкопојасен интернет. Конечно, Македонија ќе има стратегија за сајбер-безбедност, на што активно работиме периодов. Исто така, работиме на зголемување на бројот на е-услуги кои ќе бидат дел од првиот национален портал, со цел да се подобри и олесни животот на граѓаните“, информира министерот Манчевски.
Како што истакна министерот, за реализација на овие проекти од особено значење е поддршката на меѓународната заедница и донаторите.
На состанокот министерот информира и за дигиталниот самит за земјите од Западен Балкан, што ќе се одржи во Скопје на 18 и 19 април. Ги претстави четирите панел-сесии, кои се дел од официјалната агенда, каде што говорници ќе бидат министрите од регионот задолжени за дигиталната агенда, како и експерти во секој од областите.
Дигиталниот самит има цел да го приближи регионот кон Европската Унија од дигитален аспект, со намалување на цените на роамингот, размена на искуства, отворање на вратите за единствен дигитален пазар, отворање можност младите да се преквалификуваат во земјите од ЕУ и многу дружи можности што треба да произлезат како заклучоци од овој самит. Како што истакна Манчевски, на овој начин земјите од регионот ќе влезат во ЕУ пред официјалното политичко зачленување во европското семејство.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Дури и нивниот градоначалник од Кавадарци ги демантира лагите за „Еразмус+“

СДСМ обвини дека ВМРО-ДПМНЕ шири невистини за проектите преку програмата „Еразмус+“, со цел да ја одбрани актуелната в.д. директорка и да ги прикрие криминалните шеми. Од партијата посочуваат дека дури и градоначалникот на Кавадарци од ВМРО-ДПМНЕ, Митко Јанчев, јавно ја демантирал сопствената партија, објаснувајќи дека проектот за кој тие зборуваат не бил за „тренирање магариња“, туку за обука на ученици и наставници во земја членка на ЕУ, за стекнување вештини и поттикнување претприемачки капацитети, меѓу кои и производство на сирење.
СДСМ потсетува дека извештајот на ОЛАФ, доставен до Јавното обвинителство, утврдува основано сомнение за злоупотреба на над 2 милиони евра европски средства, во кои се инволвирани повеќе од 50 физички и правни лица во Македонија и уште пет земји од ЕУ. Дополнително, спорни се и 8 милиони евра распределени во периодот 2014–2017 година, кога, како што велат, евалуаторки во Агенцијата биле Ана Михајлов и нејзината кумашинка.
„Клучното прашање е во чии џебови завршија милионите евра европски пари“, порачаа од СДСМ и побараа Јавното обвинителство итно да отвори истрага и сите одговорни да понесат одговорност.
Македонија
Манасиевски: Преку „Еразмус+“ доделени над 200 илјади евра на брат на пратеник од СДСМ за дресура на магариња и првење сирење

Валентин Манасиевски oд ВМРО-ДПМНЕ, денеска обвини дека преку Агенцијата „Еразмус +“ биле доделени грантови во вредност од 205 илјади евра на Горан Велковски, брат на тогашниот пратеник од СДСМ, Диме Велковски.
„83 илјади евра за дресура на магариња и 125 илјади евра за правење сирење, СДС преку Еразмус + доделија на братот на нивниот пратеник,“ изјави Манасиевски.
Тој посочи дека остануваат неодговорени повеќе прашања – кој ги одобрил проектите, дали лицата што одлучувале биле блиски до СДСМ и дали на повиците учествувале и други кандидати кои не биле одбрани поради тоа што не биле членови на партијата.
„Тоа што СДС го правеше во Агенцијата Еразмус + беше еден од примерите како тие ја водеа државата. Работа и проекти имаше само за нивни членови, криминалот и корупцијата цветаа, додека одговорност немаше,“ рече Манасиевски, додавајќи дека обвинителството треба да отвори истраги.
Македонија
Реконструиран локалниот пат Бујковци – Мршевци

Општина Илинден изврши комплетна реконструкција на локалниот пат што ги поврзува населените места Бујковци и Мршевци, во должина од 1.100 метри. Во рамки на проектните активности на терен се изврши целосно санирање на постоечката асфалтна површина со поставување на нов асфалтен слој, извести Општината.
Градоначалникот на Општина Илинден, Александар Георгиевски, изврши увид во градежните активности и нагласи дека после многу години конечно се реконструира овој локален пат, кој е од исклучителна важност за повеќе населени места од општината како и дека со ова значително се подобрува секојдневието на жителите и се зголемува безбедноста на сите учесници во сообраќајот. Дополнително, ќе се постави ново ЛЕД улично осветлување во должина од над 400 метри, како и целосна хоризонтална и вертикална сообраќајна сигнализација согласно сообраќајниот проект.
„Изградбата на овој локален пат е дел од проектите што ги финансира Владата, а средствата за реализација се 60% од Владата на Република Македонија и 40% од Буџетот на Општина Илинден.
Локалната самоуправа и понатаму останува посветена на реализација на инфраструктурни и развојни проекти, со цел создавање современи, квалитетни и безбедни услови за живот на сите граѓани“, велат од Општината.