Македонија
Манчевски меѓу граѓаните на Демир Хисар: Промените носат подобар живот и на локално ниво

Потпретседателот на СДСМ Дамјан Манчевски, вчера беше во посета на Демир Хисар каде се сретна со граѓаните на оваа општина, како и со членови и поддржувачи на партијата.
На средбите се разговараше за реализација на мерките од програмата за подобрување на стандардот на граѓаните како и за инвестициите во инфраструктурата, многу значајни сегменти за подобрување на животот на граѓаните.
„Подобар живот за сите граѓани е наша приоритена цел на која работиме и затоа спроведуваме мерки и проекти во кои се опфатени сите општини. Рамномерен регионален развој и подобар живот и на локално ниво, во секое населено место е она за кое што се залагаме“, рече Манчевски.
Рехабилитација на постоечките патишта, водоводната и канализациона мрежа се она на кое што се работи и во Демир Хисар.
„Граѓаните на Демир Хисар знаат. Како Влада започнавме сериозен циклус на инвестиции во инфраструктурата за изградба и реконструкција на 60 патни правци низ целата држава, а во реализација се и над 30 проекти во комуналната инфраструктура. Тука би ја спомнал и изградбата на канализациона мрежа со подтретман на отпадните води во оваа општина, иневстиција којашто е дел токму од тие проекти во комуналната инфраструктура“, додаде Манчевски.
Манчевски со граѓаните зборуваше и за мерките во земјоделството кои го олеснуваат животот на земјоделецот, спроведените мерки кои ги намалуваат трошоците за живот, го подобруваат животниот стандард на граѓаните и враќаат повеќе пари кај граѓаните.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Предложен притвор за кичевецот кој утрово со секира си го уби таткото и тешко ја повреди мајка си

Основното јавно обвинителство Кичево поведе истражна постапка против кичевец осомничен за кривични дела убиство и обид за убиство.
„При вршење семејно насилство рано утрово, во дворот на семејната куќа во селото Србјани, осомничениот 47-годишник го лишил од живот својот татко, а се обидел да ја убие и својата мајка. При вербална расправија, со нож и секира најпрво го нападнал таткото, прободувајќи го по телото и удирајќи го со секирата по главата. Потоа и нанел убоди со нож во вратот и на неговата мајка. Од многубројните повреди оштетениот маж починал при укажување прва помош, а жената е пренесена на Ургентниот центар во Скопје во тешка состојба“, извести вечерва Обвинителството.
Јавниот обвинител до судијата на претходна постапка од Основниот суд во Кичево вечерва достави предлог за определување мерка притвор за осомничениот. Осомничениот беше уапсен откога самиот пријавил во Итната медицинска помош дека ги нападнал родителите.
Македонија
Невреме со град, дожд и грмотевици вечерва во Струмица: поплавени улици, паднати дрвја и делови од градот без струја

Откорнати дрвја, поплавени улици и делови од центарот без струја е билансот од невремето со град, дожд и грмежи вечерва во Струмица. За санирање на штетите на терен се јавното претпријатие „Комуналец“ и Територијалната противпожарна единица на Струмица.
Пожарникарите известија дека отстраниле паднато дрво врз автомобил на улица.
„Вечерва (недела) 11.05.2025 година, околу 20.00 часот на ул.Ванчо Китанов, ТППЕ Струмица со едно противпожарно возило и двајца пожарникари-спасители интервенираше на отстранување на паднато дрво врз автомобил. За кратко време дрвото е отстрането од улицата“, објави Противпожарната единица на Струмица.
Струмичани јавуваат дека невремето почнало пред 20 часот и за кусо време улиците биле поплавени и побелени од град.
Дијаспора
Муцунски се сретна со македонските иселеници во Шведска

Министерот за надворешни работи, Тимчо Муцунски, денеска и утре престојува во дводневна работна посета на Кралството Шведска. Фокусот на првиот ден од посетата беше ставен на бројната македонска дијаспора – при што ја посети и присуствуваше на литургија во македонската православна црква „Св. Наум Охридски“, се сретна со претставници на дијаспората и со македонски стопанственици кои работат и инвестираат во Шведска.
„Посетата на црквата ’Св. Наум Охридски’ во Малме и средбата со македонската заедница, како прв министер за надворешни работи кој присуствувал на утринска литургија во оваа црква, беа можност за разговор за нивните иницијативи, предизвици и очекувања. Се разговараше и за владините политики насочени кон унапредување на односите со дијаспората, при што беше потврден значајниот придонес на македонската заедница во јакнењето на односите меѓу двете држави. Во шведскиот град Трелеборг, во организација на Обединетата Македонска Дијаспора, министерот Муцунски се сретна со македонски стопанственици кои успешно делуваат во Шведска. Во фокусот на средбата беа можностите за инвестирање во Република Северна Македонија, јакнењето на економската соработка и активната улога на дијаспората во економскиот развој на државата“, известија од Министерството за надворешни работи.
Утре министерот Муцунски предвидено е да има средба со министерката за надворешни работи на Шведска, Мариа Малмер Стенергрард.