Македонија
Манчевски ја гледа администрацијата како брод што плови по немирно море

Mинистерот за информатичко општество и администрација, Дамјан Манчевски, денеска се обрати на настанот за промоција на истражувањето: „Анализа на именуваните и избраните лица. Извештај од следење: Колкав и каков јавен сектор имаме во Македонија“.
„Една од главните забелешки на ЕУ кога работиме бројни стратешки документи со нив е дека во државата нема основни анализи, немаме појдовни податоци. Нема правила, нема пропишана законска процедура кој е надлежен да формира некоја институција“, рече министерот Манчевски нагласувајќи дека за промена на системот неопходна е многу сила и волја, но и заемна поддршка со цел создавање ефикасна и квалитетна администрација.
„Сликовито ја гледам администрацијата како голем, масовен, гломазен брод крстосувач кој плови во еден правец, во немирно море долго време. Денес ние се обидуваме да го свртиме овој крстосувач. Тоа оди тешко и бавно, ама треба и многу сила и волја. Треба и поддршка од сите кои се на бродот. Лесно е да се заврти брод кој е празен, ама што ќе ни е таков брод. Со други зборови, не треба да предизвикаме квалитетните луѓе да скокнат од бродот, односно да ја напуштаат администрацијата“, смета министерот Манчевски.
Како што истакна тој, за да се адресираат проблемите и наодите во оваа анализа, потребно е дополнително да се направи анализа на законската регулатива. Сите бројки за луѓе и пари, за раководни лица и тела на разни институции, се законски регулирани во голем број закони. Закони од сите различни области. Само колку за илустрација, трите амандмани на ЗАС, кои се донесоа во јануари оваа година, предизвикаа промени на 126 различни закони.
Министерот Манчевски додаде дека паралелно со овие истражувања и анализи, МИОА работи и на функционална анализа на јавниот сектор. Првиот чекор е хоризонталната функционална анализа, чија прва предлог-верзија е веќе готова. Таа ќе покаже кои институции и каде се препоклопуваат со своите надлежости. Таа исто така ќе покаже и кои институции би можеле да се спојат или, пак, можеби и да се формираат нови.
На настанот се обратија и амбасадорот на Обединетото Кралство во Република Македонија, Чарлс Гарет, и државниот секретар на МИОА, Јахи Јахија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Ние сме усогласени со надворешната политика на ЕУ

Ние сме усогласени со надворешната политика на ЕУ, вели премиерот Христијан Мицкоски.
Мицкоски попладнево рече дека потегот во Обединетите нации не значи дека Македонија не била усогласена со надворешната политика на Европската унија, бидејќи резолуцијата не била таква.
Тој вели дека единствената резолуција, која како обврзувачка поминала во Советот за безбедност, е таа на САД, каде Македонија е ко-спонзор.
– Ние застанавме со нашиот сатратешки партнер, тоа се САД, а тоа не беше резолуција на ЕУ бидејќи исто така коспонзор на резолуцијата на САД е земја – членка на ЕУ, а тоа е Унгарија, така што не може да стане збор за усогласена надворешна политика на ЕУ. Нашиот став кога станува збор за усогласена надворешна политика на ЕУ, тука не треба да има никој дилема дека ние секогаш ќе бидеме бидејќи ја имаме усогласено нашата надворешна и одбранбена политика заедно со Европската унија, но во случајот тоа не беше случај. Ние застанавме позади резолуцијата и бевме коспонзори на резолуцијата на САД која што е единствената усвоена резолуција од страна на Советот за безбедност, а тоа значи дека е апликативна, рече вечерва Мицкоски.
Македонија
Мицкоски најави мега-инвестиција, гасни централи за решавање на проблемот со загадување

Премиерот Христијан Мицкоски најави мега-инвестиција за гасни централи за решавање на проблемот со загадување, нула денари приклучок на домаќинствата, над 1 милијарда евра инвестиции во енергетика.
Имаше средби со раководството на „Казанчи Холдинг“, која преку своите енергетски компании што работат под брендот „АКСА“, преставува еден од најголемите енергетски гиганти во својата област.
Со повеќе од 25 години искуство, „АКСА Енерџи“ е водечка турска компанија во енергетскиот сектор и клучен глобален инвеститор во одржлива енергија. Компанијата располага со инсталиран капацитет од над 3.500MW во 8 земји, а мнозинскиот сопственик на „АКСА Енерџи“, „Казанчи Холдинг“ работи во 22 земји на четири континенти.
„Јас во минатото говорев, кога станува збор за решавање на проблемот со загадување на воздухот дека разговараме со инвеститори кои се заинтересирани за градење на когенеративни гасни централи кои всушност се единственото трајно решение за загадениот воздух. И дека се друго би значело ставање на проблемот под тепих. Станува збор за когенеративни централи со 500MW инсталиран капацитет кои произведуваат 4,1TWh електрична енергија и 720 GWh топлинска енергија на годишно ниво. Токму „Казанчи Холдинг“ е компанијата со која разговараме за изградба на секундарна мрежа на гас и топловодна мрежа која ќе стига до домаќинствата по исклучително поволни услови. Приклучоците на гасоводна и топловодна мрежа се предвидуваат на 0 денари за домаќинствата, а цената на природниот гас за домаќинствата ќе биде многу пониска од онаа цена која е на берзите. Целиот проект, изградба на секундарна гасоводна мрежа, топловодна мрежа и когенеративните централи е димензиониран на инвестиција од над една милијарда евра“, вели Мицкоски.
Мицкоски додаде дека оваа инвестиција не е важна само за трајно решавање на проблемот со загадување на воздухот, туку и за енергетскиот потенцијал на државата.
„Инвестициите во ова поле се гаранција и зацврстување на нашата енергетска независност која во 21 век е всушност и зацврстување на сувереноста на државата во нејзиното одлучување и водење на политика. Разговараме за проекти кои се од темелно значење за животната средина, економијата, енергетската независност и стратешкото позиционирање на Македонија. Разговорите продолжуваат и сигурен сум дека за брзо време ќе се договориме и ќе има конкретни чекори во реализација на нивните планови“, рече премиерот.
Македонија
Опозицијата одржа надзорна расправа во Собранието за аерозагадување, власта ја бојкотираше

Во Собранието денеска се одржа првата надзорна расправа за ефектите од аерозагадувањето врз здравјето на граѓаните и мерките што се преземаат за заштита на јавното здравје.
Иако официално биле поканети, премиерот Христијан Мицкоски и министрите Изет Меџити, Сања Божиновска и Африм Гаши не се одзвале на поканата. Лидерот на Левица Димитар Апасиев изјави и покрај сите правни перипети и обиди за саботажа одлучил расправата да се одржи денеска.
Граѓанскиот сектор нотира дека недоставуваат стратешки документи за справување со аерозагадување, иако институциите се должни истите да ги изработат. Отсуството на политичка и правна одговорност за централната и локалната власт, несоодветни капацитети на обвинителствата за справување со кривичното дело “ЕКОЦИД”, како и слабото постапување на судовите во делот од еколошкиот криминал – се само дел од институционалните проблеми.
На надзорната расправа свое обраќање имаше и поранешната директорка на Државниот инспекторат за животна средина – Ана Петровска. Во своето стручно и исцрпно обраќање, таа особено го нотира проблемот со увоз и горење на нафтени деривати, затоа што институциите немаат капацитет за соодветна контрола на овие енергенси. Петровска потенцира дека итно и неодложно е потребно донесување на: Закон за контрола на индустриските емисии кој е веќе во нацрт-форма и Протокол за контрола на горивата.
На првата надзорна расправа за ефектите од аерозагадувањето врз здравјето на граѓаните и мерките што се преземаат за заштита на јавното здравје присуствуваа само пратениците на опозицијата, односно Левица и СДСМ.